1 No’onu di bajumi bukaaku kajawulomi man kusankenumi di Yensa mati Pontius Pilat naseneensen buruŋ man kubuj kuceen kati Galili nan kulakomi kásimen bee di Atijamit. 2 Yensa nalaañeniimi, “Mante jisosof kati Galili buku kufanfaŋ man kukaane májakaatie wuuj karinobomi, mati kubabaj búyiikab ubu? 3 A’a, moo leti, ínje eem di ereguul mati yo. Bare jítiiwoorutujaat jikat bálamuk majakutam búromuul poop panjicet. 4 Kama ñaa mante jisosof mati bukanak kooni bútinkeney di kúfeegiirak nan futeepaf fati Siloam fúloummi fubuj kufanfaŋ man kukaane májakaatie wuuj karinomi búrom kammi Yerusalem? 5 A’a, moo leti! Ínje eem di ereguul, bare jítiiwoorutujaat jikat bálamuk majakutam, muyuul búromuul poop panjicet.” 6 Yensa naregumi kúregak uke: “Ániine aceen nalukumi búpunduun di kafatool. Balay bákon nabil ámeelo man ajuk manteer buwowol natookumi buwolut. 7 Nabilumi ammi apooyaau ati kafatak, ‘Jiker, simit sífeegiir so’osu ínje nijawulojaw ímeelo búbaarab ube ban nitookumi buwolut. Betubo! Wau kaane búbaarab ubu boote eŋar buñulenab ñaañaaña bati mofam?’ 8 Apooyaau ati kafatak nalaañenoomi, ‘Arungaau, ukatubo to benen finkiin. Paniwok iŋoobenubo iban níkando buñulen. 9 Buwolujaat bulay, moo jajak. Bare leejaat moo, pambubeti.’” 10 Di funak fati kálebienak nan Yensa alakomi kaliikitenak dóo di fukobaf. 11 Ban najukumi aseek ammi dó an bágun busofe bálamukool búrongen wáriiŋe simit bútinken di sífeegiir, áyeteriit ayito ajuum sem. 12 Nan Yensa ajukoomi, náwonkuloomi, man aanoomi, “Iñaayom, au nupapak di kásumutak kooli!” 13 Narembenumi uñenaw di oo, ban naŋoolenumi ayito galab ajuum sem, nalakomi esaley Atijamit. 14 Bare arungaau ati fukobaf di rioomi matatat man Yensa asontenumi aseekau di funakaf fati kálebienak. Nammi bukanak, “Babaj kunak kooni futok di fákon kan bukanak kootumi burok. Jibil kunakak kukila mbi jibaj kasontenoorak, bare let funakaf fati kálebienak!” 15 Akiiyaau Yensa nalaañenoomi, “Muyuul mamisam! Let an di muyuul nafelefel fúmuunaool, mba erohaool man ájeetumuyo bee karaanenuyo hani funakaf fati kálebienak? 16 Mante eetut kapaken aseekau umu, oo ati fiilaf fati Iburehima an Seetaanaay esofumi mo’omu wáriiŋe simit bútinken di sífeegiir hani di funakaf fati kálebienak?” 17 Nan Yensa aregumi mo’omu, kulatoorool búrom di kupuñomi. Bukanak búrom di kulakomi kamaayoor mati wajamurerutimi wan akammi. 18 Yensa naceeŋumi, “Jáyiaj jati Atijamit buu joonoe? Di waa neete karekelenujo? 19 Joonojoono nan jikool jati jíbaar jimasitad jalukimi di kafatool. Di jiliil jibil jikaan jíbaar basuwaab di bulon dó ban di búwuul dó.” 20 “Di waa neete karekelen jáyiaj jati Atijamit? 21 Joonojoono nan múliitenuma. Aseek aceen aŋare áciigoorumi di wáriiŋe síkilo kabanan di futok sati epor bee ebol mbúur, bee nampi fúmeelaf fuliitenumi búrom.” 22 Yensa di ejaay bee Yerusalem, nájawunjawum di sísuk sáamak di sayiinkun mansi aliikiten di móro. 23 An aceen naceeŋoomi, “Arungaau, mante bukan kupinaay ceb koote epak?” Yensa nalaañeniimi, 24 “Jiraagal man jínokenum fúlamutaf fagogaaf. Ínje eem di ereguul mati bukan kajuupoe pankuraagal kanoken dó bare leekuŋoolen kunoken. 25 Nampi anifaanau ati eluupey ayitoulomi akul fúlamutaf, muyuul panjijuum téeŋey man jikongen di joonool, ‘Anifaanau, bonket úwambuloli!’ Bare panalaañenuul, ‘Ínje imanjut bei jíjawumulo.’ 26 Muyuul panjoon, ‘Wulaal nuriaari nuraanaaraan tín tákon, ban núliikitenliikiten di ulolaw wati sísukoli.’ 27 Bare panalaañen, ‘Ínje eem di ereguul, ínje imanjut bei jíjawumulo. Jítoro di ínje, muyuul kájakaatiñaa!’ 28 To’otu too jootumi káciiŋit di katooñoor, nampi jijukumi Iburehima, di Siyaaka, di Yankuba, di kuboñaak búrom kammi di jáyiaj jati Atijamit, bare muyuul di kúkouul di kubetenuumi téeŋey! 29 Bukan pánkujawumul kapanookapan di mofam búrom, man kuri káaningak dóo di jáyiaj jati Atijamit. 30 Jíyenten, kuceen kálamukoñaa pankulo fácul, ban kuceen káfaculuñaa pankulaañ bálamuk.” 31 No’onu Kufarisa kuceen kubilumi, di kommi Yensa, “Púr taate, mati Herod namammaŋ bee ebuji.” 32 Yensa nalaañeniimi, “Jijaw jireg kasiitilak kukila, ínje neene, ‘Jíyenten, jaat di kajom ínje kacesoor úgun ban nisonten bukan, ban di funakaf fúfeegintenaf panifabel burokab búmboom. 33 Jaat, di kajom, di funakaf fariibentomi neete ewuuj di buruŋab búmboom. Mati leeŋoolen kaan man aboña ati Atijamit acet di ésuk eceen leejaat Yerusalem.’ 34 Wáay ínje! Yerusalem, Yerusalem, yabujemi kuboñaak ban yaleebemi sikooba kan Atijamit áboñeulimi! Ñoomasoon nimaŋeemmaŋ kajojen bukanuul tákon di ínje nan man eyilool éfimenemi muciiwuyo eeno, bare jimaŋut man ikammo! 35 Iñeme jijiker, eluupuul elako tíikaar. Ban ínje eem di ereguul, leejilaañ jijukom bee nampi jommi, ‘Kásuumaayak kati Atijamit Akiiyaau kooku di ampi ajawulomi di kareesak kati Akiiyaau!’”
