MUKAANAAM 4

1Nan Peter di Yohan kulakomi kasankenak bee di bukanak, kúsimenaak kuceenak kati Atijamit, di arungaau ati kupooyaak kati fukobaf fáamakaf, di Kusadusiak kuceenak di kúriiŋuliimi. 2Bukanak buku di súumaati’iimi mati kúriiŋenaak kalakomi kaliikiten bukanak mati Yensa nayitouloyito di kacetumi, mo’omu múyiisenumi bukanak kacetumi pánkuyitoul bee di eroŋey. 3Di kusofiimi kunen dán bukanak kukuleimi bee mo fati kajomaf, mati bala’ab bujonjon. 4Bare kajuupoe káyentenumi kurimak di kúyinenumi, ban jameeŋey yooliil di ériiŋ bukan káriiŋe síwili futok. 5Fati kajomaf kurungaiil, di Kúyahuud kunifaan kuceen, di poop kuliikitenaak kati sílingaas, búromiil di kujojumi Yerusalem. 6Annas ásimenaau áamakau oo namamaatubo, Kayafas, Yohan, Alesandar, di bukaaku kammi di fiilaf fati ásimenaau áamakau di búkoro. 7Di kújeetumuliimi kujuumen titooriil, man kuceeŋiimi, “Di kánkum kei, mba di karees kei, jommi di ekaan mo’ome?” 8Ñaa Peter nameeŋenimi di Búyegetab Bátienaab, naaniimi, “Kurunga di kunifaan kati mofam moololaal. 9Jaat muyuul jíceeŋoliceeŋ tíen mati mukaana majake man ukammi di ániine abakoe, buu nasontenimi eeno, 10moo muyuul di bukanak búrom kati Isirael cenceeŋ man jimanj kánkumak kati kareesak kati Yensa Apakenaau Áamakau ati Nasaret kukoyenumi ániinaau ume, moo kaane akila oomu man ajuumeñaa fáculuul. Umu eenomi an muyuul jifaaŋeneenumi di ébaarey yati búpinab bare Atijamit náyitenuloomi di kacetumi. 11Oo eenomi fukoobaaf fo’ofu fan kuteepaak kulateenumi, bare foo fulaañumi fulako di égooleney yasofumi líŋ kukukak kati eluupey. 12Bajut fúpakum fuceen leejaat di oo, mati bajut karees kuceen di dúniyaay búrom kampi anau aate épakum.” 13Kugamenaak kati fugamenaf fáamakaf di wáaloiimi man kujuk basankenerab bati Peter di Yohan bákoliut, mati di kumanjumi buku kujawut kaliikiten. Ban di kúlaulumi mati koo kulakoeenlako kariiboor di Yensa. 14Bare di kujukumi ániinaau asonteneenimi man ajuume to titooriil, bajut wan koote elaañen kureg. 15Di kooniimi kúpur di fugamenaf fáamakaf, ban di kúlakodomi kajamoor. 16Di aaney, “Waa nootaale ekaan kúniinaak buku? Mati manjomanjo di bukanak búrom kati Yerusalem mati kukila kukankaan wajamurerutimi. Ban letuŋoolenaal uñoosaal mo mati bajout. 17Bare mampi makammi takum kúriiŋen titoorolaal di bukanak. Mbi ukoolenaaliil takum kulaañ kusanken bee di an ñátum di kareesak uku.” 18Ñaa di kúwonkuliimi ban di kupankiimi takum kusanken mba kaliikiten jáng ñátum di kareesak kati Yensa. 19Bare Peter di Yohan di kulaañeniimi, “Manteer jonjoon di bújonlenab bati Atijamit man úyenten muyuul wuuj Atijamit, joote kagamenooro. 20Wúli letuŋoolen ukat wan ujukumi di wan ujammi.” 21Kugamenaak kati fugamenaf fáamakaf di kufaŋumi man kukooleniil, bare di múlamukaam di kukateniimi kujaw, bajut buruŋ bampi kuŋoolen kútekumiil, mati bukanak. Mati bukanak búrom kooku di esaley Atijamit mati wabajoeenumi. 22Ániinaau an wajamurerutimi ukammi ákoyum, oo nababaj wawuuje simit bukan kugaba. 23Nan kukatenumi Peter di Yohan, di kulaañumi bee di kupaaliil kuriiba man kuregiimi wan kúsimenaak kunifaanak di Kúyahuudak kunifaanak kuregeeniimi. 24Nan kujammi mati mo’omu kuban, koo búrom di kucibulomi man kulawumi Atijamit di búyeget bákon di kommi, “Arungaau Akiiyaau, atuukumi fatiya di tentaam, di falaf di wanoosani wándomi. 25Ñátum di Búyegetab Bátienaab booli au núsankenumumi áfannaaniŋoli Dauda, arokai, nan ammi, ‘Wau kaane Kakaanutumi Kúyahuudak di bóli’iimi máamak? Wau kaane bukanak di koom di kawoonoor waaf útiikaar? 26Kúyiak kati dúniyaay kujonjoojonjoor mati futiik, ban kurungaak di kujojumi tákon, man kujuumoor di Akiiyaau, di kujuumoor di Apakenaau Áamakau oola.’ 27Herod di Pontius Pilat kúkamboorumi di ésukey yáamakey uye koo di Kakaanutumi Kúyahuudak di bukanak kati Isirael man kujuumoor di Yensa Apakenaau Áamakau, arokai álirooraau, an au umukenumi man akaan Apakenaau Áamakau. 28Kujojumi tákon man kukaan wan au usofeenumi panubajo mati nubabaj kánkumak ban numammaŋ man ukammo. 29Iñeme, Akiiyaau, úyenten kakoolenak kooliil, ban nusen buruŋ kurokai man kúriiŋen kurimak kooli di kapeeto. 30Úyiisen kánkum kooli, nan wúli ommi kasonten bukanak káju’utumi, ékaanoliey ukaan wajamurerutimi di mukaanaam máamakam máriiŋumi síwoonoor di kánkumak kati kareesak kati arokaau ooli álirooraau Yensa.” 31Nan kubanumi elawey uye, dán kulakomi fujojaf di líliŋenoorumi, ban búromiil Búyegetab Bátienaab bookiil ban di kúriiŋenumi furimaf fati Atijamit bákoliut. 32Kúyinenaak búrom di kubaj kawoonoor kákon di búyeget bákon. Bajut hani ákon di bukoo aane waafaw uwe oo akile cebool, bare wanoosani wan kukilumi búromiil too kure’e. 33Ban ñátum di kánkum káamak kúriiŋenaak di kusenumi káyiisenak kooliil mati káyitoulak kati Yensa di kacetumi, Atijamit náyiisenyiisen majakam máamakam moola bee di kuriibaak koola. 34Bajut hani ákon di fujojaf aceeŋumi waaf. Mati kuceen kakilumi ulaak mba ulimbis di kunoomenuwomi, ban di kújeetumul wan kubajumi, 35ban di kunenuso too di úkamunaw wati kúriiŋenaak man kucaab anoosani wan ceeŋumi man abaj. 36Moo bajumi Esufa, an kúriiŋenaak kuwonkemi Banaabas (yoo eenomi, Áliŋena). Oo ati fiilaf fati Lewi, ati fúrinkaf fati Sipur. 37Oo nanoomenumi kalaakool aban nájeetumul sígodaas man anenusomi too di úkamunaw wati kúriiŋenaak.

will be added

X\