KOLOSE 3

1Mati au di Apakenaau Áamakau jíyitenuliyiten, jijuumen úyegetuul wammi di bukinab bajakaab, ban Apakenaau Áamakau ammi balakoe di báridab bati Atijamit. 2Jijuumen úyegetuul di wammi bukinab bajakaab, bare lee di wammi dúniyaay uye. 3Mati muyuul jicecet, ban eroŋey yalegenaay yooluul eyofiyof di Apakenaau Áamakau di Atijamit. 4Nampi Apakenaau Áamakau, an eenomi eroŋey yooluul yalegenaay, arajulomi, moo poop panjirajoor dákon di oo di mawuŋam moola. 5Moo kaane muyuul joote elat emaŋey yati mukaanaam mati dúniyaay, man jóomi nan kaseeket di kániine’et, fúraar, kamaŋ kati eniil, síwoonoor sajakut, di mahaŋ di eroŋey uye, uru búrom junjuum nan kamiiceelaet náati. 6Mati mukaanaam maanomi mo’omu kañuumulak kati Atijamit pankubil bee di bukanak kañoosemi akila. 7Noo muyuul ninsi jikaan, nan jilako’oorumi di bukanak kati dúniyaay. 8Bare iñeme eenomi nanan nan joote ekat kafuuñoor, kañuumul, kaleetoor, kasuulen, di kasanken kajakut. 9Takum jigaajoor, biñoo nan jikatumi bálamuk úyegetuul wájakaatie di bakaaneruul bájakaatie, 10ban di jiŋar eroŋey yunkuley, yaunkulenimi di búyesoorab bati Atijamit Atuukaau man jibil jimanjool tíen. 11Di eroŋey uye yunkuley, kaanut waaf manteer au Áyahuud mba Akaanut Áyahuud, atampi mba atamputi, kujaaburuŋ kabilumi mofam mábutoe, kakaanemi búlaput amiiceel mba akaanut amiiceel, bare Apakenaau Áamakau eenomi wanoosani, mati akila nacincin di wulaal búrom. 12Muyuul Atijamit amukenuul akaanuul bukan koola kan amaŋumi. Ñaa moo, muyuul joote ebaj kabonket, di jikaan bukan kásuume, jiwalenooro, jibaj kajinlen ban di jibaj kamuuten. 13Jikoboor ban an ákuumoorujaat jibonketoor, nan man Akiiyaau abonketeuumi. 14Kamaŋak kufanfaŋ man kubaje fúkaw uru búrom. Koo kútuken wahaw búrom. 15Jimaŋ man kásuumaay kan Apakenaau Áamakau asenuumi kurungen di sísigiruul. Mati muyuul kati eniil yákon, muyuul jiwonkeiwonk mambi jilako tákon di kásuumaay, mbi jisalool. 16Mbi furimaf fati Apakenaau Áamakau fucin di sísigiruul ríiŋ. Jiliikitenoor ban di jíjaatikenoor di malinlaam búrom. Jícim úcimaw wati Jábuura di úcim wápureuumi di Búyegetab Bátienaab bati Atijamit, jílebien Atijamit di sísigiruul ban di jisalool. 17Wanoosani jirege mba di jikaan, woote ekaani ñátum di kareesak kati Akiiyaau Yensa, nan man jisalemi Ampaolaal Atijamit ñátum di oo. 18Kuseekak, muyuul joote esen kúkouul kutauul, mati moo joote ekaan nan kati Akiiyaau. 19Muyuul kúniinaak, jimaŋ kuseekuul ban takum jiwaaken di takum jítaañi di kukila. 20Muyuul kuñiilak joote ekob wan kuwolauul kureguumi di wanoosani, mati mo’omu moo músummi Atijamit. 21Kumpaak, takum jikaan kuñiilak bóli’iil. Jikammojaat úyegetiil pánujiisoor. 22Kumiiceelak, muyuul joote ekob kurungaak kaakumi muyuul kati dúniyaay di wanoosani. Takum jikaan waaf bajukeriilab, kuleetojaat leejikaanuwo. Bare jikammo ñátum di úyegetuul búrom, mati jílebienlebien Akiiyaau. 23Wanoosani wan jikammi, jikaanuwo ñátum di sísigiruul búrom, nan man jommi di ekaan burokuul bee mati Akiiyaolaal, bare kaanut bee mati bukan. 24Jiwoolo mati Akiiyaau panasenuul bulaañab nan bacaam booluul. Mati Apakenaau Áamakau oo eenomi Akiiyaau alegenau an muyuul joom di burok. 25Bare bukan kájakaatie pankucaami di wan kukammi. Mati Atijamit ápajuliireriit.

will be added

X\