YANKUBA 5

1Muyuul kubajaak, jíyentenom! Jíruuren di jíciiŋit mati búyiikab baatumi ebiley bee di muyuul! 2Fubajaf fooluul fukañokaño ban bulol busosof wañuul. 3Sánaay di gódiforaay yooluul komoŋey esosof búrom. Komoŋey yo’oyu páneyiisen wajakutaw wan jikaaneenumi ban paneri siniiluul nan sambun. Bare muyuul karulen di etafey kubajak kooluul bee mati kunakak kúlamukaak kati eroŋey yooluul. 4Jijanten! Bacaamab, ban jilatumi ecaamey bee di karokuumi, boo boobu bo báruurene bee di muyuul. Búruudenab bati kujalaak búrindiiŋ bati Akiiyaau ati Kánkum. 5Jicincin baabe di dúniyaay di eroŋ yásuume di ekaan wásuumuumi. Jiriri man jiruuk nan sínukuruŋ bee mo di funakaf fan jootumi káraamuliak. 6Jífirenfiren ban di jibuj kajoonaak, kabajutumi kánkum kati kapakenooro. 7Kutiom, muyuul joote kamuuten, bee nampi Akiiyaau alaañulomi. Jíyenten, awañaau panaluk man akoben muriaam mabajumi fúkaw mati tentaam, panamuuten biñoo mumelam mútiyaaram bee di múlamukaam. 8Muyuul poop joote kamuuten ban di jibeben mati ebiley yati Akiiyaau elolof. 9Kutiom, takum jíkuumoor titooruul, jikammojaat panjigameni. Jíyenten, Agamenaau oomu man ajuume akobenuul di utumuul. 10Kutiom, muyuul joote ekaan nan man kuboñaak káriiŋenumi kareesak kati Akiiyaau Atijamit kukaaneenumi eeno. Buku kumuutemmuuten di bugaalab. 11Noonaalesoon koo jakiijak mati kumuutemmuuten di bugaalab. Nujamaajam man Yuuba amuuteneenumi eeno di bugaalab, ban nujamaajam nan púrutomi buu Atijamit Akiiyaau akaaneenumi di oo. Mati namemmeeŋ di kabonket di poop káboteni káamak. 12Kutiom, di mo’omu búrom takum jipuun man jibaat ñátum di bukinab bajakaab di ñátum di dúniyaay uye, mba ñátum di ubaat uceen. Éey yooluul ekaan éey mba a’a yooluul di ekaan a’a, manteer takumbi jigameni. 13Mante aceen di muyuul abaje bugaal? Aate elaw. Mante aceen abaje kásuumaak? Aate écim úcimaw man asal Atijamit. 14Mante aceen di muyuul áju’ut? Aate eboñ ewonk kunifaanak kati di fujojaf fati kuriibaak, kaatumi elawool koote kanaanen túleey di fúkaaf foola di kareesak kati Akiiyaau. 15Kúlawak kooliil kakaanemi di káyinen pankusonten káju’utumi. Akiiyaau panayitenool, ban kaanjaat nakaaneenkaan majakut, panabonketi. 16Moo kaane jifel úyegetuul man jiregoor wan jikammi wajakutaw ban di jilawoor, mambi Atijamit asontenuul. Kúlawak kati an ajoone kubabaj kánkum káamak ban di kúlirenuko. 17Eliya nakaaneenkaan anau nan wulaal. Nalalaw di kánkum káamak takum emitey elub, ban wáriiŋe simit sífeegiir di bútingum elubut. 18Ban nalaañumi alaw, di elubumi ban muriaam di muliil. 19Kutiom, ampi ápurumi di buruŋab balegenab bati Atijamit mbi apaalool ágaawulool, 20jiwoolo mati uwe, ampi akammi man akaana majakut atiiwoor akat majakutam mukila, namanj mati panapakenool di ecetey man majakutool majuupoe manoosani mubonketi.

will be added

X\