MUKAANAAM 27

1Nan usofumi mati wúli noote eŋar busaana báamak man útip bee mofam mati Italia. Paul di kuceen kan kukuloorimi di kusenimi arunga Yulio, oo ati di Kayooŋak kati Áyiau Áamakau, man ajikeriil bee nan kúriiŋe di ésukey yáamakey yati Róoma. 2Ban nújupomi busaana báamak bápurumulomi di kásikak kati ésukey Aduramit, balakoe ejaay bee di úsikaw wati mofam mati Asia, ban nújawumumi útip. Ániine aceen ati Amakedonia, an kareesool eenomi Arisitariko ápurumulomi Tesalonika, oo poop dóro. 3Fati kajomaf núriiŋumi di kásikak kati Sidon. Yulio nakammi Paul jak, man akatenool ajaw ajuk kupaalool kuriibaak man kuŋoolen kusenool wan ceeŋumi. 4Nan úpurumi Sidon, járusey elakolako énagul bújonlenoli, nujawumi ukot kafeefak kaaku kati fúrinkaf fati Sipur manteer nupak di yo. 5Ñaa nútipumi bee kañen kúrid falaf fáamakaf fati Kilikia di Pampulia biyok úriiŋulomi Mura yati Lukia. 6Boo arungaau ati kutiikaak atookumi busaana báamak bápurumulomi Alesandaria man boom di ejaay bee Italia. Nájaatikenolimi man újupo di busaanaab bukila. 7Wúli nulakomi ejaay di bo jayiinkun jayiinkun kunak kupinaay di mátaañie máamak ban núriiŋumi Kunid. Járusey ésenutoli buruŋ hani jayiinkun man újawum bo, ñaa nukotumi kafeefak kati fúrinkaf fati Kurete, nusuusoorumi ésukey yati Salimon. 8Nujawumi ulofumi di kafeefak kati fúrinkaf di mátaañie máamak ban núriiŋumi kásikak kan koonemi Tan Tíene, kalofa ésukey yati Lasaia. 9Nanan najuupoe niwuwuuj di bo. Kajawoorak kóololi di kufaŋ man kútaañie máamak. Mati iñeme hani karuukenak kati káaningak kati Funak Fáamak fati Kabonket fuwuwuuj. Paul naseniimi kagamenak uke, 10man ammi, “Kupaalom, nijujuk mati kajawoorak koololaal káŋarum taate iñeme pánkukooleni máamak. Pambaj búyiik báamak di úrookaaw, di busaanaab, di poop síñunduolaal siŋooleŋŋoolen sire to.” 11Bare Yulio arungaau ati kutiikaak nalatumi ejamey wan Paul aregumi, bare nafaŋumi man ajame wan ateyenaau arungaau ati busaanaab di akilubomi kuregumi. 12Mati kásikak kukila kujakut man kulako to di nanan nati ñonkañ. Moo kaane, kuroka kajuupoe kumaŋumi ejaw fácul bee Fineka man kújawum bee di falaf kusuusoor kásikak kati fúrinkaf fati Kurete, ban di kumaŋ man kukobubo bee nan ñonkañ ñiwuuje. 13Nan járusey yanagulomi kañen káridak jayiinkun jayiinkun, kurokaak kati busaanaab di kusofumi mati kuŋooleŋŋoolen kútip nan man kusofeenumi eeno. Ñaa di kúpurenumi éjuumenuma man kujaw kukot kalofa kásikak fúrinkaf fati Kurete. 14Bare fárusaf fáamakaf fan koonemi “Jifarubalin” di fápureuumi di fúrinkaf man foom di kágaalenoli máamak. 15Fárusaf fáamakaf fukila di funagulomi di kánkum, kuŋoolenut kútiiw busaanaab man bujuudoor di fo. Ñaa nukatubo man fárusaf man fújeetum bo. 16Nújawumumi útip di kafeefak kati káyinomi jírink jati Kauda. Boo wúli nuraagaraagal di mátaañie, manteer usofumi jisaanaaj jati kapakenak uremben jak manteer takum jikaño. 17Kuñakulojomi kuremben di busaanaab báamakab ban nukokenujomi jak. Mati kúkolikoli busaanaab pambusay di kaluusak kati kásikak kati Suriti, ñaa di kuwalenumi kafulak kati busaanaab man kukatenubo man sijawoor di fárus. 18Furabooraf, fárusaf fáamakaf di lonkosey di sifaŋumi man siyitoe mansi sínagoli máamak. Kurokaak kati busaanaab di kutooŋumi kápuren úrookaaw kubeten di falaf. 19Funakaf fúfeegintenaf, di kubeten múrokumaiil málebiaam kubeten di falaf. 20Kunak kajuupoe, fárusaf di furulen di enagey máamak. Wúli ujukut bala’ab di bootab, bee nan ubilumi ubaj kafium kati epak di múlamukaam. 21Mati kammi di bo piyopiyo kubajut furi, Paul nayitomi ajuum di fáculiil man ammi, “Kupaalom, pánjiyenteneenom, létutipeenulaal di Kurete, leetunokeneenaal búyiikab ube babajolaañaa. 22Bare nilawuulaw jibebenooro! Hani an di muyuul letaceturer, handeneen busaanaab pambukaño. 23Di fukaf fawuujuñaa, maleeka épurumulomi di Atijamit, akilammi di poop an imiiceelaetemi, áboñulammi maleeka man ejuume kalofa di ínje, 24man yommi, ‘Paul, takum úkoli, mati au noote ejuum bújonlenab bati Áyiau Áamakau! Mati Atijamit di bálamukab booli panakaan kalakomi kajawoor di au man kuroŋ.’ 25Kupaalom, jibebenooro! Mati níyinenyinen di Atijamit, panakaan nan man aanammi eeno. 26Bare fárusaf panfufarolaal man uja’aal bee di fúrink fuceen.” 27Kunakak uñeney di kubakiirak fuk di balay, wúli kooku bo kayuunoore dóo di falaf fati Aduria. Bare titoorey yati fukaf, kurokaak kati busaanaab, di kusofumi mati wúli nulolof téeŋey. 28Di kuyuunumi mulap múliikuma di kúmeelomi kujukumi mati kásankiak kati falaf kúrindiiŋ símeetar sooni bukan kugaba. Upum ubenen jayiinkun ceb di kulaañ kúmeelo di kujukumi mati kásankiak kúrindiiŋ símeetar kabanan di uñen. 29Kurokaak kati busaanaab kúkolikoli tikere busaanaab pambuloŋ kúlankiin, ñaa di kubetumi síjuumenuma sibakiir bálamukab bati busaanaab. Ñaa di kulawumi di kasomben man bala’ab burab. 30Kurokaak kati busaanaab báamakab kulakomi eñes buruŋab bati epak di busaanaab bukila. Ban kuwalenumi jisaanaaj di mumelam, di kabetenelenoor kati síjuumenuma saasu fáculey yati busaanaab báamakab. 31Bare Paul nammi Yulio arungaau ati kutiikaak, “Kaanjaat kúniinaak kurokaak kulakout déere di busaanaab, leejiŋoolen jipak.” 32Ñaa kutiikaak di kumiinumi unewaw wasofumi jisaanaaj jati kapakenak man jijaw. 33Bala’a waradabaw, Paul nalawumi bukanak man kuri waaf. Naaniimi, “Jaat kaanumi kunak kooni uñen di kubakiir di nanan une búromuul bariut waaf. 34Ínje eem di elawuul máamak man jiri, pansenuul kánkum. Hani kal kákon di fúkaaf fati an léekujim déere.” 35Nan Paul aregumi mo’omu aban, naŋarumi fúmbuur man asal Atijamit fáculiil búrom, natingufomi man atokoñ. 36Koo búrom di kúliŋenimi ban kurimi muri maamu. 37(Kálakodomi di busaanaab koo búromiil kúrindiiŋ bukan kooni siceme sigaba bukan kúfeegiir di bútinken di ákon.) 38Nan kurimi kupooñ, di kubetenumi muriaam marinomi di falaf bee kagumbul kálebiak kati busaanaab man buhiili. 39Nan bala’ab burabumi, kurokaak kati busaanaab kujujuk baŋaanab, bare kúlaulut man kootumi ériiŋubo. Ñaa di kujukumi kaŋoma ban kásikak kommi. Di kusofumi mati kaanjaat paŋŋoolen kaan man kuteyen busaanaab bukila man kujaw kujuumen bo di kásikak. 40Ñaa di kumiinumi unewaw wati síjuumenumaas kukatuso ró di falaf fáamakaf. Di kufelumi unewaw síñakon wasofumi éweenumaay. Ban di kuyitenumi kafulak fáculey yati busaanaab man érusey efarubo éjeetum bee di kásikak. 41Bare busaanaab báamakab di buloŋumi manteer buluufo di tentaam buŋoolenut bujaw. Fáculey yoolibo di eloŋumi fúrinkaf fati faluusaf eluufomi. Bálamukab boolibo di bukañomi jaj mati lonkosey yáamakey enagulo bo. 42Kutiikaak di kusofumi bee ebuj kakulimi takum hani an aloy apak. 43Bare Yulio arungaau ati kutiikaak namaŋumi kapaken Paul, ñaa náfirenumi takum kukaan wan kusofumi. Ñaa naregumi kaŋoolenumi jaloyaj man kutooŋ kubaal kulo dóo di mumelam man kútip bee di kásikak. 44Ban naregumi karinomi man kuŋar ubabar mba úpenjum wati busaanaab man kuriiben. Mo’omu moo, wúli úriiŋumi búrom úpakumumi bee di kásikak.

will be added

X\