MUKAANAAM 6

1Di kunakak uke kuriibaak kati Yensa di kommi di kabenenoak. Bare di bajumi kásuumaati kalakoeene tirooriil Kúgirikak kalaañumi bee di buruŋab bati Kúyahuud ban di kusanken Kúgirikak di Kúyahuudak kasankenemi Kúhiburak. Mati kasankenemi Kúgirikak koone kuseekak kati kújimaak kooliil kusofutiil di waaf bucaabiil bati funakoofunak. 2Ñaa kúriiŋenaak kooni uñeney di kugabaak di kuwonk fujoj kuriibaak kati di fujojaf búrom, di kooniimi, “Joonut man wúli ukat káriiŋenak furimaf fati Atijamit bee kacookoor mati furi. 3Kutiom, moo kaane, jimuken kúniine kooni futok di kugaba di muyuul kan ureesiil ujakumi ban di kulinlo, di poop kan Búyegetab Bátienaab bookumi, ban nusenaaliil burokab ube. 4Bare wúli di kúko’oli ñaa panujuum di kúlawak di káriiŋenak kati furimaf fati Atijamit.” 5Kati fujojaf búrom di yeiimi di wan kúriiŋenaak kuregiimi, ñaa di kumukenumi Sitefan, ániinaau abaje kafium káamak ban Búyegetab Bátienaab bookool. Di kumukenumi poop Filip, Pirokor, Nikanor, Timon, Parumen, di Nikola ati Antiok alaañumi asof buruŋab bati Kúyahuudak. 6Kúniinaak uke di kúyiisenimi bee di kúriiŋenaak. Ñaa kúriiŋenaak di kulawumi ban di kuremben uñeniil di aamaama. 7Furimaf fati Atijamit di furulenumi kafeteniak banoosani máamak. Jameeŋey yati kuriibaak di ebenenoe Yerusalem, ban hani kúsimena kati Atijamit kajuupoe di kubaj kafium di Yensa. 8Sitefan, ániinaau ameeŋe kawulak di kánkumak kati Atijamit man akaan, mukaanaam máamakam máriiŋumi síwoonoor di kúmanjum titoorey yati bukanak. 9Bare bukaaku di kujuumoor man kulako kañakoor di Sitefan. Bukanak kukila koo kati fukobaf fan koonemi Kakatenimi di Famiiceelaetaf (nan man kooneimi eeno), di kati Kurene di kati Alesandaria. Di poop kati mofam mati Kilikia, di kati mofam mati Asia. 10Bare kuŋoolenut kuñoosool mati Búyegetab Bátienaab bújaatikenoojaatiken wan Sitefan asankenumi. 11Ñaa di kubuntoorumi kúniine kuceen di kutunt, man koone, “Wúli nujamoojam di kasanken kurim káñiie mati aboñaau Muusa di Atijamit!” 12Di kusuulenumi bukanak, di Kúyahuudak kunifaanak, di kuliikitenaak kati sílingaas. Di kusofumi Sitefan man kújeetumool bee di fugamenaf fáamakaf. 13Ñaa di kújeetumulomi kúyiisena kubunta man kommi, “Ániinaau umu nanoosani nasankenesanken kurim káñiie mati fukobaf fáamakaf foololaal di sílingaas sati Muusa. 14Mati nujamoojam nareg mati Yensa umu ati Nasaret panafum fukobaf fáamakaf ufe ban náruŋul sílingaas san Muusa asenolaami.” 15Kalakomi búrom di fugamenaf fáamakaf di kujiker Sitefan caw. Di kujukumi mati buulool boonoboono nan bati maleeka.

will be added

X\