MUKAANAAM 5

1Di bajumi ániine an koonemi Ananias, oo di aseekool Safira poop di kujamoorumi man anoomenumi kalaakiil. 2Bare di kukok furim oo di aseekool man kuyof sígodi siceen, ban nájeetumulomi sarinomi anenuso too di úkamunaw wati kúriiŋenaak. 3Bare Peter naanoomi, “Ananias, wau kaane man Seetaanaay yooken búyegeti? Au nugaajoogaajoor bee di Búyegetab Bátienaab man uyof kapan kaaku kati sígodaas sati kalaakak kan unoomeneenumi. 4Kalaakak lee kooli bala’a unoomenuko, ban poop lee sígodaas sooli nan unoomenukomi uban. Wau kaane ñaa numaŋ man ukaan waafaw waanomi mo’omu? Lee au bukanak nugaajoore bare Atijamit.” 5Nan Ananias ajammi kurimak uku, nalotomi acet. Ban kajammomi búrom di kúkolimi máamak. 6Kúpuraak kúniinaak di kuyitoulomi man kuguubenoomi ñátum jíboocin ban di kutebumi biiŋab boola tikufok. 7Nan wuujutomi erigooraay sirig sífeegiir, aseekool nanokenulomi bamanjut wabajoeenumi. 8Peter naceeŋoomi, “Regom, mante sígodaas use jinoomenumi kalaakuul?” Naanoomi, “Éey, kare so.” 9Bare Peter naanoomi, “Buu kaane di jijamoor mákon bee eyink Búyegetab Bátienaab bati Akiiyaau? Jikeruma kúniinaak kafokumi atai kooku di butumab, pankutebi poop bee téeŋey.” 10Yaŋ too galab nalomi di úkamunaw wati Peter acet. Nan kúpuraak kúniinaak kúnokenuumi, di kútookuloomi man acete to. Ñaa di kutebool bee téeŋey kujaw kufok kalofa tan kufokumi ataool. 11Bukanak búrom kati fujojaf di kúkolimi máamak, ban poop kujanjam mukaanaam mabajomi. 12Kúriiŋenaak kúyiisenyiisen kúmanjum di mukaanaam máamakam máriiŋumi síwoonoor bee di bukanak. Kúyinenaak búrom di kujojenoorumi di Kañoonak kati Suleimaan. 13Di karinomi, hani an apuunut bee kanaamoor di bukoo, bare bukanak kutebeniimi fatiya di kálebien. 14Kúniine di kuseek kajuupoe káyinenumi di Akiiyaau Yensa di kufaŋ man kubenenoe di fujojaf fooliil. 15Nan kúriiŋenaak kulakomi ekaaney mo’omu, bukanak di kútebul káju’utumi kunen di uruŋaw, ban di kufinteniil di ucaac di silaak, manteer yáalindaay yati Peter mbi egor bukaaku nampi alakomi ewuujey. 16Bukanak poop di kubilumi kápurumul di sísukas saŋomenumi Yerusalem, di kújeetumul bukanak kan úgun usofumi, ban nasonteniil koo búrom. 17Ásimenaau áamakau ati Atijamit di kan koomoorumi, koo eenomi kati di fujuumaf fati Kusadusiak, kumemmeeŋ di búlat báamak bee di kúriiŋenaak. 18Di kusofumi kúriiŋenaak kubabiimi dán bukanak kukuleimi. 19Bare di fukaf fukila, maleeka yati Akiiyaau di éwambulumi kúlamutak kati dán bukanak kukuleimi, man épurenuliimi eban. Di yooniimi, 20“Jijaw jijuum di fukobaf fáamakaf, man jireg bukanak kurimak uke mati eroŋey yunkuley.” 21Kúriiŋenaak di kukammi wan maleekaay eregiimi, di waradabaw di kunokenumi fukobaf fáamakaf man kutooŋumi kaliikitenak. Nan ásimenaau áamakau ati Atijamit di kuriiboorool kúriiŋumi di kuwonkulomi tákon kugamenaak kati fugamenaf fáamakaf di poop kunifaanak kati Isirael. Ñaa di kuboñumi kúŋarul kúriiŋenaak fáculiil dán bukanak kukuleimi. 22Bare nan kupooyaak kati fukobaf fáamakaf kúriiŋumi, kutookutiil dán bukanak kukuleimi, ñaa di kulaañumi bee di kugamenaak kati fugamenaf fáamakaf man kooniimi, 23“Nutotook utumaw wati dán bukanak kukuleimi bakule rak, ban kupooyaak bukooku to man kujuume di kúlamutak, bare nan úwambulukomi, utookut ró hani an!” 24Nan arungaau ati kupooyaak kati fukobaf fáamakaf di kúsimenaak kunifaanak kujammomi, úyegetiil di ukaño máamak, di kawoonoor tan tei eete éreul. 25Yaŋ too galab an aceen nabilumi aregiil, “Jíyenten! Kúniinaak kan jíkulumi dán bukanak kukuleimi bukooku di fukobaf fáamakaf kaliikitenak bukanak!” 26Arungaau ati kupooyaak kati di fukobaf fáamakaf oo di kupooya koola kuceen di kujawumi kúŋaruliil. Bare bamingenutiil, mati kúkolieenkoli bukanak eleebiiley sikoobaas. 27Nan kúriiŋenaak kújeetumuliimi fáculey yati kugamenaak kati fugamenaf fáamakaf, ásimenaau áamakau naceeŋiimi. 28Di aaney, “Wúli núfireneenuufiren jáng kaliikiten bukanak ñátum di kareesak uku. Bare bee iñeme muyuul jooju man jimeeŋumi kaliikitenak kooluul baabe Yerusalem, ban jimammaŋ élaafoli mati ecetey yoola!” 29Bare Peter di kúriiŋenaak kuceenak di kulaañeniimi, “Wúli noote ejam fati Atijamit wuuj fati bukan. 30Atijamit ati kufannaaniŋolaal ayitenumi Yensa di kacetumi an muyuul jifaaŋenumi di ébaar. 31Atijamit natebenoomi di bukinab bajakaab man alakenoomi báridool nan Arungaau di Apakenaau, man akaan bukanak kati Isirael kútiiwoor kukat bálamuk majakutiil mbi Atijamit abonket majakutiil. 32Wúli eenomi kúyiisena kati wabajomi búrom, ban moo poop Búyegetab Bátienaab ban Atijamit awunumi bee di kajamoomi.” 33Nan kugamenaak kati fugamenaf fáamakaf kujammomi, di bóli’iimi wút man kumaŋumi bee ebujiil. 34Bare ákon di kati di fujuumaf fati Kufarisaak, an koonemi Gamaliel, aliikitena ati sílilingaas, ban bukanak búrom kúlebienoolebien máamak. Akila nayitomi ajuum di fugamenaf fáamakaf man ájaatikenumi man kúpureniil bee téeŋey jayiinkun. 35Ñaa nammi, “Bukanak kati Isirael, jíkaanum jak wan jimaŋumi bee ekaaney di kúniinaak buke. 36Di kéel kawuujumi babaj Teuda nayitouloyito man aane oo an áamak, ban bukan káriiŋe siceme sibakiir di kuriibenoomi. Bare nabujimi, kariibenoomi di kuyiisoorumi nañ, ban moola too mure’e. 37Oo are’etoorumi aban, nanan nati epiney bukanak Yúda ati Galili nayitoulomi nañakulomi bukanak bee di fúko’ool man kuriibenoomi. Oo poop nabujimi, kariibenoomi di kuyiisoorumi nañ. 38Moo kaane ínje eem di ereguul wan ujukaamiñaa mukaanaam umu, jíloiuul di kúniinaak buku man jikatiil sicebiil. Kaanjaat wan kusofumi bee ekaaney woo wati di kúkoiil, woo letuwuuj panukaño. 39Bare kaanjaat waaf woo wati Atijamit, leejiŋoolen jikajenuwo. Ŋooleŋŋoolen kaan muyuul di kúkouul bukan kaam di katiiken Atijamit fúko’ool!” 40Kugamenaak kati fugamenaf fáamakaf di kusofumi kagamenak kati Gamaliel ban di kuwonkulomi kúriiŋenaak. Di kuregumi kupooyaak man kutekiil, ban di kúfireniimi kuregiil takum kulaañ kusanken waaf ñátum di kareesak kati Yensa, ban di kukatiimi man kujaw. 41Kúriiŋenaak di kúpurumi di fugamenaf fáamakaf, di kulakomi kamaayoorak, mati kupinipin nan bukan kabajumi fúkaw man kugaal mati kareesak kati Yensa. 42Funakoofunak, di fukobaf fáamakaf mba sísindoiil, kúlaañeriit bálamuk kaliikitenak di káriiŋenak Yensa oo eenomi Apakenaau Áamakau.

will be added

X\