MUKAANAAM 8

1Saul ákon di kukila kamaŋumi ebujey yati Sitefan joon. Kunak kukila kuriibaak kati fujojaf kammi Yerusalem kugagaal máamak man bukanak kulakomi kásuutukeniilak. Kúyinenaak búrom, manteer rino di kúriiŋenaak, di kuyiisoorimi bee di mofam mati Yúdea di Samaria. 2Kuceen kukankaan kukoba káamak di kufokumi Sitefan, ban di kulokoomi máamak mati moola. 3Bare Saul natooŋumi eŋarey yati bugaal báamak man akajen kati fujojaf. Najawejaw eluupooeluup, ban nákoñulul kúniine di kunaare mansi naradagenumi bee dán bukanak kukuleimi. 4Bare kúyinenaak kayiisoorumi Yerusalem ban di kujawumi káriiŋen furimaf fati Atijamit banoosani. 5Filip najawumi bee di ésuk yáamak yati Samaria man áriiŋeniimi mati Apakenaau Áamakau. 6Jameeŋey di éyentenumi jak wan Filip asankenumi, nan kommi di káyentenoolak di kujukumi wajamurerutimi wan alakomi ekaaney. 7Mati úgun di úpur di kan bookeneenumi kajuupoe, di karigoor káamak di kóro. Bukan kajuupoe kan kapan kati eniil ecetumi mba kabakomi di kukoy. 8Di bajumi kásuumaay káamak di ésukey yáamakey ekila. 9Ániine an koonemi Simon alakoeene dóo di ésukey yáamakey yati Samaria ban nakaan kati bo mansi wáaloiil. Biñoo no’ona ansi akaaneenumi fáliimaetaf ban nasofooro an áamak. 10Kusamariaak kambomi káŋarum añiil bee di anifaan, kumaŋemaŋ káyentenool tíen, di aaney, “Ániinaau umu eenomi kánkum kukila kati Atijamit kan kuwonkemi Kánkumak Káamakak.” 11Di kulakomi káyentenoolak, mati napiyopiyo di ekaaneeniil wáaloiil ñátum di fáliimaetaf foola. 12Bare nan kúyinenumi furimaf fajakaaf fan Filip áriiŋeniimi mati jáyiaj jati Atijamit ban poop mati Yensa oo eenomi Apakenaau Áamakau, kúniine di kunaare kajuupoe di kútiigulenimi. 13Simon di fúko’ool poop náyinenumi, ban nátiigulenimi ban nataatumi kariiben Filip. Di wáalo’oomi mati najujuk kúmanjum di wajamurerutimi wammi di ekaaniey. 14Nan kúriiŋenaak kammi Yerusalem kujammi mati bukanak kati Samaria kuyayab furimaf fati Atijamit di kufiummi, di kuboñumi Peter di Yohan bee di bukoo. 15Nan kúriiŋumi, di kulawiimi, mambi Búyegetab Bátienaab buwalo bee di bukoo. 16Mati no’onu boo buwalo’ooruteen bee di hani ákon di bukoo. Kútiigulieentiigul kuban ñátum di kareesak kati Akiiyaau Yensa ceb. 17Ñaa Peter di Yohan di kurembenumi uñeniil títi’iil di kuyabumi Búyegetab Bátienaab. 18Nan Simon ajukumi Búyegetab Bátienaab busenisen kápurumul di karembenak kati uñeniil títi’iil. Akila namaŋumi bee eseniil sígodi, 19man aaniil, “Jisenom kánkumak uke poop mambi anoosani nirembenumi kañenom, panayab Búyegetab Bátienaab.” 20Bare Peter nalaañenoomi, “Emitey ekaan au di sígodi’i jikaño mati nuwoonoowoonoor panuŋoolen ubaj kawulak kati Atijamit ñátum di sígodi! 21Au ubajut bucaab, mati Atijamit ajukumi búyegeti bujoonut di akila. 22Tíiwoor ukat bálamuk majakuti, ban nulaw Akiiyaau manteer mbi aŋoolen abonketi mati nubabaj kawoonoor kaanoe mo’omu. 23Nijujuk mati nubabaj búlat báamak di búyegeti di poop májoonaati múroogeniroogen.” 24Simon nalaañeniimi, “Jilawom Akiiyaau, wan jiregumiñaa takumbi usofom.” 25Nan Peter di Yohan kuseneenumi káyiisenak kooliil Samaria ban di kúriiŋenumi furimaf fati Atijamit, di kulaañumi bee Yerusalem. Nan kulakomi elaañey, di kúriiŋenumi furimaf fajakaaf di sísuk sajuupoe sati Samaria. 26Maleeka yati Akiiyaau di esankenumi Filip, di aaney, “Yito, jaw ujonkoor kañen kúrid di buruŋab bápurulomi Yerusalem bee Gasa.” Boo eenomi buruŋab bati baŋaanab. 27Filip nayitomi ajaw. Janten, oo di ejaay najukumi ániine ati mofam mati Etiop. Ániine ume aceekimi, aroka abaje fujuum fáamak, ban nakaan aroka ati áyiau anaaraau Kandake. Oo eenomi acookooraau ati fubajaf foola. Ániinaau umu najajaw Yerusalem man amiiceelaetumi Atijamit, 28ban nalakomi ejaay bóot. Nalakolako di sareetey yoola, balakoe kaliiken di búkaay yati aboñaau Yesaaya. 29Búyegetab Bátienaab di bommi Filip, “Waaken usoomen sareetey uyu.” 30Filip nateyumi asoomenool, ban najamoomi naliiken búkaay yati aboñaau Yesaaya. Ñaa naceeŋoomi, “Mante núlaulaul wan ommi di kaliikenak room?” 31Ániinaau nalaañenoomi, “Buu paniŋoolen ílaul an baliikitenutom?” Ban nammi Filip, “Mba újupoul man ulako ulofooraal.” 32Iñeme kapanak kati furimaf fati Atijamit kan alakoeenumi kaliikenak koo eenomi uke, “Nan esaha yan koom di eruu bee káraamul, nan jisaha jitunoor fácul jan ata jo aam di emiin bufalab boolijo. Jísaabulut butumab boolijo. 33Kupuñenool ban kusofutool di waaf kugamenutool di malegen. Ai abile bee eregolaal mati úwoloorumaw woola? Mati eroŋey yoola eŋariŋar baabe di dúniyaay.” 34Arokaau akila naceeŋumi Filip, “Bonket uregom, ai aboñaau ammi di eregey? Mati fúko’ool narege mba mati aceen ábuto?” 35Ñaa Filip nataatumi kasanken di furimaf fákonaf, ban naregoomi furimaf fajakaaf mati Yensa. 36Nan kulakomi ejaay di buruŋab, di kubilumi bee tan mumel mommi. Arokaau akila nammi, “Jiker! Mumelam moome! Wau woote káfirenom kátiiguleniak?” 37Filip naanoomi, “Úyinenjaat di búyegeti búrom pánutiiguli.” Nalaañenoomi, “Éey, níyinenyinen mati Yensa Apakenaau Áamakau oo eenomi Añiilau ati Atijamit.” 38Arokaau akila nájaatikenumi ati sareetey man ajuum, ban oo di Filip koo di kuwaloulomi kújupo di mumelam, man Filip átiigulenoomi. 39Nan kúpurulomi di mumelam, Búyegetab Bátienaab bati Akiiyaau di buŋarumi Filip bújeetumool. Arokaau akila alaañut ajukool, ban narulenumi di ejaay buruŋool di kamaayoorak. 40Di múlamukaam Filip narajulomi di ésukey yati Asoto, nájawunjawum ésuk bee di ésuk di káriiŋen furimaf fajakaaf bee nan áriiŋe ésukey yati Kasaaria.

will be added

X\