KÚHIBURAK 12

1Mati wulaal, nubajaabaj kúyiisena kajuupoe kaŋoobenumi wulaal. Kama ñaa mbi úpurenaal wanoosani títiolaal kálaamoak di majakutam maŋoonolaami lit, mbi uteyaal di kamuuten kafannoorak kati jíteyaj jan kujuumenolaami. 2Wulaal ootaale kajuumen kúcilolaal di Yensa, mati oo ácitaau di álirenaau ati kafiumak koololaal. Namuutemmuuten kapuñak kati kafaaŋenoolak di ébaarey yati búpinab man acetumi. Wakammomi woo eenomi namammanj mati fáculey letapotoj. Ñaa iñeme oomu balakoe di báridab bati ejunkutey yati Atijamit. 3Uwoonooraal di wanoosani wan amuutenumi búlatab ban kukaana majakut kukaanoomi takumbi úyegetiil újiisoor man jilaañ bálamuk. 4Hani an ákon abujooruti di karaagalak kooluul mambi jipak di majakutuul. 5Mante ñaa jíjinjim furimaf fati kabuntoorak fan Atijamit asankenumi bee di muyuul, kuñoolool? Nammi, “Añoolom, takum jimoos kakurak kati Akiiyaau, ban takum úyeget újiisoor nampi alakomi emakuuley. 6Mati Akiiyaau nakurekur an amaŋumi, ban nateketek an asofumi nan añoolool.” 7Joote kamuuten kakurak kati Akiiyaau, mati Atijamit nasofeuusof nan kuñoolool. Añiil alee bo ampi ampaool aatut ekur? 8Kaanjaat muyuul bakate jikuruti, nan man kuñiilak koola búrom kukurimi, kama ñaa muyuul káatum ban muyuul lee kuñoolool. 9Benento, wulaal nubajaabaj kumpaak baabe di dúniyaay kakurolaami ban núlebienaaliimi. Mante letufaŋaal man usofaale líŋ Ampaolaal ammi di bukinab bajakaab akaaneolaami uroŋaal bee bándoorey. 10Kumpaolaal baabe di dúniyaay kukureolaakur di nan nátemie nan man kusofumi jajak. Bare Ampaolaal Atijamit oo nakureolaakur mambi rambenolaal, manteer mbi unaamooraal di káliroorak koola. 11Nan ubajaami kakurak, wulaal nusofaami koo kufaŋ man kútaañie kásuumaak. Bare di fáculey kakurimi ñátum di kútekak kaanoe mo’omu pankuŋar bacaam bati eroŋey yabajumi kásuumaay di man ukaanaal wajoone ban di ucinaal di kásuumaay. 12Moo kammi jijuum sem! Takum kújuuluul kuleleben. 13Jirulen di ejaay di buruŋ bajoone, kabakomi takumbi kufaŋ man kugaale, bare di kusonteni. 14Jipiinoor lit man jilako di kásuumaay di anoosani, ban jiñes man jiroŋ eroŋ yáliroore, mati anoosani áliroorutumi, letajuk Akiiyaau. 15Jíkaanum an takum ágaloor man ábajaati majakam mati Atijamit. Jíkaanum takum an aano nan kufaar kati búraan koote éŋaruley bugaal bajuupoe mampi kusiken eroŋey yati anoosani. 16Jíkaanum takum an akaan nan áraadia mba amanjutumi Atijamit nan Esau, anoomenumi fanifaanaetaf foola bee mati furi fákon ceb. 17Nan man jimanjumi eeno, di múlamukaam, handeneen namaŋeemaŋ bee eyab kawulak kati ampaool, náfirenimi. Mati bajut wan aate ekaan man mukaanaam múruŋuloor, handeneen man alawumi ampaool di búruurenab di bóro. 18Jíriiŋoorut, nan bukanak kati Isirael káriiŋumi, bee di waaf wan jiŋoolen jijuk ban di jigor, bee di fúlankiinaf fati Sinai tanat tan tabajumi bújeek bati sambun, di kurola kárimmi, di fárus, 19di kayelak kati kasiin, di kálintak kati furim. Bukanak di kujammi furimaf di fusanken. Bare di kulawumi Atijamit man akatubo takum asanken inki, 20mati kuŋoolenut kumuuten kájaatiken karegimi, “Kaanjaat hani énukuruŋ yákon egore fúlankiinaf yoote eleebi sikooba ecet.” 21Muusa wan kúcilak koola kujukumi ukoolenookoolen biyok aane, “Níkolikoli manteer insi ileleben.” 22Bare jíriiŋuloriiŋ di fúlankiinaf fati Sion, bee di ésukey yáamakey yati Atijamit aroŋaau, bee di Yerusalem yammi di bukinab bajakaab, ban simaleeka similimiliyoŋas sijojenoorumi tákon. 23Jijawulojaw bee di fujojaf fati kuñiilak kútiyaarak kati Atijamit, kan ureesiil uciikimi di bukinab bajakaab. Jijawulojaw bee di Atijamit fúko’ool, an eenomi agamenaau ati bukanak búrom di poop bee di kajoonaak kálirenimi. 24Jijawulojew bee di Yensa, atitooraau ati kasofoorak kunkulak, an fúsimool fusankenumi wafaŋumi man úkoyume fati Abel. 25Jíkaanum takum jilat ejamey furimaf fati ammi di kasankenuulak. Kalatumi káyentenak anau áriiŋenumi kurimak kápurumulomi di Atijamit bee di dúniyaay, kupakenut. Ulataajaat anau ammi di kasankenak kápurumulomi di bukinab bajakaab, ootutaal epak. 26No’onu furimaf fati Atijamit di fúliliŋenumi yentaam, bare iñemeñaa nálilig mati, “Bare ñaa pánililiŋen lee re dúniyaay cebuyo, bare bee mo bukinab bajakaab.” 27Furimaf ufe fati “Bare lee re,” wan fufelumi woo eenomi wanoosani wati dúniyaay pánuliliŋeni, man wáliliŋeneriitimi urino. 28Moo kaane usalaal Atijamit mati nuyabuloyab jáyi jaatut bee káliliŋeni, ban mbi usenool kamiiceelaetak kalegenoaak, ñátum di kálebienak di kákoliak. 29Atijamit oololaal sambun sareemenemi jaj.

will be added

X\