1 Moo kaane jiriiben wanoosani wan Atijamit akaanemi, nan kuñiilak kati Atijamit di búsusool. 2 Jiroŋ di eroŋey yati kamaŋak, nan man Apakenaau Áamakau amaŋolaami eeno ban nasenumi fúko’ool bee mati wulaal nan kawul kati kaput kásuume di búsimen bati kaput básuume, woo úsuumenumi Atijamit. 3 Bare kaseeketak di kániine’etak, fúraar, mahaŋ woo jootut kasanken titooruul, mati muyuul bukanak kati Atijamit. 4 Takum jireg kurim kajakut mba kabajutumi fúkaw mba kaleemomi, bare jisanken wampi wasenuumi kasalak bee di Atijamit. 5 Mbi jimanj tíen, mati álaputa mba átienutumi, mba abajumi mahaŋ (yoo eenomi amiiceelaetemi náati), an akila letabaj bulaañab di jáyiaj jati Atijamit di jati Apakenaau Áamakau. 6 Takum an abuntuul ñátum di kasankenak kabajutumi fúkaw. Mati wo’owu úŋareuumi kañuumulak kati Atijamit pankubil bee di bukanak kañooseoomi búrom. 7 Takum jibajoor waaf di an akila anokoorumi mo’omu. 8 Noo muyuul jilakoeenelako di érimey, bare iñeme muyuul bukanak kati Akiiyaau, moo kaane muyuul bukooku di mawuŋam. Joote kagoroor nan bukanak kammi di mawuŋam. 9 (mati mawuŋam ume mammi di muyuul mukammi wajake, wajoone, di walegen) 10 Jiraagal man jimanj wayeumi Atijamit. 11 Takum jiriiben di ekaaney mukaana mútiikaar mati érimey nan man bukaaku kukaanemi bare mbi jíyiisen buu koomeenimi eeno. 12 Puñenipuñeni máamak man mukaanaam mukila makaaneimi di érimey musankeni. 13 Ñaa mawuŋam pámmuyiisen mukaanaam ume buu moonomi eeno. 14 Moo kaane di koone, “Wáay ámooriaau, yílo! Man upak di ecetey, ban Apakenaau Áamakau aate eseni mawuŋ.” 15 Moo kaane mbi jíkaanum man jommi di eroŋey eeno, takum jiroŋ nan bukan káyilout, bare nan káyiloe. 16 Jíkaanum máamak di buruŋab báwambulomi di wan jibajumi, mati wulaal bukooku di kunakak kajakutak. 17 Takumbi jígotet, bare mbi jiñes wan Akiiyaau amaŋumi man jikaan. 18 Takumbi jikaan kúkalia mati dooru pankajen eroŋey yooluul. Bare jikob man Búyegetab Bátienaab bumeeŋuul. 19 Nampi jijojumi tákon, jícim jábuura, úcimaw wati kasalak, di úcimaw kápurumul di Búyegetab Bátienaab bee titooruul, nan man jisenemi kasalak bee di Akiiyaau ñátum di úyegetuul búrom. 20 Ban panjisal Atijamit Ampaau mati wanoosani di kareesak kati Akiiyaolaal Yensa Apakenaau Áamakau. 21 Ban jisenoor kúkouul mati kálebienak kati Yensa Apakenaau Áamakau. 22 Kuseekak, jisen kúkouul kutauul nan man jikaanemi bee di Akiiyaau. 23 Mati ániine oo eenomi fúkaaf fati aseekau nan man Apakenaau Áamakau akammi fúkaaf fati eniiley yan eenomi fujojaf. Apakenaau Áamakau oo eenomi malegen Apakenaau ati eniiley ekila. 24 Nan man fujojaf fusenumi fúkoufo Apakenaau Áamakau, moo mákonam muyuul kuseekak jisen kúkouul kutauul. 25 Kúniinaak, muyuul joote emaŋ kuseekuul, nan man Apakenaau Áamakau amaŋumi fujojaf eeno, ban nasen eroŋey yoola bee mati fo. 26 Nakankaan mo’omu mambi fujojaf fúliroor ban di fútien, naposufomi di mumelam di furimaf foola. 27 Apakenaau Áamakau nakankaan mo’omu mambi áyiisen fujojaf bee di fúko’ool di majakam moolifo, nan fujoj fáliroore ban fubajut hani kabet, mba májakaatie mba waaf uceen wajakut. 28 Moo mákonam, kúniinaak koote emaŋ kuseekiil nan man kumaŋumi siniilas sooliil eeno. Mati ániinaau amaŋumi aseekool malegen fúko’ool namaŋe. 29 Mati bajut di wulaal hani ákon alate eniilool, bare namaŋuyo ban nacookooruyo jak, nan man Apakenaau Áamakau acookoorufomi eeno. 30 Ban wulaal eenomi upanaw wati eniiley yoola. 31 Nan man furimaf furegumi eeno, “Mati mo’ome ániine panakat ampaool di iñaayool man kunampoor di aseekool, man koo kugabaarak kubil kukaan eniil yákon.” 32 Babaj waaf wayofoe taate woo eenomi malegen mákalaae di furimaf fajakaaf ufe, wan ílaulumi woo eenomi Apakenaau Áamakau di fujojaf koo kákon. 33 Moo mákonam, ániine anoosani aate emaŋ aseekool nan man amaŋumi fúko’ool eeno, ban aseekau poop aate kálebien ataool. oop aate kálebien ataool.
