LUUK 10

1Nan mo’omu púrutomi Akiiyaau Yensa ñaa namukenumi kuriibaool kuceen kooni bukan kúfeegiir di uñen, man aboñiimi kulo fáculool kugaba-kugaba, bee di ésukooesuk búrom, yan Yensa asofumi bee ejaay beet. 2Yensa naregiimi, “Ejaley busereŋab ékalaakalaa, bare kujalaak kuyajut. Moo kaane jilaw Atijamit akilumi ejaley mambi abenenuul kujala bee di kalaakool. 3Jijaw di buruŋuul iñeme, ban jiwoolo mati ínje eboñuul nan musaha maate kalako ban játunt yati símunduŋo soom. 4Takum jíjeetum jimaka jíkaanuma sígodi, mba ejonkonkoroŋ, mba usamati. Takum jijuum bee kasaafoor piyo di an di buruŋab. 5Nampi jilakomi kanoken eluup yanoosani, jimond jooniil, ‘Kásuumaay pankucin di eluupey uye!’ 6Kaanjaat ácindomi an ati kásuumaay, kásuumaayak kooluul pankulako di oo. Akaanutumojaat, kásuumaayak ko’oku pankulaañ bee di muyuul. 7Nampi awalenuumi di eluupey yoola, jílakoro tákon man jiri, di jiraan wanoosani kuwuluumi, mati arokaau aate eyab bacaamool. Takum jikat eluupey ekila dán kuwalenuumi man jijaw eluup bee di eluup. 8Nampi jinokenumi di ésuk man kuwalenuul ró, jiri wampi kuwuluumi, 9ban di jisonten kásumutumi di ésukey ekila, di jiregiil, ‘Jáyiaj jati Atijamit jilofulolof bee di muyuul.’ 10Bare nampi jinokenumi di ésuk man kulat kawalenuulak ró, jípur bee di uruŋaw wooliil man joone, 11‘Hani kaporak ko’oku kati ésukuul kakotumi di úkamunoli, panufankuko ulaañenuul. Jimanj mati jáyiaj jati Atijamit súm jilofulolof.’ 12Ínje eem di ereguul di funakaf fati kagamenak Atijamit pánayiisen kabonket káamak bee kati Sodom faŋ kati ésuk ekila yalatuumi. 13“Búyiikab bulako di muyuul, kati Korasin! Búyiikab bulako di muyuul poop, kati Beteseda! Mati kaaneenjaat wajamurerutimi wáyiisenimi di sísukas sooluul woo úyiiseneenimi di Turo di Sidon, bukanak kooliil pankukaanoeen kurookal ban di kunannoor kábump man kúyiisen mati kútiiwootiiwoor kukat bálamuk majakutam! 14Di funakaf fati kagamenak Atijamit pánayiisen kabonket káamak bee di kati Turo di kati Sidon wuuj kati sísukuul. 15Muyuul, kati Kapaanaum, mante Atijamit panatebenuul bee di bukinab bajakaab? Panawalenuul bee di Esuney. 16Nammi kuriibaool, “Ampi ajamuumi ínje najame, ban ampi alatuumi ínje nalate. Ampi alatammi áboñulammi nalate.” 17Nan kuriibaool bukan kúfeegiirak di uñeney di kugabaak kulaañulomi di kamaayoor man kommi, “Arungaau, hani úgunaw úyiiŋoliyiiŋ nan umakuwomi di kareesi!” 18Naaniimi, “Nijujuk Seetaanaay man eloulomi di bukinab bajakaab nan kaliboorak kati emitey kuwaakenumi eeno! 19Nisenuusen fujuum, man jiŋoolen jitoboj siyela di silankuur di poop man jiŋoolen kánkumak búrom kati Seetaanaay. Waaf létubukenuul. 20Bare takum jimaayoor mati úgunaw wayiiŋuumi ceb. Jifaŋ man jimaayoore mati Atijamit naciciik ureesuul di búkaay yati bukinab bajakaab.” 21No’onu Yensa nameeŋumi di Búyegetab Bátienaab nalakomi di kamaayoor ban nammi, “Ampaau, au arungumi dúniyaay di bukinab bajakaab nisalisal mati wan uyofumi kalinlomi di kamanjumi ban woo numanjenumi kamanjutumi. Éey, Ampaau, mo’omu muyeimi man ukammo.” 22“Ampaom nasenansen emanjey búrom. Hani an amanje ai eenomi Añiilau rino Ampaau, mba ai eenomi Ampaau rino Añiilau, di kan Añiilau amaŋumi man kumanj Ampaool.” 23Yensa nátiiwoorumi ajonlen di kuriibaool sicebiil man aaniimi, “Muyuul jakuujak kajukumi wan jijukeñaa! 24Ínje eem di ereguul mati kuboña kati Atijamit di kúyi kajuupoe kati noo kumaŋeemmaŋ ejuk wan jijukeñaa, bare kujukutuwo. Ban poop kumaŋeemmaŋ ejam wan jijameñaa bare kujamutuwo.” 25Funak fákon amanja áamak ati sílingaas nayitomi ajuum di fukobaf bee eyink Yensa ñátum di eceeŋool kúceeŋak uke, “Aliikitenaau, waa neete ekaan man ibaj eroŋey yati bándoorey?” 26Yensa nalaañenoomi, “Waa uciikimi di sílingaas soololaal? Buu nuliikenusomi?” 27Ániinaau nalaañenoomi, “‘Noote emaŋ Atijamit Akiiyaau ooli di ésigiri búrom, di yuuti búrom, di kánkumi búrom, di búyegeti búrom’, ban ‘Noote emaŋ alaoori nan man umaŋumi fúkoi eeno.’” 28Yensa naanoomi, “Nukonkooŋ, kaan mo’omu, ban panubaj eroŋey yati bándoorey.” 29Bare aliikitenaau ati sílingaas namaŋumi bee éyiis mati nakonkooŋ, ñaa di eceeŋ Yensa, “Ai eenomi alaoorom?” 30Yensa nalaañenumi di karegak uke, “Ániine alakomi ejaay kápurumul Yerusalem bee Yeriko. Di bajumi kúlaputa kuceen kúloumool, kubotumi wan aakumi ban di kúbulul kaloaak koola ban di kutekoomi manteer atundo, di kukatootomi. 31No’onu ásimena ati Atijamit alakoeene ebil di buruŋ bukila. Nan ajukumi ániinaau ume naceromi bee di kapanak kaaku aban nawuujumi. 32Moo mákonam ániine Alewi aceen poop nalakomi kájawum to najukoomi, napanomi man awuuj. 33Bare ániine Asamaria aceen nalakomi kajaaburuŋ kájawum to nátookulool to, ban nan ajukoomi, náboteniool. 34Ániinaau akila najawumi bee di oo, nabooñenumi musontaam moola ban nakoken mo, náyuenumi túlu di wayin di mo. Ñaa narembenoomi di erohaool man ájeetumoomi bee di eluup yati dán kujaaburuŋ kuwannooremi, ban nacookooroomi. 35Furabooraf, nasenumi ati eluupey sígodi sidenaari sigaba, nammi, ‘Cookoorool, eenojaat sígodaas leesiyaj, panicaami nampi ilaañulomi.’ 36Ai di kúniinaak kúfeegiirak buke jisofumi alaoorau alegenau bee di ániinaau an kúlaputaak kúloummi?” 37Nalaañenoomi, “Abajumi kabonket bee di oo.” Yensa naanoomi, “Jaw man ukaan moo mákonam.” 38Nan Yensa di kuriibaool kulakomi ejaay buruŋiil, di kunokenumi di ésuk. Di ésukey ekila aseek an koonemi Maruta awalenoomi di síndo’ool. 39Maruta nababaj atiool kareesool Mariyaama. Mariyaama alakomi lof di úkamunaw wati Akiiyaau Yensa ban náyenten wan alakomi di kaliikitenak. 40Bare Maruta búyegetool di bugaalumi mati burokab buwuwuuj fúko’ool. Nabilumi bee di Yensa man ammi, “Arungaau, mante eniili ejisut man atiom alako taate man ínje eem di burok cebom? Regool arambenom!” 41Bare Akiiyaau nalaañenoomi, “Maruta, Maruta, au búyegeti bujunjuum di bugaal mati waaf wajuupoe, 42bare wákon ceb ubaje fúkaw. Mariyaama oo namukemmuken waaf wafaŋumi man ubaje fúkaw, woo an aatut ebotureruwo di oo.”

will be added

X\