GALATIA 1

1Ínje Paul, áriiŋena ati Yensa, emmi di eciik letaraay uye. Kayooŋ kuceen kati bukan mba kati fujuumaf fati ansansan, kumukenutom man ikammo, bare kati Yensa Apakenaau Áamakau di Atijamit Ampaau, ayitenumi Yensa di kacetumi. 2Ínje di kuriiba búrom nunampoonampoor man úboñul kasaafak bee di muyuul búrom kammi di kukobak kati Galatia. 3Emitey ekaan Atijamit Ampaau di Akiiyaolaal Yensa Apakenaau Áamakau majakam mooliil di kásuumaayak kooliil. 4Apakenaau Áamakau oo asenooromi fúko’ool nan búsimen mati majakutolaal mambi apakenolaal di dúniyaay uye yajakutey yan oomaamiñaa, nan man Ampaolaal Atijamit amaŋumi eeno. 5Usalaal Atijamit bee bándoorey. Amen. 6Wáaloanwaalo mati épurey yooluul di Atijamit yaŋ, awonkuumi ñátum di majakam mati Apakenaau Áamakau ban di jilaañ jísoful furim fuceen. 7Malegen furimaf fuceenaf foo karees ceb fubaje. Babaj bukan kuceen kálaamenuul takumbi úyegetuul usof úlaul mati malegenam mati Apakenaau Áamakau. 8Bare anoosani, handeneen wúli mba maleeka yápurulo di bukinab bajakaab, man ériiŋenuul furim fúbuto fanaamutumi di fan úriiŋenuumi, Atijamit mbi anum an akila mba maleeka ekila. 9Nan man uregeenuumi noo eeno, ban panilaañumi isanken mo. Kaanjaat nan babaj an aceen aam di káriiŋenuul furim fúbuto fanaamut di fan wúli úriiŋenuumi, mbi anumi bee di sambunas sáceteriitumi. 10Mante ínje kúcilak kati bukanak neem di eñesey mba mante kati Atijamit? Mante ínje eem di ekaan man bukanak súumiil ceb? Ikammojaat hani bee iñeme letikaaneen amiiceel ati Yensa. 11Kutiom, ínje eete ekaan man tíenuul mati furimaf fajakaaf fan íriiŋenuumi kaanut furim fati an. 12Mati furimaf fukila an asenutom fo ban poop an aliikitenutomufo, bare Yensa Apakenaau Áamakau asenammifo. 13Mati muyuul búrom bajut ajamut man eenomi noo eeno nan ilakomi di buruŋab bati Kúyahuudak. Nikammi man kúsuutukenumi kati fujojaf fati Yensa eeno ñátum di kamingen ban hani niliikeenliik bee kakajeniil. 14Kafiumak kúmboom di buruŋab bati Kúyahuudak, di kubilumi kúkalaa manteer kuwuuj kati kupaalom búrom kan uremi ban nibabaj fuuñ fati emaŋ man iraagal wan iŋoolenumi búrom bee kariiben mukaanaam mati kufannaaniŋolaal. 15Bare Atijamit ápajulammi kabiñoo nan atuukammi, ban nawonkammi iyiiŋ ñátum di majakam moola. 16Súumoosuum man áyiisenammi Añiilau oola, mambi iŋoolen íriiŋen furimaf fajakaaf mati oo bee di Kakaanutumi Kúyahuudak. Iceeŋut an man aregom waa neete ekaan. 17Ijawut bee Yerusalem bee ejuk kúriiŋenaak bukaaku kamondammi, bare bajoonene taac bee Arabia mbi inki ilaañumi íbookoul bee Damasukos. 18Bajumi simit sífeegiir, mbi kiti ijawumi bee Yerusalem bee bujukoor di Peter. Boo nilakomi wáriiŋe kunak bútinken. 19Benento, úkamboorut hani ákon di kúriiŋena bukaaku leejaat Yankuba, Akiiyaolaal atiool. 20(Wan emmi di eciikuuley, titoorom di Atijamit lee fugaajoor!) 21Nan púrutomi, niwuujumi bee di upanaw wati Siria di Kilikia. 22Nanan nikila kuriibaak kati kujojak kammi Yúdea kuyahoorutom jícil. 23Koo mo’omu kujame di kureg, “Ansi ásuutukenolaami iñeme inki oo ammi di káriiŋenak kafiumak ko’oku kansi araagalumi bee kakajen.” 24Koo búrom di kulaañenumi Atijamit kasalak mati mákalaam moola mati ínje.

will be added

X\