MUKAANAAM 9

1Saul narulenumi kakoolenak man amaŋ ebuj kuriibaak kati Akiiyaau, ban najawumi hani bee di ásimenaau áamakau 2ban nalawoomi man aciik siletara bee di kurungaak kati kukobak kati Atijamit kammi di Damasukos. Kaanjaat panatookubo hani ariiba ániine mba aseek an ati Buruŋab ban Akiiyaau áyiisenumi, man aŋoolen asofool ájeetumulool bakokene bee Yerusalem. 3Saul najawulomi alofen ésukey yati Damasukos, yaŋ too galab mawuŋ di múpurumul fatiya máfijijenulool! 4Ban nalomi tentaam, najammi furimaf faanoomi, “Saul, Saul wau kaane noom di kásuutukenom?” 5Saul naceeŋoomi, “Akiiyaau, au ai?” Furimaf di fommi, “Ínje Yensa, an au úsuutukenumi! 6Yito man ujaw bee di ésukey yáamakey, bampi an aate eregi wan ootumi ekaan.” 7Kúniinaak kan kujawoorumi di kujummi basankenut hani waaf, mati kujanjam furimaf bare kujukut hani an. 8Saul nayitoulomi ajuum ban náwambulumi kúcilool, bare aŋoolenut ajuk hani waaf. Ñaa di kusofool kañenak man kuruuoomi bee Damasukos. 9Ñaa nalako bo wáriiŋe kunak kúfeegiir ájukeriit, ariut ban araanut. 10Di bajumi ariiba aceen ati Damasukos kareesool Anania. Akiiyaau Yensa narajulo’oomi naanool, “Anania!” Nalaañenoomi, “Ínje oome, Akiiyaau!” 11Akiiyaau Yensa naanoomi, “Yito man ujaw bee di buruŋab ban koonemi Joon, banjaat nuceeŋ ati eluupey yati Yúda mati ániinaau ati Tarus an koonemi Saul. Oo oomu bo elawey, 12ban ínje najukumi waaf nan sáaut wati ániine an koonemi Anania ajawulo man aramben uñenool di akila, manteer mbi alaañ ajuk.” 13Anania nalaañenoomi, “Akiiyaau, bukan kajuupoe kureganreg mati ániinaau umu bújakaataab ban akammi bee di bukani kati Yerusalem. 14Ban oo oomu baabe nababaj fujuum kápurumul di kúsimenaak kunifaanak man asof kalawemi ñátum di kareesak kooli nan kulakoemi kamiiceelaeti.” 15Bare Akiiyaau Yensa naanoomi, “Jaw, mati nimukenoomuken nan érokumaom man ájeetum kareesom bee di Kakaanutumi Kúyahuudak di kúyi’iil, di poop bukanak kati Isirael. 16Ínje di fúko’om pániyiisenool buu naate egaal eeno mati kareesom.” 17Ñaa Anania najawumi áriiŋ, nanoken di eluupey dán Saul ammi, ban narembenumi kañenool títi Saul. Naanoomi, “Atiom Saul, Akiiyaau Yensa, árajulimi di buruŋab ban újawumulomi, áboñulammi manteer mbi ulaañ ujuk ban Búyegetab Bátienaab pambookeni.” 18Yaŋ too galab waaf waanoe nan uwel di úpurulomi ulo di kúcilak kati Saul, nalaañ ajuk. Ñaa nayitomi ajuum man átiigulenimi, 19ban narimmi sinaaŋ aban, nalaañumi áliŋeni. Kunak kupinaay Saul nalakobomi di kuriibaak kammi Damasukos. 20Piyout natooŋumi káriiŋen mati Yensa di kukobak, di aaney, “Oo eenomi malegen Añiilau ati Atijamit!” 21Kajamoomi di wáaloiimi, man kulako di kaceeŋoor, “Let oo alakomi kásuutukenak bukanak kati Yerusalem kalawemi di kareesak uke? Ban najawulojaw baabe bee mati mo’omu, mbi asofiil akoken man aruuiil asen kúsimenaak kunifaanak?” 22Bare Saul káriiŋenak koola kufaŋumi man kubaje kánkum, káyiisenak koola mati Yensa oo eenomi Apakenaau Áamakau Kúyahuudak kati Damasukos di sayiimi. 23Nan bajumi kunak kajuupoe, Kúyahuudak di kujamoorumi bee ebujool, 24bare Saul nabilumi amanj wan kusofumi mo’omu. Fuk di balay búrom di kulakomi kapooy kúlamutak kati ésukey manteer mbi kuŋoolen kubujool. 25Di fuk fákon kuriiba kuceen di kújupen Saul di katekel man kúyuunulool kútaasen fukukaf faŋomenumi ésukey. 26Saul náriiŋumi Yerusalem, naliikumi man kunaamoor di kuriibaak kati bo. Bare kufiumutool mati oo ariiba alegen ati Yensa, koo búromiil kúkolioomi. 27Banaabas naŋaroomi ájeetumoomi bee di kúriiŋenaak, ban naregiimi man Saul ajukumi Akiiyaau di buruŋab bati Damasukos eeno. Banaabas poop nasankeniimi wan Akiiyaau aregeenumi Saul, ban poop buu nalakomi káriiŋenak furimaf fati Atijamit di Damasukos, ñátum di kareesak kati Yensa, bákoliut. 28Saul insi nanoken nápur di kuriibaak di ésukey yati Yerusalem, 29mansi náriiŋen furimaf fati Atijamit bákoliut di kareesak kati Akiiyaau. Nalakomi kasanken kati kañoosoor di Kúyahuud kuceen kasankenemi Kúgirikak. Bare di kulakomi eñesey buruŋ bampi kúbujumool. 30Nan kuriibaak kujammi mati mo’omu, di kújeetumoomi bee di ésukey yati Kasaaria man kusenool bee di ésukey yoola Tarus. 31Kujojak kati kuriibaak kammi Yúdea, di Galili, di Samaria búrom, koo kulee di kásuutukenak. Búyegetab Bátienaab bukammi man kujojak kúliŋ ban di kubeneno nan man kúkolimi di Akiiyaau. 32Peter najawoorumi bee banoosani di bukoo búrom bee ejuk kúyinenaak, di kajaaburuŋak koola nabilumi bukanak kati Atijamit kammi di ésukey yati Luda. 33Boo natookumi ániinaau an koonemi Ainea man afinto di bacaac wáriiŋe simit futok di sífeegiir. Ániinaau akila an abakoe. 34Peter naanoomi, “Ainea, Yensa Apakenaau Áamakau nakaanikaan man ukoy. Yito man nutal bacaaci!” Yaŋ too galab nayitomi ajummi. 35Bukanak kati Luda di kati Saron di kujukumi Ainea, di kubilumi kukaan kuriibaak kati Akiiyaau. 36Di ésukey yati Yopa di bajumi ariiba aseek an koonemi Tabita, an Kúgirikak kuwonkemi Doruka, wan felumi woo eenomi ebonk. Nakaanekaan mukaana majake nanoosani ban naramben kabajutumi. 37Di kunak kukila nalomi bújuusa ban nacet. Kuceen kuñoomi biiŋool kuban, di kufintenubomi di kalimbis kammi di fatiyena. 38Mati man ésukey yati Luda elofumi Yopa, kuriibaak kujammi mati Peter oomu bo Luda. Di kuboñumi kúniine kugaba man koonoomi, “Bonket úwaakenul újo’ol takum upiyen.” 39Peter nayitomi kuriiboor. Nan áriiŋubomi, di kújeetumoomi bee di kalimbisak kammi di fatiyenaay. Kuseek kajuupoe kati kújima man kujuume kuŋomenool di búlok. Di kúyiisenoomi uloaaw wayiinkunaw di wáamakaw wan Doruka ajooneniimi nan aroŋumi. 40Bare Peter naregiimi man kúpur búrom bee téeŋey aban, nákuntaajenumi man alawumi. Ban najonlenumi biiŋab bati Doruka, man ammi, “Tabita, yito!” Aseekau najikerumi, nan ajukumi Peter, nayitomi alako. 41Peter nasenool kañen man ayitenool ajuum. Ñaa nawonkulomi kuriibaak di kuseekak kati kújimaak búrom, man áyiiseniimi mati oo narondoŋ. 42Kurimak di kufetumi di ésukey yati Yopa búrom, ban bukan kajuupoe di kúyinen úyegetiil di Akiiyaau. 43Peter nalakomi kunak kajuupoe di ésukey yati Yopa di ábala an koonemi Simon.

will be added

X\