1 Kuñiilak, jikob kuwolauul mati muyuul kati Akiiyaau, mati mo’ome moo jootumi ekaaney. 2 “Lébien ampai di iñaayi” (yoo eenomi élingaay étiyaarey yabajumi bálig.) 3 “Mambi jak bee di au di nubaj fuyiif fabaake baabe di dúniyaay.” 4 Kumpaak, takum jikaan kuñooluul táañi’iil ban di bóli’iil, bare mbi jibaakeniil kakurak di kájaatikenak kati Akiiyaau. 5 Kumiiceelak, jikob kan eenomi kúfaculaak kooluul baabe di dúniyaay, jílebieniil ban di jikobiil tíen. Jirok di úyegetuul wákonaw, nan man jikaanemi eeno bee di Apakenaau Áamakau. 6 Jirok máamak, takum kaan muyuul bee erok nan kúciliil kommi di muyuul ceb mambi mooluul músuumiil. Bare muyuul nan kumiiceel kati Apakenaau Áamakau, joote ekaan wan Atijamit amaŋumi man jikaan di úyegetaw wooluul búrom, 7 jirok bee mati kúfaculaak kooluul ñátum di úyeget wáwambuloe nan burok di Akiiyaau jommi di bo kaanut bukanak. 8 Muyuul jimammanj mati Akiiyaau panacaam anoosani wajakaaw wan akammi handeneen nakankaan amiiceel mba akaanut amiiceel. 9 Kúfaculaak, muyuul joote kariten kumiiceelak kooluul joon, ban takum jikooleniil. Jiwoolo mati muyuul búromuul jibabaj áfaculaau ákonau di bukinab bajakaab, ban oo alaañut di an. 10 Di fúwuŋenaf, mbi jíliŋ di Akiiyaau ñátum di kánkumak kati mákalaam moola. 11 Jikaano mútiikumaam mati Atijamit búrom, mambi jiŋoolen jitiiken makooñam mati Seetaanaay. 12 Mati wulaal uletaal di futiik fati fúsim di eniil, bare di futiik fati kurungaak kájakaatiaak di kati kujuumak kati dúniyaay yájukeriitumi, di wánkumaw wáamakaw wati di érimey warokemi di dúniyaay uye, ban úgun wájakaatimi fatiya di érimey. 13 Moo kaane jikaano mútiikenumaam mati Atijamit mambi jiŋoolen jijuum líŋ di funakaf fajakutaf, moo panjijuk hani di fúbanumaf fati futiikaf pánjoomi man jijuume líŋ. 14 Jijuum líŋ di malegenam nan kálil jipiinoore di ukampauul, di jikaano majoonam nan múkaruma búsus. 15 Jikaano usamati di úkamunuul nan furimaf fajakaaf fati kásuumaay, man usenuul fútobojuma fáliŋe. 16 Benento di mo’omu búrom, joote kaaken múkaruma mati káyinenak, di múkaruma mukila jootumi epebey simeeraas sati sambunas sápurumulomi bati Seetaanaay. 17 Jikaano bompoŋab bati epakey, di jooken jilibaaj jati Búyeget Bátienaab jan eenomi furimaf fati Atijamit. 18 Jikaan mo’omu búrom di kúlawak, jilaw man Atijamit arambenuul. Jilaw nanoosani nan man Búyegetab Bátienaab burunguumi. Mati mo’omu jíkaanumumi ban di jirulen kúlawak mbi jilaw poop bee di bukanak kati Atijamit banoosani. 19 Ban poop mbi jilawom, manteer Atijamit mbi asenom kurim kan ceeŋumi man isanken bákoliut man íriiŋen bukanak mati malegenam mayofoaam mati furimaf fajakaaf. 20 Mati furimaf fajakaaf, di kukaanammi aboña ammi bakuleriab ñátum di ñiwuj. Bare mbi jilawom manteer mbi isanken bákoliut mati furimaf fajakaaf nan man ceeŋumi man ikaan. 21 Tukiko, atiom ariiba an ifaŋumi man imaŋe an umanje abaje káyinen di arambenaom di burokab bati Akiiyaau, ban panareguul buu nemmi di ejaay di burokab eeno. 22 Moo kaane ínje nemmi di éboñulool bee di muyuul man areguul buu nommi di ejaay eeno, ban pánaliŋenuul. 23 Emitey ekaan Atijamit Ampaau di Akiiyaau Yensa Apakenaau Áamakau asenuul kásuumaay, kamaŋ, di káyinenak bee di ariiba anoosani. 24 Emitey ekaan majakam mati Atijamit móomi di anoosani di karulen kamaŋak Akiiyaolaal Yensa Apakenaau Áamakau.
