KÚHIBURAK 13

1Jirulen kamaŋoor nan man jikammi kuriibaak kati Akiiyaau. 2Takum jilat kawalenak kati kujaaburuŋ jak di sísindouul, mati di mo’omu kuceen kuwalenewalen simaleeka bamanjut. 3Jiwoolo kammi bakuleriab dán bukanak kukuleimi, nan muyuul di bukoo jinaamoonaamoor di bo. Jiwoolo kásuutukenimi, nan muyuul di bukoo jinaamoonaamoor di ko. 4Muyuul joote kálebien búyabaab, ban anoosani aate ere di aseekool mba ataool takum jisik bacaacab. Mati Atijamit panagamen kúraadia di kafintoemi kan kuyaboorutumi. 5Takum jijuumen úyegetuul di emaŋ yati sígodi, jire di wan jibajumi. Mati Atijamit naane, “Létipururer di au ban poop letikatureri bálamuk.” 6Moo kaane wulaal panuŋoolenaal uregaal di kágolum, “Akiiyaau eenomi arambenaom, ínje eetut kákoli, waa an aate kaŋoolen di ínje?” 7Takum jíjim kurungauul, kaliikitenuumi furimaf fati Atijamit. Jiwoolo buu kuroŋenumi eeno, ban jiriiben fútaagul fati di kafiumak kooliil. 8Yensa Apakenaau Áamakau oo eenomi ákonau fuken, jaat, bee bándoorey. 9Takum jimaŋ man kaliikitenak kati kabuntak kanoosani kariiboorutumi di furimaf fajakaaf kuñakuul bee di mafos. Mati kóyume man jíliŋeni sísigiruul ñátum di majakam mati Atijamit, lee ñátum di kariiben sílingaas sati mati muria. Kasofemi sílingaas use rambenutiil. 10Wulaal nubajaabaj fúsimen, fan umanje hani kúsimenaak kamiiceelaetumi éguutey kubajut bakooŋ man kuri bo. 11Ásimenaau áamakau ájeetummi fúsimaf fati sínukuruŋ bee di tan faŋumi man líroore nan búsimen bati majakut, bare sínukuruŋ sabujimi bee kareemeni téeŋey yati ban bukanak kucinumi. 12Mati mo’omu Yensa poop nababaj bugaal ban nacet téeŋey yati fúlamutaf fati ésukey man atilul bukanool ñátum di fúsimool. 13Moo kaane mbi jija’aal bee di oo ban ammi téeŋey ban bukanak kucinumi, man unaamooraal kapuñak koola. 14Mati baabe di dúniyaay wulaal ubajutaal ésuk yáamak yati ecin bee bándoorey, bare wulaal eñes ésukey yáamakey yaatumi bee ebiley. 15Ñátum di karambenak kati Yensa, mbi urulenaal di esal Atijamit nan búsimenolaal, boo eenomi eregey yati mákalaam mati kareesool di fáculey yati bukanak. 16Takum jiyoolo ekaaney majakam di poop kacaaboor di wan jibajumi, mati búsimenab bukila baanomi mo’omu búsuumesuum Atijamit. 17Jikob kurungauul ban di jisen kúkouul bee di bukoo. Burokiil boo eenomi epooy yati suutuul. Mati koo bukan kaate eceeŋi di burokiil. Jikatiil man kukaan di kásuumaay, lee di bugaalab. Kaanutumojaat leerambenuul. 18Mbi jirulen di élawoli, mati tíenolitien mati nubabaj úyeget wajoone, mati numammaŋ ekaaney waafaw wajoonaaw nanoosani. 19Ínje oomu di elaw máamak man jibenen kúlawak kooluul bee mati ínje manteer mbi Atijamit áboñulom bee di muyuul iñemeeñeme. 20Emitey ekaan Atijamit ati kásuumaay, aŋoolenumi ayitenulomi Akiiyaolaal Yensa di kacetumi, amataau áamakau ati sisahaas, ñátum di fúsimaf fati kasofoor kati bándoorey. 21Emitey ekaan Atijamit akaanuul jijonjoor di wanoosani wajakumi wan ceeŋumi mambi jikaan kamaŋak koola, ban mbi arok di muyuul man jikaan wampi wayeoomi kápurumul di kánkumak kati Yensa Apakenaau Áamakau. Mbi úlebienaal Apakenaau Áamakau bee bándoorey. 22Kutiom, nilawuulaw máamak man jíkaanum wan iregeuuñaa di letara yátemie yan íciikuluumi. 23Muyuul joote kálaul mati atiolaal Timoti kúkatenulookaten dán bukanak kukuleimi. Áriiŋaaliujaat baabe pambiubil síñakon bee ejukuuley. 24Jisaafom kurungauul di bukanak kati Atijamit búrom. Kápurulomi di mofam mati Italia poop kusaafuul. 25Emitey ekaan Atijamit awuluul majakam moola bee di muyuul búrom. Amen.

will be added

X\