YANKUBA 1

1Ínje Yankuba, amiiceel ati Atijamit di ati Akiiyaau Yensa Apakenaau Áamakau, eem di eciik letaraay uye. Kasaafoorak bee di kuriibaak kati Yensa kan eenomi kiilak uñeney di kugabaak kafasoorumi di mofam búrom. 2Kutiom, jisofooro nan muyuul jakuujak nampi jommi di bugaal di kayinkoor, táañi manoosani. 3Mati jimammanj nan jommi di bugaalab bukila, ban di jiroŋ man jíyinene di Akiiyaau Yensa nan no’ona, mo’omu múŋareuumi man jibaj kamuuten. 4Bare joote kamuuten manoosani, mambi jikaan bukan kalegenoe ban di kúliroor, babajut warinoe di muyuul. 5Ampi abajutumi malinlaam, mbi alaw Atijamit, panasenool báfirenutool, ban panasenool mo. 6Bare nampi alawumi aate káyinen ban takumbi abaj úyeget ugaba. Mati anoosani abajuwomi oo nakankaan nan lonkos yati fal fáamak yanagemi banoosani. 7An akila aatut esof panabaj waaf di Akiiyaau Atijamit hani jasiinkun. 8Oo nababaj úyeget ugaba nanoosani ban abajut tan asofe. 9Ariibaau ati Yensa awalenooromi aate kamaayoor, man Atijamit atebenoomi. 10Bare ariibaau ati Yensa abajumi aate kamaayoor man Atijamit awalenoomi. Oo pánajim nan man búrumpenab buyoŋoemi. 11Bala’ab buraberab man búboli wút man bukaan mafosam mulalaben, ban búrumpenab di buyoŋen ban majakam moolibo di mukaño jaj. Moo mákonam, abajaau pánajim meej bee bándoorey ñátum di kaliiliwoorak koola. 12Ampi amuutenumi di kayinkoorak di bugaal panjakool, mati nampi púrutomi panabaj bacaamab bati eroŋey yan Atijamit áligumi bee di kamaŋoomi búrom. 13Nampi kayinkoorak kubilumi mo’omu bee di an takum aane, “Atijamit ayinkaam”, mati Atijamit an letaŋoolen ayinkool man akaan waaf wajakut di poop oo di fuko’ool áyinkeriit an. 14Bare anoosani nayinkeiyink ñátum di emaŋey yoola ekaaney majakutam esofeoomi eruuool bee di mo. 15Emaŋey yajakutey yoola ewolenemi majakutam, majakutam múliipujaat, moo múŋareuumi ecetey. 16Kutiom kati di búsusom, takum jimaŋ man kubuntuul. 17Kawul kanoosani kajake di káliroore koo búrom kújawumulojawum bati Ampaolaal Atijamit, atuukumi mawuŋam manoosani di bukinab bajakaab. Oo áruŋulooreriit nan kañoogoon. 18Oo di fúko’ool amaŋe man akaanolaal ubajaal eroŋey yalegenaay, yajawulomi ñátum di furimaf foola fati malegenam. Nakankaan mo’omu mambi uŋoolenaal ukaanaal kútiyaar kati butuukab búrom. 19Kutiom kati di búsusom, jiwoolo uwe anoosani aate kawaaken di káyenten, bare takum awaaken kasanken, takum abaj fuuñ galab. 20Mati kañuumulak kati anau kúŋareriit mukaanaam maanomi nan man Atijamit amaŋumi. 21Moo kaane mbi jikat bálamuk mukaana masikoe manoosani manaamutumi búrom, ban poop mukaana májakaatie manoosani. Jiwalenooro man jisof furimaf fan Atijamit akammi di úyegetuul, manteer di fuŋoolen fupaken suutas sooluul. 22Jikaan kukaana wan furimaf fati Atijamit furegumi! Takum jibuntooro man jire di káyentenak fo ceb. 23Ampi áyentenufomi ban ákaaneriit wan furegumi, oo naanosaano nan anau ammi kajuudooro. 24Nakooñaamooro jak aban nakat bálamuk, yaŋ too galab nájim man aanomi eeno. 25Bare anau ákaanumumi jak sílingaas sálirooraas sati Atijamit, sabajumi kánkum bee kapaken bukanak, aban nasofuyo lit. Ampi areutumi di káyentenak ceb ban nájim, bare nakammi wan siregumi. O’omu panjakool di wanoosani wan akaanemi búrom. 26Ampi asofooromi oo an ati buruŋab bati Atijamit ban aŋoolenut asof butumool, oo kabuntooro ban buruŋab boola bubajut fúkaw. 27Kariibenak buruŋab balegenab di bálirooraab di bújonlenab bati Ampaolaal Atijamit koo emmi buke: kacookoorak kati kúsukateen di kuseek kati kújima di bugaalab booliil, di poop káloienak kúkoiil takum majakutam mati dúniyaay uye mukaaniil kusiko.

will be added

X\