1 Anifaanau áamakau Teofil, nusaafisaaf máamak. Bukan kajuupoe kuliliik eciik wan kuŋoolenumi búrom mati wan Atijamit akammi titoorolaal. 2 Bukanak kukila koo kuciikumi wan ujammi kápurumul kakammi kúyiisena mati uru biñoo di fúcitumaf ban kúriiŋena kati furimaf fati Atijamit. 3 Ínje niwoonoorumi poop, anifaanau áamakau, mati níningulooninguloor mukaanaam umu biñoo di fúcitumaf. Moo kaane, cenceeŋ man iciikuto furimaf ufe di kapan kuceen bee di au nan man mukaanaam mujawoorumi eeno. 4 Ínje nikankaan mo’omu mambi umanj malegenam tíen mati wanoosani wan ujammi. 5 Noo di kunakak kati Herod alakoeenumi áyiau ati Yúdea, bajeembaj ásimena aceen ati Atijamit, an koonemi Jakaria, oo ati di kayooŋak kati kúsimenaak kati Atijamit kati fiilaf fati afannaaniŋiil, Abia. Aseekool kareesool Elisabet, oo ati úwoloorumaw wati Aaruna, ásimenaau áamakau ati Atijamit ati noo, nápurulo. 6 Koo búrom bukan kajoone di bújonlenab bati Atijamit, ban di kulako kákaanum kájaatikenak di sílingaas sati Akiiyaau búrom. 7 Bare kubajut añiil, mati Elisabet amanjut fufaan, ban oo di Jakaria búrom kufanlenfanlen kuban. 8 Funak fákon Jakaria alakomi di bújonlenab bati Atijamit, di ekaan burokool bati ásimena ati Atijamit di mati funoomaf fati kayooŋak kati fiilaf foola fúriiŋe. 9 Wariiboorumi di mukaanaam mati kúsimenaak kati Atijamit kati noo, kumukenoomuken ñátum di baluk, ban di kukaanool man ajaw anoken di fukobaf fáñiiaaf fati Akiiyaau, man akooren búsiifet bati bubaliin dó. 10 Nan alakomi kakooren búsiifetab bati bubaliinab, jameeŋ yati kukoba bukaaku búrom di elakomi téeŋey man elawumi. 11 Di bajumi maleeka yati Akiiyaau yarajulomi nan Jakaria ajummi di kapanak kúridak kati di jirembaj, tan búsiifetab bati bubaliinab bukooreneimi. 12 Nan Jakaria ajukuyomi, nawonlomi ban nákoli. 13 Bare maleekaay di yoonoomi, “Jakaria, takum úkoli! Mati Atijamit nayayab kúlawak kooli, di poop aseeki Elisabet pánabajuli añiil ániine, an oote ekaan kareesool Yaaya. 14 Panubaj kásuumaak káamak manteer pak, ban bukanak pánsuumiil máamak mati ewoliey yoola, 15 mati panakaan an áamak di bújonlenab bati Akiiyaau. Oo aatut eraan bunuk bajoobe di baale, hani bunkaay poop ban Búyegetab Bátienaab pambookool, hani biñoo oo di faraf fati iñaayool mbi kiti awoli. 16 pánalaañenul bukan kajuupoe kati Isirael bee di buruŋab bati Akiiyaau Atijamit ooliil. 17 Panayab fácul Akiiyaau ñátum di kánkumak kákonak di Búyegetab Bátienaab bákonab ban aboñaau Eliya abajumi. Pánalaañenul sísigiras sati kumpaak bee di kuñiilak kooliil man kujamoor inki, di poop pánalaañenul kañoosemi Atijamit, akaaniil nan man kajoonaak kuwoonooremi eeno. Di mo’omu poop panajonjoor bukan kaate bee kamiiceelaet Akiiyaau.” 18 Jakaria nammi maleekaay, “Buu neetumi ekaaney man imanj mo’omu malegen? Mati ínje di aseekom búrom nufanlenfanlen.” 19 Maleekaay di yoonoomi, “Ínje Jibiriin, ajuumemi di bújonlenab bati Atijamit bee kamiiceelaetool. Náboñulamboñ man isankeni di poop níriiŋeni furimaf fajakaaf ufe. 20 Panukaan búnuŋa bee nampi funakaf fati kurimom fúlirumi, mati au úyinenut kurimom. Ban funakaf fúriiŋujaat kurimom súm pankukaan malegen.” 21 No’ona bukanak di kulakomi ekobey Jakaria man ápur bee téeŋey, di kawoonoor káamak wau kaane napiyo mo’omu di fukobaf fáñiiaaf fati Atijamit. 22 Nan ápurulomi, aŋoolenut asanken di bukoo, ban di kumanjumi mati najukeenjuk waaf nan sáaut dóo di fukobaf fáñiiaaf fati Atijamit. Nataatumi káyiisenumiil ñátum uñenool di fúkaaf foola, ban narulenumi di kásankenaataak. 23 Nan funoomaf foola fati burokab fubanumi dóo di fukobaf fáamakaf, nalaañumi bóot. 24 Nan mo’omu múpurutomi, aseekool Elisabet nabilumi aŋar búrooko, wáriiŋe kuleeŋ futok nayofomi, ban nalako kawoonoor di síndeey yoola, man aanooromi, 25 “Akiiyaau akaane mo’omu búrom bee di ínje. Di kunakak uke náyiisenanyiisen kabonketak koola, manteer bukanak takum kupuñenom.” 26 Nan Elisabet abajumi búrooko bati kuleeŋ futok di fákon, Atijamit naboñulomi maleekaay Jibiriin bee Nasaret yati Galili. 27 Ebabaj kurim bee di ámajiraau, an koonemi Mariyaama, amanjutumi ániine, an kujuumenoom mambi ayabo an koonemi Esufa, oo ati di úwoloorumaw wati áyiau Dauda. 28 Maleekaay Jibiriin di erajulomi Mariyaama man yoonoomi, “Isaafi, súumi au an Atijamit álebienumi máamak, Akiiyaau oomu di au!” 29 Bare Mariyaama di gaalenoomi máamak mati kurimak kan maleekaay éjeetumulomi. Di kaanoomi kawoonoor mati waa kasaafak uke kurege. 30 Maleekaay di yoonoomi, “Mariyaama, takum úkoli, mati au eenomi an Atijamit álebienumi máamak. 31 Yénten man iregi tíen! Panooken búrooko ban panuroŋ añiil ániine, an oote ekaan kareesool Yensa. 32 Panakaan an áamak ban Atijamit panakaan kareesool Añiilau ati Atijamit Afaŋumi Katebo. Akiiyaau Atijamit panakaanool áyi, nan man akaaneenumi afannaaniŋool áyiau Dauda, 33 ban panarung úwoloorumaw wati Yankuba bee bándoorey, di poop jáyiaj joola leejiban!” 34 Mariyaama naceeŋumi maleekaay, “Jé! Mo’omu buu paŋŋoolen kaan di ínje, bamanjut ániine?” 35 Maleekaay di elaañenoomi man yoonoomi, “Búyegetab Bátienaab pambulako di au, ban kánkumak kati Akiiyaau Afaŋumi Katebo pánkuyini nan bíinaat di au. Mati mo’omu, añiilau álirooraau aatumi ewoliey pankuwonkool, Añiilau ati Atijamit. 36 Asupaapi Elisabet, oo poop oomu di búrooko bati añiil ániine, hani moo bafanlenerab. Oo ansi kooneenumi amanjut fufaan, bare iñeme oomu di búrooko bati kuleeŋ futok di fákon! 37 Mati bajut wan Atijamit ayetut akaan.” 38 Mariyaama nammi, “Ínje amiiceelau ati Akiiyaau, mbi kaan di ínje, nan man furimi furegumi eeno.” Maleekaay di ekatumi bálamuk. 39 Nan piyoutumi mo’omu, Mariyaama najawumi di buliim kajaaburuŋ bee di ésuk yati Yúdea ban meeŋumi kuremboor. 40 Nan áriiŋubomi nanokenumi di eluupey yati Jakaria, man asaafumi Elisabet. 41 Nan Elisabet ajammi kasaafak kati Mariyaama, añiilau ammi di farool nagoroorumi. Elisabet nameeŋenimi di Búyegetab Bátienaab 42 man acibulomi, “Hé! Mariyaama, Atijamit nasenisen kásuumaayak koola wuuj kuseekak búrom! Ban kásuumaayak kukila kooku di añiilau an ootumi ebajey! 43 Kama buu nire’e ibaj karuuken kaanoe mo’omu, man iñaayaau ati Akiiyaom abil ejukom? 44 Ínje yaŋ di ejamey kasaafi ceb, añiilau ammi di farom nagoroorumi di kásuumaay káamak. 45 Jakijak mati áyinenumi wan Akiiyaau aregimi panukaan malegen!” 46 Mariyaama nalaañenoomi, “Hé! Akiiyaau, yuutom élebienilebien mati mákalaam mooli, 47 ban búyegetom boobu di kamaayoor di Atijamit Apakenaom, 48 mati di búyegetool ájimoorutom, ájimoorutom amiiceelaool awalenooromi. Káŋarum iñeme úwoloorum bee di úwoloorum pankoonom jakijak, 49 mati oo Atijamit ati Kánkum, nakankaan waaf wáamak bee di ínje, ban malegen kareesool Álirooraau Ákonau. 50 Náyiiseneyiisen kabonketak koola bee di kálebienoomi káŋarum úwoloorum bee di úwoloorum. 51 Nakankaan mukaanaay mabaje kánkum káamak ñátum uñenool, man afasikenumi ká’aamakalenooremi. 52 Nawalenumi kúyi kati kánkum di sijunkutiil sati jáyiaj jooliil, bare kawalenomi natebeniimi bee fatiya. 53 Kabajutumi naseniil waaf wajake, bare kabajumi nacesooriil man kujaw uñen útiikaar. 54 Narambenramben wulaal, bukanak kati Isirael koo kurokaool, ájimoorut di káyiisen kabonketak koola, 55 nan man áligeenumi mo’omu di afannaaniŋolaal, Iburehima di úwoloorumaw woola búrom bee bándoorey.” 56 Mariyaama nalakomi bati Elisabet wáriiŋe kuleeŋ kúfeegiir mbi kiti alaañ bóot. 57 Nan funakaf fati Elisabet eroŋey yoola fúriiŋumi, naroŋumi jiñiil jíniine. 58 Kulaoorool di kukiloorool di kujammi mati Akiiyaau náyiiseneenooyiisen kabonket káamak, di kulakomi kamaayoorak di oo. 59 Nan funakaf futokey di fúfeegintenaf fúriiŋumi di kubilumi bee etampool, noo kumaŋeemmaŋ bee ekaanool kareesak kati ampaool Jakaria. 60 Bare iñaayool nammi, “A’a, lee mo! Kareesool pankuwonkool Yaaya!” 61 Di koonoomi, “Bare bajut an di kukiloori abaje karees kaanoe mo!” 62 Di kukammi káyiisen ampaool di eceeŋ, man kumanj kareesak kan amaŋumi ekaan añoolool. 63 Jakaria nammi kusenool tampi aciikukomi, ñaa naciikumi, “Kareesool Yaaya.” Ban koo búrom di wáaloiimi máamak. 64 Yaŋ too galab Atijamit nakaanoomi man aŋoolen asanken inki, nataatumi kasankenak, di esaley Atijamit. 65 Kulaoorool búrom saalas sooliil di sijisumi wáj. Bukanak kammi di kapanak kati Yúdea mofam mameeŋumi kuremboor di kulakomi kasankenak mati mukaanaam ume búrom. 66 Anoosani ajammi mo’omu di wáalo’oomi di kuceeŋooromi, “Kama añiilau ume, buu naate kaano?” Mati kañenak kati kánkumak kati Akiiyaau, kulakoeenlako di oo. 67 Jakaria, añiilau ampaool, di Búyegetab Bátienaab bookoomi, ñaa náriiŋenumi kamanjenak kati furimaf, di aaney, 68 “Kasalak kooku di Akiiyaau Atijamit ati Isirael, mati najawulojaw bee kapakenolaal, wulaal kakammi bukanool. 69 Oo naboñulolaaboñ Apakena áamak ati kánkum, kápurumul di fiilaf fati arokaool Dauda, 70 nan man áligeenolaami kápurumul di kuboñaool kálirooraak kati noo, 71 mati panapakenolaal di kulatoorolaal ban poop di kánkumak kati kalatolaami búrom. 72 Nammi pánayiisen kabonketak koola, di poop létajimurer kasofoorool kálirooraak. 73 Nababaat bee di afannaaniŋolaal Iburehima 74 mati panapakenolaal di uñenaw wati kulatoorolaal, mambi uŋoolenaal umiiceelaetool bákoliut, 75 manteer mbi úlirooraal ban nujoonaal kamiiceelaetool di bújonlenab boola di kunakak kati eroŋey yoololaal búrom. 76 Au, añoolom, pankuwonki aboña ati Atijamit Afaŋumi Katebo, mati au panuyab fácul Akiiyaau bee kajoonen buruŋool. 77 Panureg bukanool mati Atijamit pánapakenumiil di kabonketak kati majakutiil. 78 Mati Atijamit oololaal nababaj kabonket káamak ban násunsuum, panakaan an man árajulolaal nan mawuŋ, mawuŋ maanomi nan bala’ab búyitoeuumi wulaal di fatiya 79 bee esen mawuŋam kammi di érim di poop kammi di buruŋab bati ecetey, bee erungolaal kútaagulak koololaal di buruŋ bati kásuumaayak.” 80 Añiilau Yaaya nabaakumi, nabilumi akaan ápura áliŋe di búyeget balegen. Nan anifaanomi nacinumi di baŋaanab bee nampi funakaf fan Atijamit áyiisenoomi bee di bukanak kati Isirael.
