LUUK 15

1Funak fákon kulagaak kati basaafab di kasofutimi di waaf kuceen búrom di kulako éloful bee káyenten kaliikitenak kati Yensa. 2Kufarisaak kuceenak di kuliikitenaak kati sílingaas kúkuumoorumi, di aaney, “Ániinaau ume nawalenewalen kasofutimi di waaf mansi kuri tákon di bukoo!” 3Yensa naŋarumi kúregak uke man aregiimi: 4“Kaanjaat aceen di muyuul abaje sisaha sooni ceme, ban nájimmi yákon di so, mante letakatubo saasu ban sommi di kafenak man ariiben añes yákoney yájimimi bee nampi ajukuloyomi? 5Nampi araŋenuloyomi, panamaayoor máamak man átebul yo ápin di ubandool di kamaayoor di kóro. 6Nampi ájeetumuluyomi bee síndeey, pánawonkul kupaalool di kulaoorool tákon man aaniil, ‘Jimaayooraal poopolaal, mati esahaom yájimeenumi eraŋeniraŋen.’ 7Moo mákonam, ínje eem di ereguul, kamaayoorak pankufaŋe man kúkalaae di bukinab bajakaab mati akaana majakut ákon átiiwoorumi akat bálamuk majakutam wuuj kooni bukan kubakiir di bútinken di kubakiir kasofumi koo ceeŋut kútiiwoor kukat bálamuk majakutam mooliil. 8Yensa naŋarumi kúregak kuceen man areg bukanak: “Mba kaanjaat aseek aceen abajumi sígodi sidurakuma sooni uñen man yákon éjim, mante létayabenaati éwuŋenuma, ban létawuuenaati kalimbisak tanootani, man añesuyo jak manteer bee nampi araŋenuyomi? 9Nampi araŋenuyomi, panawonk kupaalool di kulaoorool tákon, man aane, ‘Umaayooraal poopolaal, mati niraŋenraŋen égodaay edurakumaay yájimeenumi.’ 10Moo mákonam, ínje eem di ereguul simaleekaas sati Atijamit pansimaayoor mati akaana majakut ákon átiiwoorumi akat bálamuk majakutam.” 11Yensa naŋarumi inki kúregak kuceen man aregiimi: “Bajeembaj ániine aceen abajumi kuñiil kúniine kugaba. 12Ayiinkunau nammi ampaiil, ‘Ampaom, senom bucaabom di fubaji.’ Ampaiil nabaajumi fubajool kuñoolool. 13Kunak kupinaay fácul, ayiinkunau naŋarumi bucaabool aban najawumi bee di mof muceen máloie. Dóo di mofam mukila nakajenumi sígodaas soola búrom ñátum di eroŋ yajakut. 14Nan arisomi búrom aban, bacaar báamak di buloulomi di mofam mukila, ban nataatumi kábajaati waaf. 15Oo di fúko’ool najawumi añes burok di ániine aceen ati ró di mofam. Ániinaau umu naŋaroomi burok di kalaakool bati kacookoorak kati sikumbaas. 16Bacaarab di burioomi yok amaŋeen muriaam man sikumbaas siriemi, bare an áwuleriitool wampi ari. 17Bare nan búyegetool buwoolomi man aanooro, ‘Hani kurokaak kati ampaom búrom kurieri manteer kurinen, ñaa ínje oomu di ecet di bacaar! 18Ínje panilaañ bee di ampaom, man eenool, “Ampaom, ínje nilolo di Atijamit ban nilo di au poop. 19Moo kaane, iñeme ínje iyajut bee ekaan añooli, ñaa usofom man ikaan ákon di kurokai.“‘ 20Nayitomi alaañumi bóot bee di ampaool. Bare hani man kúloiyooreenumi, ampaool náŋandenuloomi di bóteniool máamak, nateyumi agaaboomi bíp ban nacuufoomi. 21Añoolool naanoomi, ‘Ampaom, ínje nilolo di Atijamit ban nilo di au. Ínje iyajut man uwonkom añooli.’ 22Bare ampaool nammi kumiiceelaool, ‘Jiwaaken! Jíŋarul kaloaak kafaŋumi man kujake di kalimbisak man jikaanool. Jíŋarul jísupa bee mati jisinkool di usamati man akaano. 23Jísoful jímuunaaj jaruukaaj jibuj, man ukaanaal kásuumenoor! 24Mati o’omu añiilau úmboom naceteencet ban iñeme náyitouloyito bee di eroŋey. Noo nájimeenjim, bare iñeme naraŋeniraŋen!’ Kásuumenoorak di kutooŋumi. 25“No’onu añiilau aamu anifaanau man alakoe burokab karambaak. Nan alaañulomi alof síndeey, najammi úcim di jíboomaj dóo síndeey. 26Náwonkul ákon di kurokaak ban naceeŋool wabajomi. 27Oo naanoomi, ‘Ati’i nalaañulolaañ! Ampai nabubuj jímuunaaj jaruukaaj, mati nalaañulolaañ ban nájuju.’ 28Bare añiilau anifaanau di rioomi matatat manteer alat kanokenak di eluupey. Ampaool nápurumi téeŋey man alawoomi, 29bare nalaañenumi ampaool, ‘Yénten, simitas use sajuupoe ínje oomu narokei máamak nan amiiceel ban ínje ilaturerut ekaan wan uregammi. Bare usenderutom hani jibatak, mambi úsuumenoor di kupaalom! 30Bare nan o’omu añiilau ooli alaañulomi, arimi fubajaf fooli di kuseek kayenetemi aban, nuregumi man kubuj jímuunaaj jaruukaaj!’ 31Ampaool nalaañenoomi, ‘Añoolom, au di ínje bukooke déere nanoosani, ban wanoosani wan ikilumi wooli. 32Bare jaat wulaal ootaale karuuken ban numaayooraal. Mati ati’i o’omu naceteencet ban iñeme náyitouloyito bee di eroŋey. Nájimeenjim ban naraŋeniraŋen.’”

will be added

X\