EFES 3

1Mati wan Atijamit akammi Kúyahuudak di Kakaanutumi Kúyahuudak man kúnaamoorul tákon ínje di fúko’om, Paul, an kusofe kukul mati Yensa Apakenaau Áamakau, mambi iŋoolen iramben muyuul Kakaanutumi Kúyahuudak. 2Tíenantien muyuul malegen jijanjam jiban, mati Atijamit di majakam moola nasenansen burokab ube, man iramben muyuul Kakaanutumi Kúyahuudak. 3Nan man iciikumi di letaraay uye, buu Atijamit di fúko’ool akaanammi man imanj wan asofumi bukanak kumanjut. 4Nampi jiliikenumi wan iciikumi di yo, panjiŋoolen jijuk kálaulak kúmboom mati wayofimi wati Apakenaau Áamakau. 5Atijamit áyiisenutumi wayofimi uwe bee di úwoloorumaw wawuujumi, bare iñeme náyiisenyiisen wo bee di kúriiŋenaool di kuboñaool kálirooraak ñátum di Búyegetab Bátienaab. 6Wayofimi kukila woo eenomi kápurumul di furimaf fajakaaf Kakaanutumi Kúyahuud kubabaj kapan kákon di Kúyahuud di wan Atijamit awuleiimi. Koo búromiil kukankaan eniiley yákoney, ban di kunaamoor di báligab ban Atijamit akammi kápurumul di Apakenaau Áamakau Yensa. 7Nikaanikaan aroka ati furimaf fajakaaf ufe ñátum di kawulak kápurumul di majakam mati Atijamit kasenimi bee di ínje ñátum di burokab bati kánkumak koola. 8Ínje hani man ifaŋumi man kusofutammi di waaf di bukanak kati Atijamit, majakam ume musenisen man íriiŋen Kakaanutumi Kúyahuudak mati ebajey yati Apakenaau Áamakau ébaneriitumi. 9Atijamit, atuukaau ati wanoosani, amukenammi man íyiisen anoosani man ajuk wan asofumi wayofimi kabiñoo di fúcitumaf. 10Wan Atijamit asofumi nanan une, kápurumul di kujojak malinlaam moola manoosaniam mbi mumanjeni bee di kurungaak di kati kujuumak búrom kammi di bukinab bajakaab. 11Atijamit nakammomi riiboor di wan asofumi biñoo no’ona, ban iñeme wo’owu ukaanikaan kápurumul di Apakenaau Áamakau Yensa Apakenaolaal. 12Mati Apakenaau Áamakau di kafiumak koololaal kan ubajaami di oo, panuŋoolenaal ubilaal di fúgolummi bee di bújonlenab bati Atijamit bákoliut. 13Moo kaane ínje nilawuulaw, takum úyegetuul ugaal mati man nemmi di bugaalab bee mati muyuul, moo kaane mbi jílebieni ban di jíliŋeni. 14Mati mo’omu ínje oomu man íkuntaajene di kúlawak bee di Ampaau, 15kápurumul di akila fiil fanoosani fammi di bukinab bajakaab di baabe dúniyaay nabetufo kareesak. 16Emitey ekaan Atijamit kápurumul di kawulak koola káamakak kábaneriitumi manteer mbi akaanuul man úyegetuul úliŋ kápurumul di Búyegetab Bátienaab. 17Emitey ekaan Apakenaau Áamakau mbi acin di sísigiruul nan man jifiummi di oo, 18mbi jibaj kánkum kati kálaul buu kamaŋak kati Apakenaau Áamakau kúkalaami, kuwuŋenumi, kúsankimi, di kubakumi eeno bee mati muyuul. 19Ban mbi jimanj kamaŋak kati Apakenaau Áamakau, handeneen man kufaŋumi fumanjaf fooluul, manteer mbi jimeeŋ ríiŋ di búyesoorab bati Atijamit. 20Atijamit naŋooleŋŋoolen akaan wuuj wan uŋoolenaami ulawaal mba hani wan uwoonooraami, mati kánkumak koola kooku di burok titoorolaal. 21Emitey ekaan Atijamit asali máamak kápurumul di Apakenaau Áamakau di kati fujojaf bee bándoorey. Amen.

will be added

X\