LUUK 11

1Funak fákon Yensa nalakolako elawey tan ticeen. Nan abanumi kúlawak, ariibaool aceen naanoomi, “Arungaau, líikitenoli man ootumi elaw, nan man Yaaya Átiigulenaau aliikitenumi kuriibaool.” 2Yensa naaniimi, “Nampi jilakomi elawey, jiregumaa: “Ámpaoli Atijamit, mbi kareesi kúlebieni. Mbi kunakak kati jáyiaj jooli kúriiŋul. 3Wúnoli wampi uri funakoofunak. 4Bonket majakutam móololi, mati wúli di kúko’oli ubonketemi kalomi di wúli. Ban rúngoli takum Seetaanaay eŋoolen éyinkoli.” 5Yensa naaniimi, “Ai di muyuul abajumi apaala man ajaw bee di oo titoorey yati fukaf ban naanool, ‘Apaalom, umaagenom kúmbuur kúfeegiir. 6Mati apaalom aceen najawulojaw kajaaburuŋ bee di ínje, bare ibajut wampi isenool ari.’ 7Apaali panalaañeni dóo di kalimbisool, ‘Takum ugaalenom. Kábabumaak súm bakule, ban ínje di kuñoolom nufintofinto. Letiŋoolen iyito man iseni waaf.’ 8Ínje eem di ereguul handeneen letayito man asenool waaf mati oo apaalool barebare, bare pánayitoul man asenool wan aceeŋumi mati narulenrulen elawey bagaalut. 9Ínje eem di ereguul, jilaw, panjibaj. Jiñes, panjijuk. Jikongen, kábabumaak pánkuwambulouul. 10Mati ampi alawumi, panayab. Ampi añesumi, panajuk. Ban kábabumaak pánawambuli bee di ampi akongenukomi. 11Ai di muyuul kumpaak, añoolool alawoojaat ewol, panasenool eyela? 12Mba alawoojaat feh, panasenool elankuur? Malegen, leejikaan mo! 13Muyuul kájakaatimi, jimammanj panusen wajake bee di kuñooluul. Ampauul Atijamit ammi di bukinab bajakaab panafaŋ man amanje man asen Búyegetab Bátienaab boola bee di kalawoomi!” 14Funak fákon Yensa nalakomi kacesoor bágun di ániine aceen ati búnuŋa. Nan bágunab búpurumi di oo, ániinaau naŋoolenumi asanken inki. Jameeŋey yati bukanak di wáaloyomi, 15bare kuceen di bukoo di kommi, “Arungaau ati úgunaw, Belusebul esenool kánkumak kati kacesoor úgunaw.” 16Bukaaku di kuliikumi eyinkooley man áyiisiil fúmanjum man kufium mati kánkumool di Atijamit kújawumulo. 17Bare Yensa namanjumi kawoonoorak kooliil, naaniimi, “Di jáyi janoosani, bukan kulatoorumi joo panjifumo wúp. Eluup yanoosani bukan kulatoorumi yoo panefumo wúp. 18Kaanjaat Seetaanaay épajulooropajulooro, kama buu jáyiaj jooliyo panjijuum? Mati joone ínje Belusebul esenaam kánkumak kati kacesoor úgun. 19Eenojaat ínje Belusebul esenaam kánkumak kati kacesoor úgunaw, kama ai asenumi kuriibauul kánkumak kati kacesooruwo? Wan kuriibauul kommi di ekaaney pankureguul mati jikooŋut. 20Bare eenojaat ínje Atijamit asenaam kánkumak kati kacesooruwo, moo múyiiseneyiisen mati jáyiaj jati Atijamit jíriiŋuloriiŋ jiban di muyuul. 21Nan ániine abajumi kánkum ban nabaj mútiikuma malegen apooyumi jak eluupool, waafaw wándomi woola letubotureri. 22Bare an aceen afaŋumi ati eluupey uye kánkum atiikenoomi man aŋoolenool, ban naŋar mútiikumaam moola man ágolumumi man ábotul wanoosani woola di eluupool, man acaabuwo kuriibaool. 23Ampi aleemi di ínje oo alatoorom, ampi arambenutammi man ijojen bukanak tákon oo ayiisikena.” 24“Nan bágun búpuremi di an, di buyuunoor bee di baŋaan, eñesey tampi bugoogo. Bare nan buraŋenutumi tampi bulako, di buregumi, ‘Ínje panilaañ bóot ban ípurumulomi.’ 25Ñaa di bulaañ tibutook to man cookoori jak. 26Bágunab di bujaw buñes úgun wooni futok di ugaba uceen wafaŋumi man újakaatie fúkoubo, woo búrom man úriiboorul ulaañ unoken di anau búrom man ucin dó. Di múlamukaam, kásumutak kati an akila kootumi efaŋ man kumingene mútiyaaram.” 27Nan alakomi kasankenak mo’omu, aseek aceen acibulomi di jameeŋey, “Aseekau afaretimi aban naraafenimi, jakoojak.” 28Bare Yensa nalaañenumi, “Kan faŋumi man jakiil kajamemi furimaf fati Atijamit, ban di kukaan fo!” 29Nan jameeŋey ejojutomi di Yensa, naaniil, “Muyuul bukanak kati jaat jíjakaatijakaati. Joone íyiisuul fúmanjum man jifiumom, bare létiyiisuul manteer rino fúmanjumaf fati aboñaau Yunusa. 30Nan man Yunusa abilumi akaan fúmanjum fati Atijamit bee di bukanak kati Niniwet. Añiilau ati anau poop moo aatumi ekaan fúmanjum fati Atijamit bee di bukanak kati jaat. 31Áyiau anaaraau ati mofam mammi di kañenak kúridak, pánayitoul di funakaf fati kagamenak ajuum fácul bukanak kati jaat man ataakeniil ban náfireniil mati kulolo. Mati nápurumulopurum di mof máloie bee ejamey yati malinlaam mati áyiau Suleimaan. Ban súm an aceen afaŋe Suleimaan oome! 32Bukanak kati Niniwet pánkuyitoul di funakaf fati kagamenak kujuum fácul bukanak kati jaat man kúfireniil mati kulolo. Mati bukanak kati bo kútiiwootiiwoor kukat bálamuk majakutam, nan kujammi káriiŋenak kati Yunusa. Ban súm an aceen afaŋumi kákalaa Yunusa oome! 33“An letayaben éwuŋenuma aban nayofuyo mba náfimenuyo ñátum kateep. Bare panaganduyo di fúgandumaaf man ewuŋen, kampi kanokenulomi kalimbisak, pankujuk mawuŋam mukila. 34Kúcili kankaan nan éwuŋenumaay yati eniiley. Kúcili kújujaat eniili búrom panewuŋ. Bare kúcili kúju’utujaat eniili búrom pánerimen. 35Moo kaane, úkaanum takum mawuŋam mammi di au mukaan érim. 36Kama kaanjaat eniili búrom ewuŋenwuŋen, bajut kapan kalakoe di érimey. Moo eniili búrom panebaj mawuŋam, nan man éwuŋenuma ewuŋeneimi fijijij.” 37Nan Yensa ammi di kasankenak, Afarisa aceen nabemoomi síndo’ool. Yensa nanokenumi alakomi tan kootumi furiaf. 38Afarisaau di wáalo’oomi nan ákaanumumi mati Yensa añaakulenut nan man buruŋab booliil kuceeŋumi bala’a atooŋ bee furi. 39Ñaa Akiiyaau Yensa naanoomi, “Iñeme muyuul Kufarisaak jiposepos di jitilul téeŋey yati káraanumaak di ebiiney ériumaay, bare dóo di úyegetuul laenlaen tir di bújakaati. 40Muyuul kañuloutuñaa! Mante lee Atijamit ajoonenumi siniiluul, ajoonene úyegetuul poop? 41Bare jiwul wan jookumi kabajutumi, moo Atijamit panatilul wanoosani bee mati muyuul. 42“Bare búyiikab bulako di muyuul Kufarisaak! Mati jípurenepuren jakaay yati nana, yati peganon, di yati etojey yanoosani yan jitujumi, bare muyuul jooju di emoos majoonam di kamaŋak kati Atijamit. Uwu búrom, woo jooteenumi ekaan bamoosut warinomi poop. 43Búyiikab bulako di muyuul Kufarisaak! Mati jimaŋemaŋ jilako di kulakaak kafaŋumi man kujake di jiraj di kukobak kati Atijamit, ban jimaŋemaŋ man bukanak kusaafuul di uñen ugaba di weelumaw! 44Búyiikab bulako di muyuul! Mati jikankaan nan kuyaak kayofoe, kan bukanak kurembooremi bamanjut.” 45Ákon di kumanjaak káamakak kati sílingaas nalaañenoomi, “Aliikitenaau, au nújelolijel poop di wan usankenumiñaa mo’omu!” 46Yensa nammi, “Búyiikab bulako di muyuul, kumanjaak káamakak kati sílingaas poop! Mati muyuul jirookenerooken búrooko bálebie di bukan, bare muyuul di kúkouul jímaŋeriit karambeniil hani jayiinkun man kuteb búrookaab bukila. 47Búyiikab bulako di muyuul! Mati muyuul jiteepeteep kuyaakak kati kuboñaak kan kufannaaniŋuul kubujumi. 48Mo’omu moo jíyiisenumi mati wan kufannaaniŋuul kukammi no’ona úsuumuusuum, mati kububuj kuboñaak kati Atijamit ban muyuul di jiteepumiñaa kuyaakak kooliil! 49Mati mo’omu, Atijamit amanjumi waafaw búrom nammi, ‘Paniboñiil kuboña di kúriiŋena, ban pankubuj bukaaku di kúsuutuken bukaaku.’ 50Moo kaane muyuul, kati iñeme pankucaam mati ebujey yati kuboñaak búrom yan kukammi káŋarum no’ona di butuukab bati dúniyaay, 51kabiñoo ebujey yati aboñaau Abel bee di ebujey yati aboñaau Jakaria, abujimi too di titoorey yati fúsimenaf di fukobaf fáñiiaaf fati Atijamit. Éey, ínje eem di ereguul! Bukanak kati iñeme pankucaam mati ebujey uyu búrom yan kufannaaniŋiil kukammi! 52Búyiikab bulako di muyuul kumanjaak káamakak kati sílingaas! Mati muyuul jiŋaŋŋar ékulumaay yanokenemi di butumab bati fumanjaf. Muyuul di kúkouul jinokenut dó, ban di jífirenumi kammi di kanokenak dó!” 53Nan Yensa ápurulobomi, Kufarisaak di kuliikitenaak kati sílingaas di kufaŋ man kulitenool ban di kulukusool man areg wan kuceeŋoomi di kúceeŋ kajuupoe, 54mambi areg wampi wakammi man kúlaafumool.

will be added

X\