MUKAANAAM 7

1Ásimenaau áamakau naceeŋumi Sitefan, “Mante malegen kurege?” 2Sitefan nalaañenumi, “Kumpaom di kutiom, jíyentenom. Atijamit oololaal ati mawuŋam narajuloraj bee di afannaaniŋolaal Iburehima nan alakoeenumi mofam mati Mesopotamia, bala’a ajaw alako di ésukey yati Haran. 3Atijamit man aanoomi, ‘Púr mofam mooli di fiilaf fooli, man ujaw bee di mofam man eete éyiisi.’ 4Ñaa Iburehima nápurumi mofam mati Kaludea, man ajawumi acin Haran manteer bee nan ampaool acetumi. Niceen Atijamit nápurenulool bo ájeetumool bee di mofam man muyuul jicinumiñaa jaat. 5Bare Atijamit asenutool hani kapan kati mofam umu mambi akiluko, hani tampi kákamunool kutoboj. Manoosani Atijamit malegen náligeenoomi bee esenool bo, manteer mbi oo di úwoloorumool kukilumo, handeneen di nanan no’ona abajut añiil. 6Bare Atijamit poop naregoomi mati úwoloorumool panucin di mof mábutoe man kukaaniil kumiiceel ban di kúsuutukeniil wáriiŋe simit siceme sibakiir. 7Atijamit nammi, ‘Bare panagamen kampi kulakomi kamiiceelaetak ban koote épurul di mof mukila ban di kumiiceelaetom baabe.’ 8Atijamit poop nakammi kasofoor di Iburehima mati ekaaney futamp. Ñaa Iburehima abajumi Siyaaka natampool di funakaf futokey di fúfeegintenaf. Siyaaka abajumi Yankuba, Yankuba abajumi kuñoolool uñeney di kugabaak kakammi kufannaaniŋolaal Kúyahuudak. 9“Kufannaaniŋolaal, di kubajumi búlat di Esufa, man kunoomenoomi Misira. Bare Atijamit nalakolako di oo, 10man apakenoomi di bugaalab boola búrom. Ban Atijamit nasenoomi búyeget di malinlaam di bújonlenab bati Firauna, áyiau ati Misira. Oo nakaanoomi arokaool áfacula ati mofam di poop síndo’ool búrom. 11Di bajumi bacaar báamak babajoe di mofam mati Misira di Kanaan baŋarulo búyiik báamak. Kufannaaniŋolaal kuŋoolenut kubaj furi. 12Yankuba ajammi mati babaj muriaay mabajoe di mofam mati Misira, naboñumi kuñoolool kufannaaniŋolaal buruŋab bútiyaarab. 13Di ejaay yooliil egabunteney, Esufa nakammi man kútumbeool kumanjool, ñaa Firauna áyiau ati Misira nabilumi amanjumi fiilaf fati Esufa. 14Ñaa Esufa naboñ kúŋarul ampaool, Yankuba, di fiilaf foola búrom, koo káriiŋe bukan kooni bukan kúfeegiir di bútinken. 15Ñaa Yankuba najawumi bee Misira, ban boo oo di kuñoolool, kufannaaniŋolaal kucetumi. 16Kújeetumijeetum bee di ésukey yati Sukem ban di kufokimi búrom di fufokaf fan Iburehima anoomeenumi di sígodi kápurumul kuñiilak kati Haamor di Sukem. 17“Bare nanan nan báligab ban Atijamit áligeenumi Iburehima níriiŋumi, bukanolaal kammi Misira di kufaŋumi man kubenenoe máamak. 18Bare di múlamukaam, di bajumi áyi aceen di mofam mati Misira, amanjutumi Esufa. 19Áyiau o’omu nabuntumi kufannaaniŋolaal aban násuutukeniimi ban di kamingeniil man kubeten téeŋey muñiilam mooliil manteer mbi kucet. 20Di nanan no’onu noo Muusa awolimi, napinco máamak di bújonlenab bati Atijamit. Di kubaakenool wáriiŋe kuleeŋ kúfeegiir di síndeey yati ampaool. 21Nan man kúpurenuloomi bee téeŋey, añiilau anaaraau ati Firauna naŋaroomi tiabaakenool nan jiñoolool. 22Di kuliikitenumi Muusa di manlinlaam búrom mati kati Misira, nabilumi abaj kánkum di kurimool di bakaanerool. 23“Nan Muusa abajumi wáriiŋe simit bukan kugaba, nabajumi síwoonoor sati ejaw ejuk kuciloorool, bukanak kati Isirael. 24Funak fákon najujuk ániine Amisira man alakoe kásuutuken ákon di bukoo. Ñaa Muusa najawumi arambenool ñátum di kagalen wan Amisiraau akammi anau oola, di ebujool. 25Muusa nasosof manteer bukanool pánkulauleen mati oo Atijamit aam di ésenumiil kapakenak di kañenak koola, bare koo kúlaulut mo. 26Fati kajomaf najawumi bujukooriil inki ban najukumi kúniinaak kugaba Kúyisiraelak di kalakomi futiik. Ñaa najawumi bee ekaaniil man kujamoor. Nammi, ‘Kupaalom, muyuul batiaay, wau kaane di joom di futiik?’ 27Bare alakomi katiiken apaalool nafarumi Muusa apum, naanoomi, ‘Ai akaani árungaoli di ágamenaoli? 28Mante numammaŋ bee ebujom nan man ubujumi Amisiraau fuken?’ 29Nan Muusa ájamumomi, nateyumi ápur di mofam mati Misira man ajawumi acin di mofam mati Madiam. Boo nabajumi kuñiil kúniine kooni kugaba. 30“Nan simit bukan kugaba siwuujumi, maleeka di épurulomi Muusa dóo di jijofa jan sambun sommi di eyab di baŋaanab, kalofa fúlankiinaf fati Sinai. 31Muusa ajukumomi di wáalo’oomi. Nan ajawumi alofujo man ajuk jak, najammi furimaf fati Akiiyaau faanoomi, 32‘Ínje Atijamit ati kufannaaniŋi, Atijamit an Iburehima, di Siyaaka, di Yankuba kumiiceelaetumi.’ Muusa nalakomi kaleleben di kákoli ban akaañenut ajiker. 33Akiiyaau naanoomi, ‘Rúp usamatai, mati tan ujummiñaa tan líroore. 34Nijujuk tíen kásuutukenak káamakak kan kommi ekaaney di bukanom kammi di mofam mati Misira. Nijanjam man kúliileñaa. Ñaa nijawulojaw bee kapakeniil. Bil iñeme, paniboñi bee mofam mati Misira.’ 35“Muusa o’omu an bukanak kati Isirael kulatumi, di kuceeŋoomi, ‘Ai akaani arunga di agamena bee di wulaal?’ Oo emmi an Atijamit aboñulomi man arung bukanak, ban napakeniil ñátum di kánkumak kati maleekaay yarajulo’oomi dóo di jijofaaj jan sambunas sommi di eyabey. 36Narungumi bukanak man kúpur di mofam mati Misira, di éyiisen mukaana máamak máriiŋumi síwoonoor di kúmanjum di mofam mati Misira di Falaf Fáyemaaf, ban dóo di baŋaanab wáriiŋe simit bukan kugaba. 37Muusa oo aregumi bukanak kati Isirael, ‘Atijamit pánaboñuluul aboña kápurumul di bukanuul nan man áboñulammi.’ 38Muusa alakomi di fujojaf fati bukanak kati Isirael baabu di baŋaanab. Oo eenomi atitoora titoorey yati kufannaaniŋolaal di maleekaay yasankenoomi di fúlankiinaf fati Sinai. Nayabulomi kurim karoŋe bee esenolaal. 39Kufannaaniŋolaal di kulatumi ejamooley ban di kumoosoomi man úyegetiil usofumi elaañ bee mofam mati Misira. 40Di kommi Aaruna, ‘Jóonenoli simit siceen sampi sáyaboli fácul, mati Muusa umu ápurenulolimi di mofam mati Misira, wúli umanjut waa ubajool.’ 41Ñaa di kunak kukila di kufaañumi jint kukaanujo náati ban di kúsimen to. Di kukaan káaning man kúsuumenoor ñátum di barokerab bati uñeniil. 42Atijamit nakatiimi bálamuk ban naseniimi man kumiiceelaet bootab bammi kátula, nan man ciikimi di búkaay yati kuboñaak: ‘Wáay bukanak kati Isirael! Mante ínje jísimenummi, di baŋaanab wáriiŋe simit bukan kugaba? 43Jiteteb éguutey yati emitey Molok, di yootey yati emitey Rifan, sínaataas san jijoonenumi bee kamiiceelaetak. panikaanuul jípureni bee di mof mábutoe bálamuk Babilon.’ 44“Kufannaaniŋolaal kookenumi Éguutey yati Fúkambooraf di Atijamit boo di baŋaanab. Éguutey yákoney yoo Atijamit ájaatikeneenumi Muusa mampi ajooneneenuyomi eeno. 45Di múlamukaam, kufannaaniŋolaal kuyabeneenuyomi kápurumul di kumpaiil. Ban koo di Yahosua koo kujawumi di yóro nan kulakomi ebotey mofam di kati usankenaw wanaamutaw kan Atijamit akammi kúpureniil lói di mofam mukila. Boo elakomi bee mo di nanan nati di kunakak kati Dauda. 46Dauda moola músummi Atijamit, ban nalawoomi buruŋ bati eteep fukob fati Atijamit, an Yankuba amiiceelaetumi. 47Bare Sileimaan oo ateepufomi. 48Manoosani Atijamit Afaŋumi Katebo ácineriit di siluup san bukan kuteepe, nan man aboñaau aregumi eeno mati Atijamit. 49‘Bukinab bajakaab eenomi ejunkutom yati jáyiaj, man dúniyaay fútobojumaom. Akiiyaau nammi, eluup yaanoe buu joote eteepom, mba tei neete káyokulo? 50Mante lee kañenom kuteepe waafaw uwu búrom?’ 51“Muyuul bukan kan kúko kusaye! Muyuul kan úyegetaw di uwosaw ulookomi nan kamanjutumi Atijamit. Muyuul bukooku di elat Búyegetab Bátienaab nanoosani, nan man kufannaaniŋuul kukammi! 52Ai di kuboñaak kufannaaniŋuul kúsuutukenutumi? Koo kububuj kuboñaak káregaalimi ebiley yati Ajoonaau, an muyuul jípurumi man kusofoomi ban di jibujool. 53Muyuul kayabumi sílingaas sati Atijamit san símaleeka sisenumi ban jisofutuso líŋ.” 54Nan kugamenaak kati fugamenaf fáamakaf kujammi kurimak kati Sitefan, di bóli’iimi wút di kutooñoor mati oo. 55Bare Sitefan, nameeŋumi di Búyegetab Bátienaab, najikerumi bukinab bajakaab caw ban najukumi mawuŋam mati Atijamit, di poop najukumi Yensa man ajuume báridool. 56Sitefan naaniimi, “Jijiker, nijujuk bukinab bajakaab man búwambuloe, ban Añiilau ati anau ooma man ajuume di báridab bati Atijamit!” 57Ñaa bukoo di kucibulomi ban di kulookumi uwosaw wooliil ban di káloumoomi síñakon. 58Di kuradagenoomi kúpurenool di ésukey man kulako eleebooley sikooba bee ebujool. Kamaatumi di kunen wañiil wan kookenumi too di úkamunaw wati ápuraau an koonemi Saul. 59Nan kóomumi eleebooley bee ebuj, Sitefan nalawumi, “Akiiyaau Yensa, ŋar yuutom.” 60Nákuntaajenumi man acibulo man aane, “Akiiyaau! Takum usof majakutiil ume!” Nan aregumi mo’omu aban, nacet.

will be added

X\