MUKAANAAM 25

1Kunak kúfeegiir fácul Fesitos áriiŋulomi Kasaaria man alako di ejunkutey yoola ban najawumi bee di Yerusalem. 2Ban kúsimenaak kurungaak kati Atijamit di Kúyahuud kunifaan kuceen di kuregoomi mati kasankenak kooliil man kutaaken Paul. Di kulawumi Fesitos, 3man arambeniil man Paul áŋaruli bee Yerusalem, mati tooke kukokok furim fati emep mbi kubujool. 4Bare Fesitos nalaañeniimi mati Paul oomu bo man kukule di ésukey yáamakey yati Kasaaria, ban oo di fúko’ool panalaañ bee bo iñeme. 5Ñaa nammi, “Ñaa jikat man kúniine kuceen kabajumi fujuum man ujawoor bee bati Kasaaria man kutaakenool, kaanjaat ániinaau umu nalolo, jikat man kutaakenool.” 6Fesitos akaanubomi di bukoo wawuujut kunak kooni futok di kúfeegiir mba kunak uñen nalaañumi bee di Kasaaria. Fati kajomaf nalakomi ejunkutey yati fugamenaf ban nájaatikenumi man Paul áŋaruli. 7Nan Paul áriiŋulomi, Kúyahuudak kájawulumi Yerusalem di kujummi kuŋoobenool, man kutooŋumi kataaken Paul máamak, bare kuŋoolenut kúyiis wan kuregumi mati Paul ukankaan malegen. 8Bare Paul nasankenumi furim bee kapakenooro, “Ínje ilaturerut hani jayiinkun bee di sílingaas sati Kúyahuudak, mba hani bee di fukobaf fáamakaf, mba hani bee di Áyiau Áamakau.” 9Bare Fesitos, namammaŋ man ásuumen Kúyahuudak, man aceeŋoomi, “Mante numammaŋ man ulaañ bee Yerusalem man igameni bo mati kasankenak uke?” 10Bare Paul nalaañenoomi, “Ínje oome man ijuume taate too eenomi fugamenaf fáamakaf fati Áyiau Áamakau, ínje neetumi kagameni to’otu. Au di fúkoi numammanj tíen mati ínje ikajenut waaf bee di Kúyahuudak. 11Kaanjaat nikankaan waaf wáriiŋe man kubujom, ínje iñesut buruŋ bampi ípakumumi di ecetey. Bare kaanjaat bajut malegenam di wan kutaakenammiñaa, moo hani an abajut buruŋ bee esofom man aseniil kubujom. Ínje ilawe Áyiau Áamakau.” 12Fesitos di kugamenaool nan kujamoorumi kuban nalaañenumi, “Nulalaw bee di Áyiau Áamakau, ñaa bee di Áyiau Áamakau noote ejaw.” 13Nan bajumi kunak kupinaay áyiau Agiripa oo di aseekool Beronika di kúriiŋulomi Kasaaria man kusaaf Fesitos. 14Di kulakobomi kunak kupinaay, noo Fesitos aregumi bee di áyiau mati kataakenak kájeetumimi bati Paul. Nammi, “Babaj ániine, an Felis akule ammi baabe. 15Nan ilakomi Yerusalem, kúsimenaak kunifaanak kati Atijamit di kunifaanak kuceenak kati Kúyahuudak di kújeetummi kasankenak man kutaakenoomi ban di kulawom man igamenool mati waaf nakajene. 16Ínje nilaañeniimi mati wúli Kúroomanak úkaaneriit esof an ataakenimi usenool bukanak kataakenoomi bajuudoorut. Ban nabajumi buruŋ man asankenool mati oo alout. 17Nan kujawulomi síñakon baabe, ipiyenut. Fati kajomaf nilakomi di ejunkutey yati fugamenaf ban nájaatikenumi man akila ájeetumimi. 18Bare nan kutaakenaool kujummi bee kasankenak, kújeetumulout kataakenoolak jáng kan isofeenumi pankukammo. 19Bare, nijujuk wan kulakomi kañoosoor mati buruŋab booliil di mati an koonemi Yensa acetumi, bare an Paul alakomi karegen di kamingen narondoŋ. 20Mati ínje imanjut mampi ikammi man igamen kasankenak ko’oku, niceeŋumi Paul manteer namammaŋ ejaw bee Yerusalem man kugamenool bo mati kasankenak uke. 21Bare Paul nalawumi man aneni dán kukobemi bagamab mambi Áyiau Áamakau ating bagamab. Ñaa ínje niregumi kulaañenool dó tínok bee nampi iboñoomi bee di Áyiau Áamakau.” 22Agiripa nammi Fesitos, “Ínje nimammaŋ bee éjamum ániinaau di fúko’ool.” Fesitos nalaañenoomi, “Joote ejamool kajom!” 23Fati kajomaf, Agiripa di Beronika kuriibooruloriiboor di karuukenak kati kayooŋ kabaje kánkum, di kúlebieniimi mati wan kukaanemi. Ban di kunokenumi di eluupey yáamakey yati fujojaf di kurungaak káamakak kati kutiikaak di kunifaanak karungumi ésukey. Fesitos naboñ furim man kúŋarul Paul. 24Fesitos nammi, “Áyiau Agiripa di muyuul búrom kamaatumi taate. Jijujuk ániinaau umu, an Kúyahuudak kati baabe di kati Yerusalem búromiil kujawulomi kulawaam, di kucibulomi man koone, oo ceeŋut man aroŋ. 25Bare di síwoonooras súmboom ijukut wan akaane wajakut wáriiŋe ebujool. Nan man oo di fúko’ool alawumi Áyiau Áamakau man ating bagamab boola, ínje nisofumi bee eboñool bee dó. 26Bare ibajut waaf wátiene man iciik isen bee di Áyiau Áamakau mati oo letiŋoolen ireg uwe neete eciik bee di Áyiau Áamakau. Moo kaane, níjeetumulool bee di bújonlenuul, tan au ommi di fúkoi, Áyiau Agiripa. Man uceeŋaalool kasankenak koola, ubanaal, mambi iŋoolen ibaj waaf bee eciik. 27Mati nisosof bajut fúkaw eboñ an akulimi báyiisenut tíen wan kútaakenumoomi.”

will be added

X\