LUUK 12

1Nan jameeŋey yati bukanak ejojumi juup manteer ihi kulako katobojoor, Yensa nataatumi kajonlen di kuriibaool, man aaniimi, “Jíkaanum múliitenumaam mati Kufarisaak, wan isankumiñaa mamisam mooliil. 2Wanoosani wayofimi panurajeni funak fákon mba wasankenimi di kutunt di érimey panujami funak fákon. 3Moo kaane wanoosani jiregumi di érimey, panujami di bala’ab. Ban wanoosani jibuusenumi an dóo di bulampan panujami fatiya man jameeŋ yati bukan búrom emanj. 4“Kúpaalumom! Ínje eem di ereguul, takum jíkoli kabujemi eniiley ban kukammojaat kuban leekulaañ kukaan waaf wawuujutomi. 5Bare ínje egamuul an jootumi kákoli: jíkoli abujumi aban, nababaj kánkum kati eŋar suut sati bukan ban naleebuso di sambunas sáceteriitumi. Éey, ínje eem di ereguul, oo jootumi kákoli! 6Lee kunoomenenoomen mutitiir mooni futok sígodi siasaari sigaba? Ban súm Atijamit ájimurerut hani jákon di mo. 7Hani waluul wo’owu Atijamit napimpin wo búrom. Takum jíkoli, muyuul jifaŋe man jibaje fúkaw mutitiir juup! 8“Ínje eem di ereguul, anoosani aregumi di bújonlenab bati bukanak mati ínje ikilool, Añiilau ati anau panaregumo poop di bújonlenab bati simaleekaas sati Atijamit. 9Bare ampi alatumi di bújonlenab bati bukanak mati ínje ikilool, oo poop panalati di bújonlenab bati simaleekaas sati Atijamit. 10Ampi asankenumi furim fati elat mati Añiilau ati anau panabonketi, bare ampi asankenumi furim fati elat mati Búyegetab Bátienaab, letabonketi jáng. 11Nampi kuruu’uumi fácul kukobak di kurungaak bee kagamenuulak, takum jikaanooro síwoonooruul buu mba wan kurimak kan jootumi kalaañeniil man jipak mba kan jootumi eregiiley, 12mati no’onu Búyegetab Bátienaab pambuliikitenuul wan joote ereg.” 13Ákon di jameeŋey naanoomi, “Aliikitenaau, bonket ureg átumbeom man ucaaboor bulaañab ban ámpaoli ákatolimi.” 14Yensa nalaañenumi, “Ániinaau, ai ajuumenaam bee eting bagam mba ereguul man jootumi kacaaboor wan jibajumi?” 15Ñaa nammi, “Jíkaanum, emaŋey yati fubajaf fan ukilutumi. Eroŋey yati anau elee di kapan kaaku kati fubajool handeneen nababaj juup.” 16Yensa naaniimi di kúregak uke, di aaney, “Abaja aceen nabajumi kalaak kaseneoomi mulukiinam majakaam. 17Nawoonooromi, ‘Waa neete ekaan, mati ibajut tampi ikaan muriam múmboom?’ 18Naanooromi, ‘Panikaan maa: panifum ulampanom, man iteep wafaŋe wo. Paninen dó muriam múmboom búrom man ibajumi. 19Paneenooro, Há ínje! Nibabaj juup wan iyofumi bee mati simit sajuupoe sábileuumi. Ñaa eri súum, eraan ŋooŋ ban fúraari juup!’ 20Bare Atijamit naanoomi, ‘Au añuloutuñaa! Di fukaf fati jaat yuuti paneŋari. Kammojaat, ai panaŋar wan unenumi bee di au?’ 21Mo’omu mootumi kabajoak bee di an ayofumi fubajaf bee di fúko’ool, bare di fáculey yati Atijamit, an akila abajut waaf.” 22Yensa nammi kuriibaool, “Moo kaane ínje eem di ereguul, takum jikaanooro síwoonooruul mati eroŋey yooluul wampi joote eri, mba wampi jikaano. 23Mati eroŋey efaŋe muria, ban eniil efaŋe wañ. 24Jijikeraal siganaaras síwañeriit: soo sílukeriit di poop síjaleriit, síbajeriit kunen mba ulampan. Bare Atijamit ákuumenesomi! Muyuul jíkoyume so! 25Ai di muyuul panaŋoolen abenen funak fákon di eroŋool ñátum di man akaanooroemi síwoonoorool? 26Jiŋoolenut to hani waaf wayiinkun, wau kaane di joom di eŋar waafaw uwu wati eroŋey jikaan síwoonooruul? 27Jijiker úrumpenaw wati mafosam ban man uliileñaa eeno. Úrokeriit ban úliireriit wañ. Bare ínje eem di ereguul, hani áyiau Suleimaan di fubajool dó majakam mati wañool múriiŋut mati hani bákon di úrumpenaw ukila. 28Atijamit akarenumi mafosam maliileñaa di karamba jaat wañ wajake bare kajom pammureemeni. Kammojaat, mante Atijamit letakarenuul wañ wuuj moo? Muyuul kan kafiumak kutiitiñaa! 29Takum jiñes wan joote eri di eraan, takum jigaalen úyegetuul. 30Mati kamanjutumi Atijamit ceb kuñesooroemi bayoolout ro’oru. Bare muyuul, Atijamit ampauul namammanj mati jicenceeŋ wo man jibaj. 31Bare jiñes mati jáyiaj jati Atijamit. Jikammojaat, Atijamit panasenuul uru jibenento. 32“Takum jíkoli, muyuul hani man jicotoñaa, mati Atijamit ampauul súumoosuum esenuuley jáyiaj joola. 33Jinoomen wan jibajumi man jiwul sígodaas kabajutumi. Jijoonen di kúkouul mumaka múkaanuma sígodi maatuturer kakaño ban di jiyof fubajuul di bukinab bajakaab dóo létujimurerufo. Mati kúkuu leekuŋoolen kutookufo ban bulol leebukajenufo. 34Mati tan fubajuul fommi, boo úyegetuul ulakoemi poop. 35“Jikok ukampaaw lit ban jiyaben síwuŋenumauul, 36ban jikaan joono nan kumiiceel kammi di ekobey arungaiil di élaañulool bóotumul bati fuyabaf ban aje’eene, manteer nampi alaañulomi man akongen mbi kúwambulool fúlamutaf galab. 37Kumiiceelak kukila jakiijak kan arungaiil átookuliimi bámooriut nampi alaañulomi! Ínje eem di ereguul malegenam, panakok bakampaool ban panalakeniil, man agabiil sinaaŋas man kuri! 38Alaañulojaat di titoorey yati fukaf, mba waradabaw, ban nátookuliimi man kujonjoore mo’omuñaa, kukila jakiijak. 39Bare di jimanj mo’omu, mati ati eluupey amanjeenujaat nei ákuuau aateene ériiŋul letakateen eluupool man afum. 40Muyuul poop joote kajonjoor nanoosani, mati Añiilau ati anau oomu bo élaañul nan jiwoonoorut mati ebiley yoola.” 41Peter naceeŋumi, “Arungaau, mante kúregak uke bee di wúli céboli mba bee di anoosani?” 42Akiiyaau Yensa nalaañenumi, “Kama ai eenomi acookooraau amiiceelau afiumaay ban nalinlo? Lee oo an arungaool panakat búrookaab di eluupool di poop man asen furiaf kumiiceel bukaaku nan ceeŋumi? 43Nampi arungaau alaañulomi, nátookulool to nakaan burokool, amiiceelau akila jakoojak. 44Ínje eem di ereguul malegenam, arungaau panakaan amiiceelau akila man acookoor fubajaf foola búrom. 45Bare kaanjaat amiiceelau naanooromi, ‘Arungaom létalaañaaliul iñeme,’ ban nataatumi kásuutuken kurokaak kúniinaak di kunaaraak ñátum etekiil ban nalako furi di eraan nákali. 46Arungaau pánalaañul funak fan amiiceelau akila asofutumi mati élaañuley yoola. No’onu arungaool panatekool jákaati ban nanaamoorool di káyinenutumi Atijamit. 47Amiiceelau akila aate ebaj kúnag káamak mati namammanj wan arungaool amaŋumi man akaan, bare nalatumi kajojenoorak mba ekaaney yati wo nan man amaŋumi eeno. 48Bare amiiceelau amanjutumi wan arungaool amaŋumi man akaan, akajenjaat panabaj kúnag kahiilie. An asenimi wafaŋe man ujuupoe aate eceeŋi wafaŋe man ujuupoe.” 49“Ínje nijawulojaw bee kayaben sambun di mofam mati dúniyaay, ban nimammaŋ máamak man súm siyabeneeni! 50Babaj kátiigulak kan ínje eete kátiiguli, ínje nigagaal máamak bee nampi wan íjawumulomi ukaanomi uban! 51Mante muyuul jisosof mati ínje nijawulojaw bee kájeetumul kásuumaay bee di dúniyaay? A’a, ínje eem di ereguul, nijawulojaw bee kápajul bukanak! 52Káŋarum iñeme kiilak kooni futok pánkupajuloori kúfeegiir kulaañ di kapan kaaku, kugaba di kulatom kulaañ di kapan kaaku, mba kugaba kulaañ di kapan kaaku, kúfeegiir di kulatom kulaañ di kapan kaaku, 53pánkupajuloori, añiil ániine di ampaool, añiil anaare di iñaayool, ásampul anaare di alolaool anaare.” 54Yensa najonlenumi di jameeŋey nammi, “Nampi jijukemi fúmigen di fúyitoumul ban bala’ab bújonumemi, yaŋ too galab joonesoon, ‘Panelub’, di kammo. 55Nampi jijukemi járusey énagumul ban bala’ab búrabumemi, joonesoon, ‘Pámboli máamak’, di kammo. 56Muyuul mamisam! Jílaulelaul wati bukinab bajakaab di wati dúniyaay. Bare wau kaane jimanjut wan Atijamit ammi di ekaaney jaat bee di muyuul? 57“Wau kaane muyuul di kúkouul jibajut kawoonoor kati emanjey mampi ukammi man jak? 58Ulakojaat ejaay di aloboori bee di bagam, uraagal man jijamoor muyuul, manteer takum aruui bati agamenaau. Leejaat mo’omu panaseni apooya man akuli, dán bukanak kukuleimi. 59Ínje eregi, létupururerul bee nampi ucaamumi jaj wan agamenaau acaamenimi.”

will be added

X\