YANKUBA 4

1Bei mulobaam di futiikaf titooruul sípurumeuumi? Mante lee di emaŋey yooluul yajakutey yátiikeneuumi nanoosani di úyegetuul? 2Jimammaŋ ebaj bare jibajut, ñaa di jibuj an. Di jibaj búlat di wan bukaaku kukilumi ban jiŋoolenut jibajuwo, ban jiyiten mulobaam man jitiik. Jibajut wan jimaŋumi, mati jilawut Atijamit. 3Kuceen di muyuul kalawumi Atijamit ban kubajut, mati kúlaweriit jak, wan kúlawumemi roo búrom bee wásuumiimi ceb. 4Muyuul kafiumutumi Atijamit! Mante jimanjut mati bapaalaayab di dúniyaay moo kakatoor di Atijamit? Moo kaane anoosani amaŋumi bapaalaayab di dúniyaay oo alatoora ati Atijamit. 5Mba mante jisosof mati malegenam mulee di furimaf fati Atijamit fammi, “Búyegetab Bátienaab ban Atijamit akammi di wulaal man ubajaal fuuñ fati ekaan kufiumaay.”? 6Bare Atijamit panafaŋ man áyiisenolaal majakam moola. Nan man furimaf fati Atijamit furegumi foone, “Atijamit nalatelat ká’aamakalenooremi, bare náyiiseneyiisen majakam moola bee di kawalenooroemi.” 7Moo kaane jisen kúkouul bee di Atijamit. Jilat Seetaanaay moo panetey éloiuul. 8Jilof Atijamit, oo poop panalofuul. Jipos uñenuul, muyuul kukaanaak majakutam. Jítilul úyegetuul, muyuul kabajumi úyeget ugaba. 9Jibotenoor, jíruuren ban jisuuŋut. Karenkenak kooluul di kulaañ búruuren, man kamaayoorak kooluul kulaañ kabotenelenoor. 10Jiwalenooro di bújonlenab bati Akiiyaau Atijamit, moo panatebenuul fatiyaay. 11Kutiom, takum jikajenoor urees. Anoosani akajenumi atiool karees mba agamenoomi, moo sílingaas sati Atijamit nakajene ban nagamenuso. Bare ugamenjaat sílingaas use, au lee akaana wan sílingaas siregumi bare nukankaan agamenaso. 12Atijamit ceb asenemi sílingaas use, oo poop agamenemi. Oo ceb aŋoolenumi ápakenoli ban poop naŋoolen ákajenoli. Bare kamañaa au, ai aŋoolenumi agamen alaoori? 13Jíyenten, muyuul kaanemi, “Jaat mba kajom panuja’aal bee di ésuk yiceen uye mba uya mbi ulakoaal bo emit yákon, ban nukaanaal bo funoom di kanoomen manteer mbi ubajaal búrembenab.” 14Bare pipi jimanjut eroŋey yooluul kajom buu yoote kanokoor! Joonojoono nan kamon karajulo leekupiyo di kújim meej. 15Wan jootumi ereg woo emmi, “Súumujaat di Akiiyaau, panuroŋaal panukaanaal uwe mba uwa!” 16Bare muyuul ká’aamakalenooremi man jisanken nan jimammanj wábileuumi. Ká’aamakalenoorak ko’oku koonokoono nan mukaana majakut. 17Moo, anoosani amanjumi majakam man aatumi ekaan ban akaanutumo, oo nakankaan majakut. o, oo nakankaan majakut.

will be added

X\