GALATIA 2

1Nan laañumi wuuj simit uñen di sibakiir ínje di Banaabas nulaañumi inki bee Yerusalem. Tiito oo poop síñakon nujawoore. 2Ujukujaat ínje ejaay bee bo, kankaan nan Atijamit náyiisenanyiisen man ijaw (bare nan íriiŋubomi nujukoorumi di kurungaak kati fujojaf síceboli, ban nimaŋumi man kúlaul) furimaf fajakaaf fan íriiŋenumi buku Kakaanutumi Kúyahuudak. Wan iteyutomi woo emmi takumbi waaf wóololi uwuujoor man burokab búmboom bulaañ bálamuk. Kammojaat pankaanom burok bati mée. 3Tiito di fúko’ool arokoorom, hani man akaanumi Ágirik, an afafarenutool man atampi. 4Bare mati kúyinenaak kubuntaak di kubuuyulomi kúnokenul títooroli di kúmeelo ban di kujuk kafeloak kammi di Apakenaau Áamakau Yensa. Di kumaŋumi kámingenoli nan kumiiceel man uriiben sílingaas sati Kúyahuudak. 5Bare usenutiil buruŋ hani jasiinkun. Numammaŋ bee epooy malegenam mati furimaf fajakaaf mati muyuul. 6Kurunga kuceen di fujojaf kusosof mati koo kubabaj fúkaw. (Bare ínje butumom bulee bo bukei eenomi bukoo mati Atijamit ápajuleriit.) Hani ákon di buku kubenenut to kurim bee di wan íriiŋeniimi. 7Kujujuk mati Atijamit nasenansen fujuumaf man íriiŋen furimaf fajakaaf foola Kakaanutumi Kúyahuudak, nan man asenumi Peter man áriiŋen Kúyahuudak. 8(mati Atijamit ammi károketumak Peter bee di Kúyahuudak oo ákonau ammi károketumak ínje bee di Kakaanutumi Kúyahuudak). 9Ban Yankuba, Peter, di Yohan kan eenomi kukankaan nan sísagumaas sapebumi fujojaf fati kuriibaak. Nan kurungaak uke kujukumi mati Atijamit nasenansen kánkumak kati ekaaney burokab bukila, koo búrom di kúkaanolimi kurokooriil, Banaabas di ínje. Nujamoorumi mákon mati wúli panujaw úriiŋen furimaf fajakaaf ban Kakaanutumi Kúyahuudak kommi man kukila kujaw kúriiŋenufo ban Kúyahuudak kommi. 10Wan kumaŋumi éregoli woo eenomi takumbi újim karambenak kalekaak. Ban mo’omu poop mulakolako di búyegetom. 11Bare nan Peter áriiŋulomi Antiok, niñoosooñoos bujuudoor, mati wan alakoeenumi ekaaney woo jakut jáng. 12Mati nalakoeenlako furi dákon di kúyinena Kakaanutumi Kúyahuudak, nan kuceen kan Yankuba aboñulomi kúriiŋulomi ceb, nayitomi galab apum ápajulo di bukoo, mati nákolikoli kúyinenaak Kúyahuudak kukila katampimi. 13Kúyinena Kúyahuudak karinobomi koo poop di kukammi mamisam nan akila. Hani Banaabas di fúko’ool aŋoolenut apak di ekaaney mo’omu. 14Bare nan ijukumi mati kulet di kariiben malegenam mati furimaf fajakaaf, niwonkumi man eenumi Peter di bújonleniil, “Au akammi Áyahuud di kawoliak, ukaanjaat nan au ukaanut Áyahuud. Ñaa kama buu panuŋoolen umingen Kakaanutumi Kúyahuudak man kukaan nan man Kúyahuudak kukaanemi eeno?” 15Wulaal di kuko’olaal Kúyahuudak fák di kawoliak, ukaanutaal kukaana majakut nan Kakaanutumi Kúyahuud. 16Bare numanjaamanj mati Atijamit ásoferiit an nan ajoone mati nariibenriiben wan sílingaas siceeŋumi, bare di kafiumak di Yensa Apakenaau Áamakau. Wulaal poop nubajaal kafiumak di Apakenaau Áamakau Yensa koo kukammi man Atijamit asofolaal nan bukan kajoone, bare lee mati kariibenak sílingaas. Mati Atijamit ásoferiit hani an ákon ajoone ñátum di ekaaney wan sílingaas siceeŋumi 17Nan wulaal Kúyahuudak ulakaami eñesey buruŋ bampi Atijamit asofolaal nan bukan kajoone ñátum di kasofoor di Apakenaau Áamakau, man ujukaami wulaal poop kukaana majakut nan Kakaanutumi Kúyahuudak. Mante mo’omu múyiisenolaami mati Apakenaau Áamakau akaanolaami man ukaanaal majakut? A’a, lee mo! 18Bare sílingaas sati noo san ikateenumi kafiumak iban nilaañ íŋarul so igalo, ikammojaat níyiisenooroyiisenooro áyuura ati so. 19Mati ínje, sílingaas di fúkouso sikaanankaan man ícetum di so ban sibajut kánkum di ínje, manteer mbi ibaj eroŋ di Atijamit. 20Kankaan nan ínje di Apakenaau Áamakau kufaaŋenoorumi man icet di ébaarey yati búpinab, lee ínje di fúko’om eem man iroŋe bare Apakenaau Áamakau aam man aroŋe ríiŋ di ínje. Eroŋey yan emmi di iñeme ñátum di kafiumak di Añiilau ati Atijamit, amaŋammi manteer asen eroŋey yoola bee mati ínje. 21Ínje ilatut kabeten majakam mati Atijamit. Kaanjaat an Atijamit panasofool nan ajoone mati akila nariibenriiben wan sílingaas siceeŋumi, moo kama ecetey yati Yensa ekankaan ñaañaaña.

will be added

X\