YANKUBA 2

1Kutiom, takum jípajul bukanak, muyuul nan man jookumiñaa káyinenak Akiiyaolaal Yensa Apakenaau Áamakau, Akiiyaau ati mawuŋam. 2Kaanjaat ániine aceen akaanoe músupa mati sáni ban nakaroor wañ walegen abile bee di fujojaf fooluul, di poop ániine aleke abile bee di fo man akaanoe kaloaay kati furookal. 3Ñaa di jijuumen úyegetuul di akaroorumi jak wañaw walegenaw ban di joon, “Bonket bil ulako taate.” Ban di joon alekaau, “Juum uba,” mba, “Lako tentaamey ulof úkamunom,” 4mante lee mo jípajuloopajuloor titooruul, ban di jikaan kugamena kati kawoonoor kajakut? 5Jíyentenom, kutiom kati búsusom. Mante lee Atijamit oo di fúko’ool amukenumi kalekumi di dúniyaay uye, mambi akaaniil kubaja di káyinenak, ban nakaaniil kuyaba bulaañab bati jáyiaj joola, nan man áligeenumi kamaŋoomi? 6Bare muyuul jiheelenemi kalekumi! Kámingeneuumi man kuruueuumi bee di kugamenaak, bukoo lee kubajaak? 7Mante lee bukoo di kúkoiil kasankeneñaa ñíi kareesak kalegenak kan jiwonkumi. 8Jisofujaat jak sílingaas sati jáyiaj jati Atijamit di furimaf fati Atijamit foone, “Noote emaŋ alaoori nan man umaŋumi fúkoi eeno.” Moo malegen jikaane. 9Bare jípajuloorujaat, moo emmi jikankaan majakut, ban sílingaas sisofuusof mati jítataasuso. 10Ampi akammi wan sílingaas siregumi búrom ban nalo di yákon ceb, moo oo nalolo di soo búrom. 11Mati Atijamit ammi, “Takum usang aseek mba ániine ati an,” oo ammi poop, “Takum ubuj an.” Usangutujaat di aseek mba di ániine ati an bare nukaan abuja, au nútataas sílingaas búrom. 12Moo jisanken ban di jikaan nan bukan kaate kagameni ñátum di sílingaas so’osu sampi sapakenolaami di majakutam. 13Mati di funakaf fati kagamenak Atijamit letabonket anoosani ábonketeriitumi bukaaku, bare hani di funakaf fati kagamenak Atijamit pánayiisen abonketemi bukaaku. 14Kutiom, kama waa baje fúkaw, anau aanjaat nababaj káyinen ban áyiisenut ko di bakaanerool? Mante káyinenak kaanomi mo’omu pankuŋoolen kupakenool room? 15Kaanjaat ati’i mba áliini ariiba mutugen musofe mba abajut wampi ari funakoofunak, 16ákon di muyuul naanool, “Ukatooraal, jaw di kásuumaay, mbi ukaano jak ban nuri upooñ tep,” basenutool wan ceeŋumi man abaj di eroŋey yoola. Waa jakumi di kasankenak mo’omu? 17Moo mákonam, kammi di káyinenak kariiboorutumi di bakaanerab ban Atijamit aregumi, koo káyinen kacete dak. 18Bare aceen panaane, “Au nubabaj káyinen, ínje nibabaj bakaaner.” No’onu ínje paneene, “Yíisom káyinenak kooli kariiboorutumi di bakaanerab man ínje íyiiseni káyinenak kúmboom ñátum di bakaanerab. 19Núyinenyinen mati Atijamit ákon ceb abajoe pat, moo jajak. Hani úgunaw úyinenyinen mo ban di úkoli di kaleleben. 20Au áliŋutumi di káyinenak, mante numammaŋ man íyiisi, mati káyinenak káyiisenutumi bakaanerab, koo káyinen kacete? 21Mante lee afannaaniŋolaal Iburehima Atijamit asofumi an ajoone ñátum di bakaanerab boola? Mati nájeetunjeetum añoolool Siyaaka bee ekaaneenool búsimen di fúsimenaf bee kálebien Atijamit. 22Nujujuk mati káyinenak koola di bakaanerab siriibooriiboor ban káyinenak koola di kukammi káliroore ñátum di wan akaanumi. 23Ban wan kuciikumi Furimaf fati Atijamit di ukaanimi fúliroor di aaney, “Iburehima náyinenyinen Atijamit, moo kaane nasofoomi nan an ajoone.” Ban Iburehima nabilumi akaan Atijamit apaalool. 24Nujukaajuk mati Atijamit nasofesof an najonjoon ñátum di bakaanerab boola bare lee mati káyinenak ceb. 25Lee di moo mákonam, Atijamit asofumi poop aseek ayenetaau Rahab an ajoone ñátum di bakaanerab boola? Mati Rahab nawalenwalen kúmeeloaak kan Kuyisiraelak kuboñeenumi, fugoogo aban naseniil buruŋ buceen man kupak? 26Nan man eniiley yabajutumi yuutey ekammi eniil yacete, moo mákonam, káyinenak kariiboorutumi di bakaanerab kukammi káyinen kacete. boorutumi di bakaanerab kukammi káyinen kacete.

will be added

X\