YOHAN 9

1Nan Yensa alakomi ewuujey, najukumi ániine ápuume biñoo nan awolimi. 2Kuriibaool di kuceeŋoomi, “Raabi, wau kaane ániinaau ume man awolimi bápuume? Ai akammi majakut, manteer ániinaau umu mba kuwolaool?” 3Yensa nalaañeniimi, “Kaanut ániinaau umu akammi majakut, mba kuwolaool kukammi man ápuum. Bare nawoliwol bápuume manteer mbi kánkumak kati Atijamit kúyiiseni di oo. 4Di bala’ab, wulaal ootaale erok burokab bati áboñulammi. Fukaf foofu di ebil nan an aatut erok. 5Bare nan ínje emmi baabe di dúniyaay, ínje eenomi mawuŋam bee di dúniyaay.” 6Nan aregumi mo’omu aban, Yensa nalacumi tentaam man ásulenumi mof man ájoonenummi jikap, nanaanenjomi di kúcilak kati ániinaau, 7ban naanoomi, “Jaw, tíubuulo di furalaaf fati Siloam” (yoo eenomi Aboñimi). Ñaa ániinaau najawumi tíabuulomi, nalaañumi bajukerab! 8Kulaoorool di kuceen kajukeenoomi nan alawa, di kommi, “Ume lee ániinaau ákonau an ujukaalemi di elawey sadaa?” 9Bukaaku di kommi, “Akila,” bukaaku di kommi, “A’a, oo buyesoor.” Nammi, “Ínje akila.” 10Di kuceeŋoomi, “Kama buu nukaane man uŋoolen ujuk?” 11Nalaañeniimi, “Ániinaau an kuwonkemi Yensa ajoonenumi jikap ban nanaanenjomi kúcilom aban, naanammi, ‘Jaw bee di furalaaf fati Siloam tíubuulo’, ñaa nijawumi íbuulomi, iñeme niŋooleŋŋoolen ijuk waj!” 12Di kuceeŋoomi, “Oo oomei?” Nalaañeniimi, “Imanjut.” 13Di kújeetumulomi ániinaau ápuumeenumi no’ona bee di Kufarisaak. 14Funakaf fureooreoor di funakaf fati kálebienak nan Yensa ajoonenumi jikapaj man kúcilool kuŋoolen kujuk. 15Kufarisaak di kuceeŋoomi buu ápuumeenumi aŋoolenumi ajuk iñeme, ban nalaañeniimi, “Nanaanenammi jikap di kúcilom ban níbuulomi iban niŋoolen ijuk waj!” 16Kufarisa kuceen di kommi, “Ániinaau umu Yensa ápurumulout di Atijamit, mati oo náyuyuur élingaay yati funakaf fati kálebienak.” Bare bukaaku di kommi, “Buu paŋŋoolen kaan man ániine akaana majakut aŋoolene akaan wajamurerutimi nan mo’omu?” Kájamoraati di kuyitoulo titooriil. 17Ñaa di kuceeŋumi ániinaau ápuumeenumi, “Waa nusofumi mati ániinaau akaaneenimi man uŋoolen ujuk?” Nalaañeniimi, “Oo aboña ati Atijamit.” 18Kurungaak kati Kúyahuudak kumaŋut kufium mati oo ápumeenumi bare naŋooleŋŋoolen ajuk iñeme, di kuwonkulomi kuwolaak koola. 19Di kuceeŋiimi, “Mante umu eenomi añooluul? An jommi oo awolimi bápuume? Kama buu naŋoolene ajuk iñeme?” 20Kuwolaool di kulaañeniimi, “Wúli numammanj umu áñoololi, oo awolimi bápuumeene. 21Bare wúli umanjut buu kaane najuk iñeme mba ai akaane man ajuk. Jiceeŋool, oo let añiil, panaŋoolen aregooro.” 22Kuwolaool kurereg mo’omu mati kúkolikoli kurungaak kati Kúyahuudak, bukoo kujamoojamoor kuban, mati anoosani afelumi búyegetool man areg ban nafium mati Yensa eenomi Apakenaau Áamakau, oo naate kacesoori di fukobaf. 23Moo kaane di kommi, “Oo let añiil, panaŋoolen aregooro. Jiceeŋool.” 24Di kulaañumi kúwonkul ániinaau ápuumeenumi man koonoomi, “Baat kabaat di Atijamit man ureg malegenam! Wúli numammanj mati ániinaau asontenimi akaana majakut.” 25Ániinaau nalaañeniimi, “Ínje imanjut manteer oo akaana majakut. Bare wan imanjumi, woo eenomi noo nípuumeempuum, iñeme niŋooleŋŋoolen ijuk waj!” 26Di kuceeŋoomi, “Waa nakammi di au? Buu nakammi man uŋoolen ujuk?” 27Ániinaau nalaañeniimi, “Ínje nireguureg iban, ban jimaŋut bee ejam. Kama wau kaane di jimaŋ bee ejam inki? Mante jimammaŋ poop bee ekaan kuriibaool?” 28Di kujeloomi máamak, man koonoomi, “Au ariibaau ati ániinaau akila, bare wúli kuriibaak kati Muusa. 29Wúli tíenolitien mati Atijamit nasankensanken di Muusa, bare hani wúli umanjut ániinaau umu bei nápurumulomi.” 30Ániinaau nalaañeniimi, “Há, mo’omu kankaan waaf wáwaaloe! Jimanjut bei nápurumulo, bare nasontenammi man iŋoolen ijuk! 31Wúli numammanj mati Atijamit áyenteneriit kukaana majakut, bare náyenteneyenten anoosani amiiceelaetool ban nakaan wan amaŋumi. 32Biñoo di fúcitumaf fati dúniyaay, an ajamurerut jáng mati an akaane ániine awolimi bápuume man aŋoolen ajuk. 33Kaaneenjaat ániinaau umu ápurumulout di Atijamit, letaŋooleneen akaan waaf wanokoore nan mo’omu.” 34Di kulaañenoomi, “Au nuwoliwol di majakut! Mante nusosof panuŋoolen úliikitenoli waaf?” Di kufafarenoomi man ápur bee téeŋey yati fukobaf. 35Yensa najammi wabajoeenumi, najawumi atookool man aceeŋoomi, “Mante nufiunfium di Añiilau ati anau?” 36Ániinaau nalaañenoomi, “Arungaau, uregom oo ai, mambi ínje íyinenool.” 37Yensa naanoomi, “Au nujukoojuk uban, oo aaññaa kasankenak di au iñeme!” 38Ániinaau naanoomi, “Akiiyaau, ínje nifiunfium!” Aban nalomi kúfima man amiiceelaetoomi. 39Yensa naanoomi, “Ínje íjawumulomi bee kagamen bukanak kati dúniyaay uye, manteer kájukeriitumi mbi kujuk, ban kajukemi mbi kúpuum.” 40Kufarisaak kuceenak kalofoomi pef di kujammomi, man kuceeŋoomi, “Mante noone wúli núpumpuum?” 41Yensa nalaañeniimi, “Kaanjaat muyuul jípumpuum, an letaŋoolen ataakenuul mati jikankaan majakut. Bare iñeme joone jijukejuk, ñaa an panaŋoolen ataakenuul mati jikankaan majakut.”

will be added

X\