LUUK 14

1Funak fákon fati kálebienak arunga aceen ati Kufarisaak nabemumi Yensa di síndeey yoola. Bukanak di kulakomi kakooñaamoolak. 2Di bájudomi ániine an kásumut kati bulaaw kusofe man alakoe too di fáculool. 3Yensa naceeŋumi kumanjaak káamakak kati sílingaas di Kufarisaak, “Mante sílingaas soololaal sisenolaasen buruŋab bati kasonten di funakaf fati kálebienak, mba sisenutumo?” 4Bare di kulatumi kalaañenak. Yensa nasofulomi ániinaau áju’utau man asontenoomi aban, nakatoomi man ajaw. 5Yensa najonleniimi man aceeŋiimi, “Kaanjaat añooluul mba fúmuunauul fuloe di ekoloŋ, ai di muyuul létapurenuufo galab di funakaf fati kálebienak?” 6Kuŋoolenut kulaañenool to furim. 7Nan Yensa ajukumi mati kábemulimi búrom kooku kamuken kulakaak kafaŋumi man kúlebieni. Naseniimi kúregak uke man agameniil, 8“Nampi an abemimi bee di fuyab, takum ujaw man ulako fácul di fulako fafaŋumi man fúlebien. Aceen afaŋi man álebie au an kubeme. 9Abemuumi panabil man aani, ‘Maag ume fulakaaf ufe.’ Kammojaat au panupuño man ujaw ulako bálamuk. 10Bare nampi ubemimi, ujaw ulako bálamuk. Ukammojaat abemimi pánajo’ol man aani, ‘É! Apaalom, jó’ol ulako fácul babaj fulako fákoyume!’ Moo panubaj kasal di fácul kabemimi búrom. 11Mati anoosani atebenooromi Atijamit panawalenool, anoosani awalenooromi Atijamit panatebenool.” 12Yensa poop nammi ániinaau abemoomi, “Nampi ootumi ebemey bukan síndoi, takum ubem kupaali mba kuti’i mba kucinoori mba kulaoori kabajumi fubaj ceb. Ukammojaat, koo poop pankubemi kucaami. 13Bare nampi ujonjoorumi káaning, nubem kabajutumi, kámongomi, kabakomi di poop kápuumumi. 14Moo jakijak, mati leekuŋoolen kubemi man kucaami, Atijamit panacaami nampi ayitenulomi kajoonaak di kacetumi.” 15An aceen di kalakotomi furiaf tákon di ejamey mo’omu, nammi Yensa, “Ampi arimi dóo di káaningak kati jáyiaj jati Atijamit, jakoojak!” 16Yensa nalaañenoomi di kúregak uke: “Bajeembaj ániine aceen acookoorumi furiaf fati kásuumenoorak di síndo’ool ban nabemumi bukan kajuupoe. 17Nanan nati kásuumenoorak níriiŋumi, naboñumi amiiceelaool man ajaw areg bukanak kabemeenimi kubil mati wanoosani ujonjoorijonjoor. 18Bare bukoo búrom di kutaatumi eregey, wakammi leekuŋoolen kubil. Átiyaarau naanoomi, ‘Ninonnoom kalaak, ínje eete ejaw íjukuko. Nilawilaw, oonool abonketom.’ 19Aceen nammi, ‘Ninonnoom kúmuuna kuwaña kooni uñen, ban ínje oomu di ejaay iliikitenko burokab, nilawilaw oonool abonketom.’ 20Aceen naanumi poop, ‘Iñemeeñeme niyabe aseek, moo kaane letiŋoolen íjo’ol.’ 21Amiiceelau nalaañumi aregumo arungaool. Arungaool nan ajammi mo’omu di rioomi nammi, ‘Wookoor galab bee di ulolaw di uruŋaw di ésukey ban núwonkul kabajutumi, kabakomi, kápuumumi di kámongomi.’ 22Amiiceelau nammi, ‘Arungaau, níwonkuliiwonk búrom nan man uregammi, bare fulakaaf fumeeŋoorut.’ 23Arungaau nammi amiiceelau, ‘Jaw bee di uruŋaw wawuŋaaw di wagogaaw wammi di bálamuk ésukey, man jimingen bukanak man kunoken, mambi kumeeŋen fulakaaf. 24Mati ínje eem di ereguul, hani ákon di bukanak kukila kabemeenimi letajakender furiaf fati kásuumenoorak kúmboom.’” 25No’ona jameeŋey yati bukanak di elakomi kajawoor di Yensa. Nátiiwoorumi man ajonlenoorumi di bukoo man aaniimi, 26“Ampi ajawulomi bee di ínje ban búyegetool boom di kuwolaool, aseekool, kuñoolool, kutiool di kúliinool, hani di eroŋool fúkouyo, oo letaŋoolen akaan ariibaom. 27Ampi atebutumi ébaarey yoola yati búpinab man ariibenom, oo letaŋoolen akaan ariibaom. 28Mati ai di muyuul, amaŋumi eteep futeep di kafatak koola, letamond alako man awoonoor jak, butum buu naate érud to man ajuk manteer sígodaas san aakenumi pansiŋoolen siban burokab? 29Leejaat mo, nateteep are di fúlakenuma cebufo, aŋoolenut afabel fo, ban bukanak búrom kajukumi mo’omu pánkuluuool! 30Man koone, ‘Anau ume ataatumiñaa kateepak, ban aŋoolenut afabel!’ 31Mba áyi ai, pánayaautumi bee katiiken áyi aceen, oo bamondut alako man kumaloor jak manteer kutiikaool kooni síwilaas uñen pankuŋoolen kutiik di áyi aceen ábileuumi di síwilaas kabananey? 32Áyiau asofujaat letaŋooleniil, pánaboñaali bukan man kufok sambunas titooriil, bukoo báloiyoorerab. 33Moo kaane, hani ákon di muyuul oo bakatut bálamuk wan abajumi letaŋoolen akaan ariibaom. 34“Musis waaf wabaje fúkaw. Bare kafirak koolimo kúpurujaat, buu moote efir inki? 35Musisam mo’omu mubajut fúkaw bee di yentaam mba bee ekaan buñulen, moo ñaa kabeten ceb! Oo abajumi uwos újamuma najam!”

will be added

X\