YANKUBA 3

1Kutiom, kajuupoe di muyuul takum jimaŋ di ekaan kuliikitena. Nan man jimanjumi mati wulaal kaliikitenemi ootaale efaŋ man ubajaale kagamen kátaañie wuuj bukaaku búrom. 2Wulaal búrom nuloaalelo di uruŋ wajuupoe. Bare anoosani aloutujaat di wan asankenemi, oo nálirooliroor ban naŋoolen asofooro funkool búrom. 3Ulaabaajaat epilingey man ukaanaal yo man ekaan wan umaŋaami mo panuŋoolenaal ookenaal funkaf fooliyo búrom. 4Jijiker busaanaab báamakab poop. Moo manoosani búkalaakalaa ban fárusaf fupentenepenten bo, banoosani man butey, bare ñátum di éweenuma yatiitie yan ateyenaau alakomi di fulamaf panaŋomenubo nan man amaŋumi eeno. 5Moo mákonam, fúredimpaf foo fufaŋumi man futiitie di upanaw wati eniiley, bare foo furegemi waaf wáamak. Jipemb jati sambun jíyabeneuumi karamba káamak! 6Fúredimpaf fukankaan nan sambun. Kánkumak kati májakaataam kammi di fo, pankuŋoolen kusiken eniiley yoololaal búrom ban di kureemen eroŋey yoololaal búrom ñátum di sambunas sáceteriitumi. 7Anau naŋooleŋŋoolen akur sínukuruŋas man sijamool: sínukuruŋ sati karambaak, di bánaakayita, di wáfulooremi di siwolas. Ban nakukur ro eeno mo. 8Bare bajurerut an ampi aŋoolen akur fúredimpaf. Foo fúyooloeriit di májakaataam, ban foo fumemmeeŋ di busik. 9Ñátum di fo nusalaalemi Ampaolaal Akiiyaau, ñátum di fo fákonaf poop nunumaalemi bukanak, kan Atijamit atuukumi di búyesoorab boola. 10Kápurumul di butumab bákonab nusalaalemi Atijamit ban nunumaalemi bukanak. Kutiom, mo’omu anau aatut ekammo. 11Mante ébulaay yákoney paneŋoolen épurenuul tákonat mumel másuume di mafire? 12Kutiom, mante búpunduun pambuwol kuwoliiw mba búbaar buwoliiw pambuwol kuwoliiw? Leeŋoolen kaan man ébulaay yati mumel mafire épurenul mumel másuume. 13Ai di muyuul abaje malinlaam mba kálaulak? Áyiisen bakaanerool ñátum di eroŋey yoola yajakaay di kawalenooro kájawumulomi di malinlaam di bakaanerool búrom. 14Bare jibajujaat búlat báamak di emaŋey yati kabotoorak di eyab fácul di úyegetuul takum jitebenelenooro ban di jimoos malegenam. 15Malinlaam mo’omu múpurumulout di bukinab bajakaab, bare mati bukanak kati dúniyaay, mati Seetaanaay. 16Mati tanootani búlatab di emaŋey yati kabotoorak eloey fácul, too pambaj kájiisoor di májakaati manoosani. 17Bare malinlaam mápurumulomi di Atijamit, moo kásuumaay, kamuuten, kajinlen, káwambulo úyeget, kabonket káriiŋe, di mukaana majake, ban múpajuloeriit mba kalegenoe nanoosani. 18Kafokemi sambun titoorey yati bukanak kukankaan nan kuwaña kulegen kalukemi kásuumaay ban di kujal majake.

will be added

X\