KOLOSE 2

1Nimammaŋ man jimanj buu nemmi di karaagalak bee mati muyuul, ban bee mati kati fujojaf kammi di Laodik, ban poop bee mati kuriibaak bukaaku katamburerutumi kuyahom jícil. 2Nikankaan mo’omu mambi sísigiruul síliŋeni nan man kukotoorumi di kamaŋak. Nimaŋiimaŋ man kubaj kágolum káliŋe mati kubabaj kálaul káriiŋe mati fusofaf fayofoaaf fati Atijamit, fan eenomi Apakenaau Áamakau di fúko’ool. 3Di oo malinlaam di fumanjaf búrom fuyofimi. 4Ínje ereguul mati uru, takum an aŋoolen abuntuul ñátum di kañakoor kakaanutumi malegen. 5Handeneen núloiyooraaloiyoor, bare búyegetom boobu di muyuul. Súumansuum máamak mati muyuul jooju di eroŋ nan man ceeŋumi eeno mati káyinenak káliŋaak kan jibajumi di Apakenaau Áamakau. 6Moo kaane, nan man jíyinenumi Apakenaau Áamakau nan Akiiyauul, joote karulen di eroŋ di ekaan wan amaŋumi. 7Jijuum líŋ di oo nan man kufaarak kati búbaar kujummi líŋ eeno. Jijuumen eroŋey yooluul di oo, ban jifaŋ man jíliŋe di kafiumak kooluul, nan man jiliikitenimi noo. Ban di jibaj úyeget wati esalool. 8Jíkaanum! Takum an ájimenuul ñátum di kawoonoorak kabajutumi fúkaw. Kawoonoorak kukila kúpurulopur di mukaanaam mati anau di fúko’ool di poop kánkumak kati mukaanaam mati dúniyaay uye, koo kúpurulout di Apakenaau Áamakau. 9Mati di Apakenaau Áamakau Atijamit nacincin ríiŋ, 10ban muyuul jibabaj eroŋ yáriiŋe di Apakenaau Áamakau. Oo eenomi Akiiyaau, fúkaaf fati arungaau anoosani di ati fujuumaf anoosani baabe di dúniyaay. 11Di oo muyuul poop jitampitamp kaanut etampey yan bukanak kukaanemi di kapongolak di eniiley. Bare kankaan etampey yápurumulomi di Apakenaau Áamakau, yoo eenomi epakey di kánkumak kati emaŋey yooluul yájakaatimi. 12Mati jifokifok di Apakenaau Áamakau di kátiigulenak, ban di kátiigulenak kukila man jíyitenoorulimi poop bee di eroŋey yunkuley di oo kápurumul di kafiumak kooluul di kánkumak kati Atijamit, áyitenuloomi di kacetumi. 13Muyuul, kankaan nan bukan kaceteene di úyegetuul mati majakutuul ban muyuul Kakaanutumi Kúyahuudak katamputimi. Bare Atijamit nakaanuumi jiroŋ di Apakenaau Áamakau. Atijamit nabonketolaabonket majakutolaal búrom. 14Atijamit nápurempuren waciikimi bee mati kanewak koololaal kati majakut kajuumeneenimi bee mati wulaal mati man sílingaas siceeŋumi eeno. Nápurempuren ko aban nafaaŋenuko di ébaarey yati búpinab. 15Di mo’ome, Atijamit naŋoolenumi kurungaak kájakaatiaak di kati di kujuumak. Atijamit napuñeniimi fácul bukanak, ñátum kaŋooleniilak di ébaarey yati búpinab yati Apakenaau Áamakau. Nakammi man dúniyaay búrom ejukiil nan bukan kasofi kukuli nan aruukenumi kaŋoolenak koola. 16Moo kaane takum jimaŋ man an agamenuul mati wan uriemi mba wan uraanemi, mba mati karuuken káaningak kati jileeŋaj junkulaj mba funakaf fati kálebienak, mba káaning kuceen. 17Mukaanaam umu búrom mukankaan nan yáalinda ceb ñátum káyiisen walegen waatumi ebiley, ebiley yati Apakenaau Áamakau di fúko’ool. 18Takum jimaŋ man an abuntuul man joote éyiis kawalenooroak. Takum jimaŋ man an aanuul jimiiceelaet simaleeka, handeneen koonesoon kujujuk malegenam di sáaut. Anau ume arege akila nawalenoorowanlenooro joc, bare oo ká’aamakalenoor mati síwoonooras soola soo sati an ceb. 19Bare an akila asofut lit Apakenaau Áamakau, an eenomi fúkaaf fati eniiley búrom. Apakenaau Áamakau asenemi waaf eniiley man éliŋ ban naŋar súukas di ucilaw wooliyo anampen tákon, ban di ejaw fácul ñátum di kánkumak kati Atijamit. 20Muyuul jicetoocetoor di Apakenaau Áamakau, ban napakenuupaken di kánkumak kati majakutam mati dúniyaay uye. Wau kaane muyuul joom di kariiben sílingaas sati dúniyaay uye, saanomi nan use, 21“Takum usof sinaaŋas use, takum ujaken sinaaŋas usa, mba takum ugor sinaaŋas saasu” 22(kaliikiten kukila koo bati di bukanak kure’e ban kuwuujujaat kuban kare.) 23Malegen bukanak kusosof mati kajuumenumi sílingaas saanoe mo’ome kulinlolinlo, bare kaanut moo. Mati siceeŋeceeŋ jifaŋ man jimaŋe Atijamit máamak, joote kawalenoor máamak, ban joote kasofooro eniiluul. Bare di malegenam soo sibajut kánkum bee di emaŋey yajakutey yan anau abajumi bee ekaan di eniilool. ekaan di eniilool.

will be added

X\