KOLOSE 1

1Ínje Paul, áriiŋena ati Yensa, an Atijamit amukenumi man ikaan áriiŋena ati Apakenaau Áamakau, emmi di eciik letaraay di atiolaal ariiba Timoti. 2Eciikiciik bee di bukanak kati Atijamit kammi Kolose, kan umanje kuriiba kufiumaay di Yensa Apakenaau Áamakau. Emitey ekaan Atijamit Ampaolaal di Akiiyaolaal Yensa kuwuluul majakam di kásuumaay. 3Nanoosani nulakomi kúlawak bee mati muyuul, ban nusalesal Atijamit akammi Ampaau ati Akiiyaolaal Yensa Apakenaau Áamakau. 4Nujanjam mati kafiumak kooluul kan jibajumi di Apakenaau Áamakau Yensa di poop mati kamaŋak kan jibajumi bee di bukanak kati Atijamit. 5Jikankaan mo’omu mati fúgolumaf fooluul foofu bo di bukinab bajakaab man funeni. Kabiñoo di fúcitumaf jijanjam malegenam mati furimaf fajakaaf 6fáriiŋuluumi. Furimaf fajakaaf fákonaf fommi di ériiŋey dúniyaay búrom. Furimaf fukila di fúruŋul eroŋey yati bukanak banoosani, nan man fúruŋulumi yooluul di funakaf fútiyaaraf fan jijammi ban di jílaul malegenam mati kamaŋak káamakak kati Atijamit bee di kukaana majakut. 7Epafura, ápaaloli aroka áamak, o’omu ájeetumuluumi furimaf fajakaaf. Akila nakankaan aroka afiumaay ati Apakenaau Áamakau, ban oomu di kárambenoli di kapanak kooluul. 8Ban akila áregolimi mati kamaŋak kan Búyegetab Bátienaab busenuumi. 9Moo kaane, mati mo’omu wúli ukatut elawuuley kabiñoo nan utooŋumi ejamuuley. Nulalaw Atijamit mbi asenuul kálaul káriiŋe di wan amaŋumi, ñátum di malinlaam di kálaulak búrom kan Búyegetab Bátienaab boola busenumi. 10Moo baroŋerab booluul pámbulebien Akiiyaau ban di jikaan waaf wásuumool nanoosani. Moo panjifaŋ man jimanjool wuuj. 11Emitey ekaan Atijamit man awuluul kánkumool káamakak mbi jimuuten ban di jíliŋ máamak di wanoosani. Emitey ekaan Atijamit awuluul kásuumaak, 12mbi jisal Ampaau nanoosani, akammi man jiŋoolen jiyab bulaañab ban áligumi bukanak koola kammi di jáyiaj jati mawuŋam. 13Atijamit napakenolaapaken di kánkumak kati jáyiaj jati érimey man ájeetumulaami bee di jáyiaj jati Añoolool ati búsusool, 14kápurumul di oo wulaal ubajaami epakey, yoo eenomi, majakutam moololaal mubonketibonket. 15Apakenaau Áamakau oo eenomi búyesoorab bati Atijamit ájukeriitimi. Oo eenomi añiilau ániinaau átiyaarau afaŋumi katebo butuukab búrom bati dúniyaay. 16Apakenaau Áamakau kápurumul di oo Atijamit atuukumi wanoosani wammi di bukinab bajakaab di wammi baabe di dúniyaay, wájukeriitumi di wajukeimi, manteer kúyi mba jáyi mba kurunga, mba kati di kujuumak. Waafaw búrom útuukumituukum di oo di poop bee mati oo. 17Apakenaau Áamakau atooŋumi abajo, butuukab búrom boobu di kañenool. 18Apakenaau Áamakau oo eenomi fúkaaf fati eniiley yoola, foo eenomi fujojaf fati kuriibaak. Oo eenomi átiyaarau ayitoulomi di kacetumi mambi akaan átiyaarau di wanoosani búrom. 19Mati Atijamit di fúko’ool yeoomi man acin ríiŋ di Añiilau man abaj búyesoorab bati Atijamit. 20Kápurumul di oo Atijamit naŋarulomi kálauloorak kati wanoosani bee di fúko’ool. Atijamit akammi kásuumaay di bukinab bajakaab di dúniyaay uye ñátum di éyuey yati fúsimaf fati Añoolool di ébaarey yati búpinab. 21Muyuul, noo jíloiyooreenloiyoor di Atijamit ban di jikaaneenumi kulatoorool mati síwoonooruul sajakutas di ekaaney majakutuul. 22Bare iñeme kápurumul di ecetey yati Añiilau oola Atijamit nasukenumi bapaalaayab boololaal di fúko’ool bee káyiisen nan bukan káliroore, kátiene, ban kabajutumi kabet di bújonlenab boola. 23Bare muyuul joote ejuum líŋ ban di jirulen di kafiumak kooluul. Takum jilaañ kútoro di fúgolumaf fan jookumiñaa biñoo nan jijammi furimaf fajakaaf. Foo fúriiŋeniriiŋen bee di anoosani baabe di dúniyaay, ban ínje, Paul Atijamit amukenammi man íriiŋenufo. 24Ínje oomu di kamaayoor di bugaalab búmboom bee mati muyuul. Mati kápurumul bugaalab búmboom ínje oomu karamben man ifabel warinomi di bugaalab bati Apakenaau Áamakau kápurumul di eniiley yoola, yoo eenomi fujojaf fati kuriibaak. 25Atijamit nasenammi burokab bati kacookoor kati fujojaf foola mambi íriiŋen kurimak koola ríiŋ bee di muyuul Kakaanutumi Kúyahuudak. 26Simit sajuupoe kurimak uke kuyofeeniyof di úwoloorum wajuupoe wawuuje, bare iñeme kurimak uke kúyiiseniyiisen bee di bukanak koola. 27Atijamit fusofaf foola foo eenomi káyiisen bukanool wan ayofeenumi. Wayofoaaw uwe wáamakaw wáriiŋumi síwoonoor wan abajumi bee mati muyuul Kakaanutumi Kúyahuudak, poop. Wayofoaaw woo eenomi Apakenaau Áamakau oomu di muyuul, yoo eenomi panjinaamoor di mawuŋam mati Atijamit. 28Moo kammi, wúli núriiŋenriiŋen anoosani mati Apakenaau Áamakau. Nugamengamen ban nuliikiten anoosani ñátum di malinlaam man Atijamit ásenolimi, mati numammaŋ bee káyiiseniil Atijamit líroor bapaalaayab booliil di Apakenaau Áamakau. 29Ínje ninsi nirok máamak mati mo’omu, nan man inajomi kánkumak koola káamakak kammi burok di ínje.

will be added

X\