KÚHIBURAK 11

1Kafiumak kukaaneolaami tíenolaal mati wan úgolumaami, ban di kusenolaami káyiisenak kati wan uŋoolenutaami ujukooroaal. 2Mati kubabaj kafium, kufannaaniŋolaal kufiunfium Atijamit, náyiisenumi mati mooliil muyeoomi. 3Mati nubajaabaj kafium, núlaulaalaul mati Atijamit nátuukuntuukum dúniyaay ñátum di furimool, wan ujukaaleñaa úpurumulout di wan ootaale kaŋoolen ujukaal wo. 4Mati Abel nababaj kafium, nasenumi búsimen bee di Atijamit bafaŋumi man búriiŋe bati Kain. Atijamit di fúko’ool naŋarumi kawulak koola man áyiisen mati oo an ajoone. Handeneen Abel man acetumi nan piyoe, hani bee jaat nasankenesanken di wulaal mati kafiumak koola. 5Mati Enok nababaj kafium, naŋarimi bee di bukinab bajakaab, takumbi ajaken ecetey. Moo kaane an ajukut biiŋool, mati Atijamit aŋaroomi. Furimaf fati Atijamit fúyiisenolaayiisen mati bala’a Enok aŋarimi, nakaanekaan wayeumi Atijamit. 6Moo kaane kábajaataak kati kafiumak leekuŋoolen kukaan Atijamit man yeool. Mati anoosani ájo’ol alof di Atijamit naate abaj kafium mati nabajobajo ban oo asenumi kañeseoomi. 7Mati Nuha nababaj kafium koo kukaanoomi man áyenten wan Atijamit agamoomi mati waatumi kabajoak fácul wan aŋoolenutumi ajukooro. Nakammi wan Atijamit aregoomi, ban najoonenumi busaana, ban oo di aseekool kúpakumumi. Ñaa karinomi di dúniyaay búrom kúfirenimi, ban Atijamit nasofoomi an ajoone mati kafiumak koola. 8Mati Iburehima nababaj kafium, Iburehima nakankaan nan Atijamit awonkoomi man ajaw bee di mof múbuto man Atijamit áligumi esenool nan bulaañab boola, ban nápurumi ajaw bamanjut ban aate. 9Mati Iburehima nababaj kafium, nacinumi nan ajaaburuŋ di mofam mábutoaam man Atijamit áligeenoomi. Nacinumi di éguut, nan man Siyaaka di Yankuba kucineenumi di yo eeno, koo kuyabumi báligab bákonab di Atijamit. 10Iburehima nakankaan mo’omu, mati kúcilak koola kulakolako di ésukey yáamakey yan Atijamit di fúko’ool awoonoorumi ban nateepumi, yoo ebabaj kúlakenuma kati bándoorey. 11Mati Sirah nababaj kafium, oo di fúko’ool ayabumi kánkumak kati eŋarey búrooko, handeneen man afanlenumi remo. Nafiunfium Atijamit panakaan báligab boola. 12Moo kaane kápurumul di an ákon ceb, an moola mubanumi. Bare nabilumi abaj úwoloorum wajuupoe nan bootab bammi di kátula di poop nan kaluusak kammi di kafintak. 13Bukanak búrom kafiummi di Atijamit kucecet, bayabut wan áligeneeniimi. Bare di kulakomi kamaayoor nan man kujukuwomi kápurumul ban lóie. Ban di kusofooromi mati koo kujaaburuŋ ceb di poop kúkolokotoaak di dúniyaay uye. 14Bukanak kukila kasankenumi mo’omu kúyiisenyiisen mati koo kooku bo eñesey mof man umanje pankuŋoolen kukilumo. 15Kulakoeenjaat kawoonoor mati mofam man kúpurumulomi, moo pankubajeen buruŋ bee elaañ bóot. 16Bare, di kuraanomi mof muceen mákoyume, moo eenomi mof mati bukinab bajakaab. Moo kaane Atijamit apuñout man kuwonkool Atijamit ooliil, mati najooneniijoonen ésuk yáamak bee mati kukila. 17Mati Iburehima nababaj kafium, nan Atijamit ayinkoomi, nasensen añoolool Siyaaka nan búsimen. Iburehima nayabeenumi báligab, ban najonjoorumi bee esen añoolool ákonau. 18Handeneen Atijamit áligeenumi, “Siyaaka kápurumul di oo panubaj úwoloorumaw.” 19Iburehima tíenootien mati Atijamit naŋooleŋŋoolen ayiten bukanak koo baceterab kuban. Panuŋoolenaal uregaal, Iburehima malegen nayabuloyab Siyaaka di kacetumi. 20Mati Siyaaka nafiunfium Atijamit, ban nalawumi Atijamit man asen kásuumaayak bee di Yankuba di Esau bee mati kajom yooliil. 21Mati Yankuba nababaj kafium, nalawumi Atijamit man asen kásuumaayak bee di kuñoolool kúniinaak kati Esufa bala’a acet. Nároogomi di egoley éjaatoorumaay yoola ban namiiceelaetumi Atijamit. 22Mati Esufa nababaj kafium, bala’a acet nasankenumi mati elaañey yati Kuisiraelak kápurumul mofam mati Misira. Tíenootien mati mo’omu, nájaatikeniimi man kootumi ekaaney woolaw woola eeno. 23Mati kafiumak kukammi man Muusa kuwolaool kuyofoomi wáriiŋe kuleeŋ kúfeegiir. Kujujuk añiilau najooŋoojooŋoor máamak, kaanutiil kákoli wan áyiau aregumi kukaan. 24Mati Muusa nababaj kafium, nan anifaanomi, nalatumi man bukanak kuwonkool añiilau ati Firauna añoolool anaaraau. 25Namaŋumi man kunaamoorumi di kásuutukenak kati bukanak kati Atijamit kóyume ebaj kásuumaak kati majakut. 26Muusa namammanj tíen mati emaŋ man agaal mati Apakenaau Áamakau yoo ékoyume ekil fubajaf fati mofam mati Misira, mati kúcilool kulakolako di wan Atijamit aatumi bee ecaamooley. 27Mati kafiumak koola, Muusa nápurumi di mofam mati Misira, bákoliut kañuumulak kati áyiau. Narulenrulen di kamuuten di enen fúgolumool di Atijamit ájukeriitimi. 28Kafiumak koola poop kukaanoomi ninsi naruuken káaningak kati Ewuujey yati Njalayiri. Náliisenumi fúsimaf fati sínukuruŋ di ucegaw, takumbi Njalayiri ebuj kuñiilak kútiyaarak kúniinaak kati Isirael. 29Mati kafiumak kooliil, bukanak kujawumi kútipumumi ñátum úkamunaw bee di kapan kaaku kati Falaf Fáyemaaf nan kommi di ejaay ban sayaay. Bare nan Kumisira kúliikenumomi di kúyoomudomi jaj. 30Bukanak kati Atijamit kubabaj kafium, nan kújawumumi kuŋooben ésukey yati Yeriko funoomaf búrom fo kuban, kukukak kati yo di kulomi jaj. 31Mati ayeneta Rahab nafiunfium Atijamit, nawanlenumi kúmeeloaak kati Isirael jak. Moo kaane kubujutool di kañoosumi Atijamit. 32Ñaa kama, waa neete elaañ ireg? Ibajeenut bee kasanken mati Gideon, Barak, Sanson, Yafet, Dauda, Samuel, di kuboñaak búrom. 33Mati bukanak buke kubabaj kafium, di kuŋoolenumi jáyiaj janoosani, ban di kurung di majoonam, ban di kujukumi mati báligab bati Atijamit búlirooliroor. Di kukammi simukooras takum sísaabul, 34di kukammi sambun sájeeke man sijinlen yem, ban di kúpakumumi di ebujiey di mulibaam. Kálaamoak kooliil di kubilumi kukaan káliŋe. Di kufaŋumi man kubaje kánkum di futiikaf ban di kucesoorumi kutiika kábutoe kutey kúpur. 35Kuseek bukaaku kacetumi kooliil di kúyitenulimi kúlaañenuliil bee di eroŋey inki. Bukaaku kúsuutukenisuutuken, ban di kulatumi kakateniil manteer mbi kúyitoul di kacetumi bee di eroŋ yákoyume. 36Bukaaku di kúnarulimi ban di kuteki ñátum di sisankil sábolie, ban di kukokenimi ñiwujañ ban di kunenimi dán bukanak kukuleimi. 37Man bukaaku di kuleebimi bakooba bee nan kuloe kucet. Bukaaku di kujisimi wáj, bukaaku di kubujimi ñátum muliba mabaake. Bukaaku di kukaanomi ubaŋ wati sisaha mba sijaameen, kulelek kugagaal ban di kúsuutukenimi. 38Dúniyaay uye eyajut man ewaleniil. Buku koo kúkolokotoa di baŋaanab di kúlankiin ban di kuyofo di úhorahoraw. 39Buku búrom Atijamit mooliil muyeoomi mati kafiumak kooliil. Bare kucecet bayabut wan Atijamit áligeeniimi. 40Mati Atijamit nasofeensof waaf wákoyume bee mati wulaal. Wan Atijamit amaŋumi wootut ekaan úliroor leejaat di wulaal.

will be added

X\