MUKAANAAM 3

1Funak fákon Peter di Yohan di kulakomi karemboor bee fukobaf fáamakaf, no’onu man ríiŋe erigey éfeeginteney di tutularaay, nanan nan kulawemi Atijamit. 2Ániine abakoe awoli di móro, an kújeetumemi di fúlamutaf fati fukobaf fáamakaf. Funakoofunak tikunenool kapanenaak kati fo, fan kuwonkemi Fúlamutaf Fapincoaaf, mansi alaw sadaay bukanak kabilemi bee di fukobaf. 3Nan ajukumi Peter di Yohan di ejaw bee kanoken dó, nalawiimi máamak, man kusenool waaf. 4Peter oo di Yohan kujikeroomi caw, ban Peter nammi, “Jíkeroli!” 5Ániinaau abakomi najikeriimi jak, di esof mati panabaj waaf di bukoo. 6Bare Peter nammi, “Ínje ibajut hani égodi, bare paniseni wan ibajumi. Di kánkumak kati kareesak kati Yensa Apakenaau Áamakau ati Nasaret, yito ujaw!” 7Peter násofuloomi ñátum di kañenak kúridak ban náyitenulool ajuum. Yaŋ too galab, ániinaau úkamunool di kújuulool di kubaj kánkum. 8Ban nabaalumi fatiya, ajuum jaj, man ajawumi ban nanokenumi di fukobaf fáamakaf di bukoo, di ejaay, di ebaaley, di esaley Atijamit di móro. 9Bukanak búromiil kujukool oo di ejaay nasal Atijamit di móro. 10Nan kúlaulumi mati oo eenomi alakoeenenumi man alaw sadaay di Fúlamutaf Fapincoaaf fati fukobaf fáamakaf. Koo búrom di kuwonlo ban di wáaloiimi mati wabajoeenumi di akila. 11Nan oo aŋoonumi Peter di Yohan di kañoonak kan koonemi Kañoonak kati Solomon, bukanak búromiil di wáaloiimi di kúteyul bee ban kommi. 12Nan Peter ajukumi bukanak, mo’omu, naaniimi, “Bukanak kati Isirael, wau kaane di kaanuul síwoonoor mati wabajeñaa, ban di jíjikeroli mo’omu? Mante jisosof wúli nubabaj kánkumak di kúko’oli? Mante jisosof wúli uŋoolenumi ukaan mati wúli kukoba káamak? 13Atijamit An Iburehima, di Siyaaka, di Yankuba, di Atijamit An kufannaaniŋolaal kumiiceelaetumi, nasensen kálebienak kateboaak bee di arokaool Yensa di ekaaney mo’omu. Yensa o’omu ákonau, an muyuul jípurumi man kusofool ban di jilatool di bújonlenab bati Pilat, hani nan Pilat asofeenumi bee kakatenool. 14Muyuul jilalat Yensa, an áliroore ban najoon. Ban jilawumi man kukatenuul abuja, 15ban jibujumi akaanemi bukanak man kubaj eroŋey. Bare Atijamit náyitenuloomi di kacetumi, ban wúli eenomi kúyiisenaak wan akammi. 16Kánkumak kati kareesak kati Yensa koo kakammi man ániinaau umu asonteni. Wan jijukumi di wan jimanjumi ukaaneenimi ñátum di kafiumak di kareesak koola. Kafiumak di Yensa koo kukammi man asonteni akoy jaj, nan man muyuul búrom jijukoomi. 17“Kupaalom, iñeme nimammanj mati wan jikammi bee di Yensa kámanjaati, nan man kurungauul poop kukammi. 18Bare Atijamit nakammi kuboñaool man kúregeenaalimi, mati Apakenaau Áamakau aate egaal, iñeme nálirenumomi. 19Jítiiwoor jikat bálamuk majakutam inki, ban jilaañ bati Atijamit mambi abonket majakutuul. 20Ñaa nanan nikila pánniriiŋ nan Akiiyaau aate esen káyokuloak bee di muyuul, ban pánaboñuluul Yensa inki Apakenaau Áamakau ooluul. 21Oo aate kalako di bukinab bajakaab bee nampi Atijamit akammi wanoosani búrom wunkul, nan man Atijamit áligeenumi kápurumul di kuboñaool kálirooraak no’ona nan piyaay. 22Muusa nammi, ‘Akiiyaau Atijamit panamukenuul aboña kápurumul di kutiuul nan man amukenammi eeno. Muyuul joote káyentenool di wanoosani nareguumi. 23Anoosani ayiiŋutumi aboñaau akila, oo pankukatoor di bukanak kati Atijamit ban panabuji.’ 24Ban kuboñaak búrom kasankenumi kuban, káŋarum aboñaau Samuel di aboña anoosani ariibenoomi di áregaalimi mati wabajoeñaa iñeme. 25Muyuul úwoloorumaw wati kuboñaak kukila, di wati kasofoorak kan Atijamit áligeenumi kufannaaniŋuul. Mati Atijamit nasankenumi Iburehima, ‘Di bálamukab bati úwoloorumaw wooli, kiilak kati dúniyaay búrom pankubaj kásuumaay.’ 26Nan Atijamit amukenumi arokaool, namonde áboñuloomi bee di muyuul, man asenuul kásuumaay ñátum di ekaan anoosani man átiiwoor akat bálamuk majakutool.”

will be added

X\