LUUK 17

1Funak fákon Yensa nammi kuriibaool, “Kayinkoor léekubajaati kaate ekaan bukan man kukaan majakut, bare búyiikab pambulako di an akila áŋareuukomi! 2Ampi akammi man ákon di káyinenumi di ínje nan kuñiilak man akaan majakut, kóyume man aleebi di falaf bakoker fukooba fúnegenuma di ekondoorool. 3Jíkaanum! Apaali ariiba aceen alojaat di au, numanjenool. Átiiwoorujaat akat bálamuk mukaanaam mukila, nubonketool. 4Di funakaf fákonaf, alaañujaat alo di au ñooni futok di ñagaba, di aani, ‘Nijujuk mati nilolo di au,’ au oote kabonketool.” 5Kúriiŋenaak di kommi Akiiyaau Yensa, “Káanoli man ufaŋ man ufiume!” 6Akiiyaau nammi, “Jibajujaat kafium kare’e nan jikool jati jíbaar jimasitad, panjiŋoolen jireg hani busaanaab ube, ‘Rúpo’ooro, man ujaw uliilo’ooro di falaf,’ ban pambuyiiŋuul. 7“Ai di muyuul abajumi amiiceel ammi di ewañ mba fumat sisaha. Nampi alaañulomi bee síndeey di karambaak, mante panaregool, ‘Wáakenul ulako man uriaal’? 8Hani an! Lee panaanool, ‘Cookoor káliimenom di poop nukok bakampai man ucookoorom, manteer bee nan irie, niraan mbi kiti uri ban nuraan’? 9Mante arungaau panasal amiiceelaool, mati nakankaan wan aregoomi? 10Moo mákonam, nan muyuul jikaanemi wan ireguumi di joon maa, ‘Wúli kumiiceel kayajut esal, wakammi burok bóololi ceb woo nurokuñaa.’” 11Nan Yensa alakomi ejaay bee Yerusalem, nájawumumi di élingaay yati kapanak kati Samaria di Galili. 12Nan anokenumi di ésuk eceen yati bo, di kúkamboorumi kati kafaañ kooni uñen di kajuumulomi lói, 13di kucibulomi, “Yensa, Arungaau, baj káboteni di wúli.” 14Nan Yensa ajukiimi naaniimi, “Jijaw man jíyiisen kúkouul kúsimenaak kati Atijamit.” Nan alakomi ejaay di kutilulimi kukoy. 15Ákon di bukoo, nan ajukumi mati nakokoy, nalaañulomi bee di Yensa, nacibulomi man asal mákalaam mati Atijamit. 16Nalomi kúfima lof di úkamunaw wati Yensa, man alako di esalooley di wan akaanoomi. Ániinaau o’omu Asamaria. 17Yensa naceeŋumi, “Lee bukoo uñeney búromiil kutilulitilul? Bukaaku futokey di kubakiirak bukookei? 18Bajut ákon di bukoo abile bee esal mákalaam mati Atijamit kaanutujaat ajaaburuŋau ume?” 19Yensa naanoomi, “Yito man ujaw buruŋi. Kafiumak kooli kupakenipaken.” 20Funak fákon Kufarisaak di kuceeŋumi Yensa nei jáyiaj jati Atijamit joote ériiŋul. Yensa nalaañeniimi, “Jáyiaj jati Atijamit jilee bo ériiŋuley ñátum kúmanjum man jijuk mbi jimanj. 21An let aane, ‘Jijiker jooje!’ mba ‘Jijiker jooja uba!’ Mati jáyiaj jati Atijamit jooju di muyuul.” 22Nalaañumi asanken di kuriibaool man aaniil, “Kunakak pánkuriiŋ, panjimaŋ bee ejuk funak fákon fati kunakak Añiilau ati anau áyiisenooro inki, ban leejijukufo. 23Nampi bukanak koonuumi, ‘Jijiker ooma! mba jijiker oome!’ Takum jijaw man jiriibeniil. 24Mati nan man emitey elibooremi kapan bee di kapan di fatiya, moo Añiilau ati anau aatumi élaañuley di funakaf foola. 25Bare naate emond agaal máamak ban bukanak kati jaat koote elatool. 26Nan man nokooreenumi di kunakak kati Nuha, moo panokoorumi di kunakak kati Añiilau ati anau. 27Bukanak kulakolako furi, di baraan, di kayaboor bee nan Nuha anokenumi di busaanaab báamakab. Mumelam máamakam di mubilumi muyoomenumi warinobomi búrom. 28Moo mákonam eetumi kanokoorak nan di kunakak kati Luut, bukanak kulakolako furi, di kulako baraan, di kulako funoom, di kulako kanoomen, di kulako ewañ, di kulako kateep, 29bee mo di funakaf fan Luut ápurumi di ésukey yati Sodom. Bálankiin bájeeke sambun di godoroŋ di fatiya nan emitey yoom di kalub, ban di reemeniimi búrom. 30Wo’owu woo wootumi ekaaney bee di funakaf fampi Añiilau ati anau aatumi élaañuley man bukanak kumanjool. 31Di funakaf fukila, anoosani ammi téeŋey yati kalimbisool, takum anoken dó bee kajojenoor wambarool. Moo mákonam, anoosani ammi di kalaakool takum álaañul bee síndeey bee eŋaruwo. 32Jiwoolo wabajumi Luut aseekool! 33Ampi añesumi kapaken eroŋey yoola oo pánajimuyo, bare ampi ájimmi eroŋey yoola oo panabajuyo. 34Ínje eem di ereguul, di fuk fukila bukan kugaba pankufinto di bacaac bákon. Ákon panaŋari man aamu akati to. 35Kuseek kugaba pankulako etamp tákon. Ákon panaŋari man aamu akati to.” 36Kúniine kugaba pankulako di kalakaak, ákon panaŋari man aamu akati to. 37Kuriibaool di kuceeŋool, “Arungaau, kama boobei?” Yensa nalaañeniimi, “Nan man sígutum síraakemi eeno, moo múyiisenyiisen mati biiŋ boom bo.”

will be added

X\