KÚHIBURAK 1

1No’ona Atijamit nasankeneenesanken bee di kufannaaniŋolaal ñameeŋe di uruŋ wajuupoe ñátum di kuboñaak. 2Bare ñaa di kunakak kúlamukaak uke, Atijamit nájaatikenolaami kápurumul di Añoolool. Atijamit natuukumi wanoosani wammi di dúniyaay kápurumul di akila. Moo kaane, di múlamukaam, Atijamit namukenoomi man akil wanoosani. 3Akila kuyesoorumi di mawuŋam mati Atijamit ban poop náyiisolaami Atijamit man aanomi eeno. Ñátum di furimaf fabajumi kánkum nasofumi wanoosani wammi dúniyaay. Nan acetumi man atilulolaami di majakutolaal aban, nalakomi di báridab bati Atijamit Afaŋumi Kákalaa ammi di bukinab bajakaab. 4Mo’omu múyiisenumi mati Añiilau akaanimi afaŋ katebo simaleekaas, nan man kareesak kan Atijamit asenoomi kufaŋumi katebo ureesaw wooliso búrom. 5Mati Atijamit aanderut hani maleeka yákon, “Au Añoolom, jaat ínje di fúko’om eenomi ampai.” Ban Atijamit nalaañ ammi, “Ínje eete ekaan Ampaool, ban oo aate ekaan añoolom.” 6Ban inki, nan Atijamit alakomi éboñuley yati Añoolool ániinaau átiyaarau bee di dúniyaay, nammi, “Simaleekaas sati Atijamit soote kákuntaajen man simiiceelaetool.” 7Nan Atijamit asankenumi mati simaleekaas nammi, “Ai akaane simaleekaool nan járus, ban kurokaool nan bújeek bati sambun.” 8Bare mati Añiilau nammi, “Wóoy Atijamit, ejunkutey yooli yati jáyiaj panejaw fáculey bee bándoorey. ban majoonam pammukaan egoley yati jáyiaj jooli. 9Au numammaŋ wajoone ban nulatumi waŋonde. Moo kaane Atijamit, Atijamit ooli, namukenimi ñátum di káyueni túleey man asenimi kásuumaak wuuj kupaali kabajukomi.” 10Ban, “Akiiyaau, kabiñoo di fúcitumaf au utuukumi fúlakenumaaf fati dúniyaay, ban di uñeni nurokumi bukinab bajakaab. 11Do’odu búrom pandibao, bare pánoomi di wúli bee nanoosani. Do’odu búrom pandifanlen nan fuloaay. 12Panubooñ doo búrom nan fuloaay fafanlene. Pandikaan nan kurookal kéele. bare au ákonau úruŋuloeriit, simitas sooli síbaneriit.” 13Bare maleeka yati Atijamit yei naandere, “Lako di báridom, bee nampi ikammi kulatoori fútobojumaaf fati úkamuni.” 14Mante lee simaleekaas úyeget ceb? Soo sáboñulimi man sirok di kaje’emi bee epakey kajom.

will be added

X\