KÚHIBURAK 5

1Ásimena áamak anoosani amukenimi man aramben bukaaku di eseney kawulak di búsimenab booliil bee di Atijamit mati majakutiil. 2Akila aŋoolenumi abuntoor jak kamanjutumi di poop kañoosemi. Mati oo di fúko’ool nálaamolaamo nan kukila. 3Moo kaane naate esen búsimen, bee mati majakutool di fúkoumo di bee mati bukanak. 4An letaŋoolen asenooro kálebien man alako di fujuumaf fati ásimena áamak. Atijamit ceb awonkulomi akila, nan man awonkulomi Aaruna eeno. 5Moo mákonam, Apakenaau Áamakau asenoorout kálebien kukila man abil akaan ásimena áamak. Bare Atijamit amukenool, aanoomi, “Au Añoolom, jaat ínje di fúko’om eenomi ampai.” 6Atijamit nalaañ areg ticeen mati, “Au nukankaan ásimena áamak ati bándoorey, riiboor nan Melikisedek.” 7Nan Yensa alakomi baabe di dúniyaay, ninsi nalaw, naceeŋ di móro di búruurenab báamak Atijamit, aŋoolenumi apakenool di ecetey. Atijamit nayayab kúlawak koola, mati kákoliak kan abajumi bee di oo. 8Handeneen man akammi Añiilau ati Atijamit, naliikenumi ekaaney wan Atijamit amaŋumi kápurumul di bugaalab boola. 9Ñátum di mo’omu, Atijamit nakaanoomi Ásimena Áamak áliroore, ban nabilumi akaan múpakuma mati epakey yati bándoorey bee di bukanak búrom kakaanemi wan aregumi. 10Atijamit amukenoomi di ekaanool Ásimena Áamak riiboor nan fiilaf fati Melikisedek. 11Babaj wajuupoe wan oote ereguul mati mukaanaam ume. Bare mútaañitaañi bee efelumo mati jiwaakenut kálaul. 12Iñeme muyuul súm jooteene ekaan kuliikitena, bare hani bee iñeme cenceeŋ man jibaj aceen aate kaliikitenuul sílingaas sítiyaaras kápurumul di furimaf fati Atijamit. Cenceeŋ man jiraaf miil lee sinaaŋ. 13Anoosani ároŋumemi ñátum di miil, an akila fumanjaf foola fati furimaf fati majoonam fúloiut, mati oo añiil ceb oomu bo karaaf. 14Bare sinaaŋ kunifaan kukiluso, mati kaliikitenimi man kumanj majoonam di majoonutam.

will be added

X\