EFES 1

1Ínje Paul, an Atijamit amukenammi kápurumul di kamaŋak koola man ikaan áriiŋena ati Apakenaau Áamakau Yensa, eem di eciik letaraay uye. Eciikiciik bee di bukanak kati Atijamit kati Efes kakammi kufiumaay di Yensa Apakenaau Áamakau. 2Emitey ekaan Atijamit Ampaolaal di Akiiyaau Yensa Apakenaau Áamakau kusenuul majakam di kásuumaay kooliil. 3Usalaal Atijamit, Ampaau ati Akiiyaolaal Yensa Apakenaau Áamakau asenolaami kawulak kanoosani kan Búyegetab Bátienaab busenumi kawulak ñátum di bálamukab bati Apakenaau Áamakau, kápurumulomi di bukinab bajakaab. 4Bala’a butuukab bati dúniyaay, Atijamit namukenolaamuken aban man ukaanaal koola di Apakenaau Áamakau mambi úlirooraal ban takumbi ubajaal kabet di bújonlenool. 5Atijamit nasofeensof ekaanolaal nan kuñoolool kápurumul di Yensa Apakenaau Áamakau. Moo eenomi kamaŋak koola di wásuumoomi máamak. 6Usalaal Atijamit mati majakam málirooraam moola. Mati man asenolaami kawulak kabajutumi bacaam di Añoolool ati búsusool. 7Di Apakenaau Áamakau nubajaami epakey kápurumul di fúsimool, moo eenomi majakutolaal mubonketibonket. Riiboor di majakam máamakam mati Atijamit, 8man asenolaami ríiŋ. 9Atijamit namanjenolaamanjen kamaŋak koola kayofimi, riiboor di wan asofeenumi no’ona di Apakenaau Áamakau. 10Nampi nanan níriiŋumi, Atijamit aate káliren wan asofeenumi no’ona. Woo eenomi Atijamit panajojen wanoosani watuukimi búrom tákon, wanoosani wammi fatiya di wammi tentaam, ñátum di Apakenaau Áamakau man akaan áfacula ati wo. 11Wanoosani wakaanimi riiboor di wan Atijamit asofeenumi. Ban Atijamit namukenolaami ukaanaal bukanak koola man usofolaal di Apakenaau Áamakau ñátum di wan asofeenumi no’ona di fúcitumaf. 12Wulaal katooŋumi úgolumaal di Apakenaau Áamakau, nootaale esal Atijamit oololaal ati mawuŋam. 13Di Apakenaau Áamakau, muyuul poop kajamemi furimaf fajakaaf fati malegenam, faŋarulomi epakey yooluul. Nan man jifiummi di Apakenaau Áamakau, Atijamit akaanuumi fúmanjumaf foola ñátum di esenuuley Búyegetab Bátienaab ban áligeenuumi. 14Búyegetab Bátienaab bukammi tíenolaal panuyabaal wan Atijamit áligumi bee di bukanak koola. Moo Atijamit panapakenolaal, ban nálebieni di poop nasali. 15Moo kammi, kabiñoo nan ijammi kafiumak kooluul di Akiiyaau Yensa di kamaŋak kooluul bee di bukanak kati Atijamit, 16itamburerut ikat esaley yati Atijamit bee mati muyuul. Niwooloeuuwoolo di kúlawak kúmboom. 17Nilalaw Atijamit ati Akiiyaolaal Yensa Apakenaau Áamakau, Ampaau ati mawuŋam, man asenuul Búyeget Bátienaab baatumi ekaanuul man jilinlo ban di búyiisenuul mati Atijamit, manteer mbi jimanjool. 18Kúlawak kúmboom koo eenomi mawuŋam mbi mufitiken úyegetuul, mambi jílaul waa eenomi fúgolumaf fan Atijamit áligumi kan awonkumi man kuriiben. Moo ñaa nimammaŋ man jílaul waa eenomi bulaañab balegenab báamakab báriiŋumi síwoonoor ban áligumi man asen bee di bukanak koola. 19Nimammaŋ man jílaul waa eenomi kákalaak káamakak kati kánkumak koola karokenemi di wulaal káyinenoomi. Kánkumak kukila koo kufanfaŋ kawoonoorak kati anau 20nan ayitenumi Apakenaau Áamakau di kacetumi ban nalakenoomi di keñenak kúridak koola di bukinab bajakaab. 21Apakenaau Áamakau arungumi ñátum fujuumaf foola fafaŋe kákalaa di kurungaak búrom, kujuumak búrom, wánkum búrom, jáyi búrom jati fatiya, di kareesak kanoosani kasenimi. Ban erungey yoola kaanut dúniyaay uye ceb bare poop dúniyaay yábileuumi. 22Atijamit nakankaan waafaw búrom di fútobojumaaf fati fátaamool ban nakaanoomi áfaculaau ati wanoosani wati di fujojaf. 23Ban fujojaf foo eenomi eniiley yati Apakenaau Áamakau, ban káliroorak koola akila, oo di fúko’ool álirene wanoosani di banoosani.

will be added

X\