EFES 4

1Ínje, nan ikammi an akuli mati burokab bati Akiiyaau, nilawuulaw man jilako di eroŋ yáriiŋe nan bukan kan Atijamit awonkene akaaniil koola. 2Jiwalenooro joc man jiyin tem, jibajoor kamuuten. Jíyiisen kamaŋak ñátum di kamuuten. 3Jiraagal man jikat Búyegetab Bátienaab man bukaan úyegetuul tákon. Jikaan ñátum di kacinoor di kásuumaay. 4Muyuul búromuul eniil yákon, jibabaj Búyegetab Bátienaab bákonab, nan man jisenimi fúgolum fákon nan jiwonkimi jikaan bukan kati Atijamit. 5Akiiyaau ákon, kafium kákon, di poop kátiigul kákon, 6Atijamit di Ampaau ákon ati wulaal búrom, afaŋumi katebo búrom, kápurumul di wanoosani, di poop ammi di wanoosani. 7Bare majakam masenimi bee di anoosani riiboor di man kawulak kan Apakenaau Áamakau aliikumi re. 8Moo kaane furimaf fati Atijamit di foone, “Nan aŋarimi bee fatiya tan faŋumi katebo, naŋarumi jameeŋ yati bukan kasofimi. ban nasenumi kawul bee di bukan.” 9(Di aaney “Naŋarimi fatiya,” mante yoo eenomi Apakenaau Áamakau mútiyaaram nawaloulowalo bee dúniyaay uye? 10Awaloulomi oo ákonau aŋarimi ban faŋumi katebo bukinab bajakaab mambi aŋoolen alako banoosani.) 11Akila asenumi kawul uke oo amukenumi bukaaku man kukaan kúriiŋena, kuboña, kufetena, kupooya, di kuliikitena. 12Búrookaab booliil boo eenomi bee kajonjooren bukanak kati Atijamit man kukaan burokool ban di kúliŋen kati fujojaf, foo eenomi eniiley yati Apakenaau Áamakau. 13Mo’omu pammurulen bee nampi wulaal búromolaal ukaanaami tákon di kafiumak di kálaulak koololaal mati Añiilau ati Atijamit. Panubilaal nan bukan kanke nan man Apakenaau Áamakau aanoemi, panubilaal oonoaal nan akila. 14Wulaal ootaale ekataal mukaanaam mati kuñiil. Takum ukaanaal bukan nan kan járusey enagemi baabaaba mati kujamujaat kaliikitenak kanoosani kápurumul kuliikitenaak kati ebuntey. Kukila koo kukaanemi bukaaku man kújim ñátum di ebuntey yan koo kukammi. 15Wulaal ootaale esof malegenam di kamaŋak, wulaal nufaŋaal man oonoaale nan Apakenaau Áamakau di wanoosani, an eenomi fúkaaf fati eñiiley yoola, fujojaf. 16Kápurumul di oo, eniiley búrom enampenimi jak. Kapanookapan kati yo di kubilumi kusukoor tákon ñátum di súukas. Kapanookapan kurokumi wan ceeŋumi man kukaanuwo eniil búrom panebaak di éliŋ kápurumul di kamaŋ. 17Di kareesak kati Akiiyaau, nigamenuugamen, takum jirulen di eroŋ nan bukanak kamanjutumi Atijamit, kan síwoonooras sooliil sikammi ñaañaaña. 18Úyegetiil ucecet, koo kúloiloi máamak di eroŋey yápurumulomi di Atijamit, mati kámanjaataak kammi di bukoo di poop úyegetiil usasay waŋ nan ekooba. 19Kapuñak kulaañutibo ban kusen kúkoiil man kunoken kayenet di poop di kubajumi máwus mati ekaaney mukaanaam masikoaam nanoosani. 20Bare kaanut mo’omu moo wan jilakomi kaliikenak mati Apakenaau Áamakau. 21Kabiñoo nan jijammi moola búrom ban di jiliikenumi malegenam mammi di Yensa. 22Jikat bálamuk mukaanaam mooluul mafanlenaam nan man jipiimi di jiroŋ no’ona. Mukaanaam mukila búrom musikosiko ñátum di emaŋey yajakutey yooluul. 23Jikat man Búyegetab Bátienaab bu’unkulen sísiriguul di úyegetuul. 24Joote káyiisen úyeget unkul mati muyuul bukan kunkul, mati jituukituuk di búyesoorab bati Atijamit, ban di jikaan joon di jíliroor. 25Moo kaane jípur di kagaajoorak! Anoosani di muyuul mbi jiregoor malegenam. Mati wulaal búrom kákonak. 26Takum jimaŋ man kañuumulak kukaanuul jikaan majakut. Ban takum jiñuumul yok bala’ab bujon. 27Takum jimaŋ man Seetaanaay ebaj buruŋ di muyuul. 28Ákuutemi takum arulen di jákuut, bare mbi arok, ekaaney burok balegen ñátum uñenool, mambi aŋoolen aramben kan ceeŋumi. 29Takum jimaŋ man kurimak kajakutak kúpurumul di utumuul. Bare jireg kurimak kajakaak nanan nan ceeŋumi mbi kuramben bukaaku. 30Takum jikaan Búyegetab Bátienaab súumaatibo. Mati Búyegetab Bátienaab buguubenuumi di fúmanjum bee mati funak fati epakey. 31Jikat kaleetoorak, kañuumulak káamakak, fuuñaf, kurimak kajakutak, di kasuulenak. 32Bare jirambenoor di wajake, kábotenioor ban di jibonketoor, nan man Atijamit abonketeuumi eeno mati Apakenaau Áamakau.

will be added

X\