MUKAANAAM 24

1Kunak futok fácul Ananayas, ásimenaau áamakau ati Atijamit, náriiŋumi Kasaaria, oo di kunifaan bukaaku kati Kúyahuudak di Tutulo, amanjaau áamakau ati sílingaas. Di kujawulomi fácul Felis man kúyiisen wakammi kataakenak Paul. 2Di kuwonkulomi Paul, Tutulo natooŋumi káyiisen anifaanau wakammi man kutaaken Paul, “Anifaanau áamakau Felis! Núsenolisen man ubaj kásuumaay kapiyoe di furungaf fooli falinloaaf. Mati báruŋulerab bajuupoe ban ceeŋumi bubajobajo mati mofam moololaal. 3Wúli súumolisuum máamak nanoosani wan ukammi banoosani di buruŋ banoobani. 4Bare, imaŋut bee kajuupen kasankenak, manoosani nilawilaw kabonket man uwulom kawos wayiinkun man úyentenoli wabajomi. 5Mati wúli nujujuk di ániinaau ume akaana búyiik, ban nayitenumi kájiisoorak titoorey yati Kúyahuudak kammi dúniyaay búrom. Oo arunga ati fujuumaf fan koonemi Nasarin. 6Oo poop nalakomi karaagal bee kasiken fukobaf fáamakaf fati Atijamit, noo núsofuloomi. 7bare Lusia arungaau áamakau ati kutiikaak nabilumi di kamingenumi nabotool di úñenoli. 8Lusia nájaatikenoli man úyiiseni wakammi nutaaken ániinaau ume fáculi. Uceeŋujaat ániinaau umu, au di fúkoi panuŋoolen úlaul di oo, wakammi man wúli utaakenoomi búrom malegen.” 9Kúyahuudak bukaaku di kubilumi, man kujamoorumi kataaken mati furimaf fan Tutulo aregumi malegen. 10Nan arungaau Felis ayitenumi kañenool man Paul ayito asanken. Paul nalaañenumi: “Ínje nimammanj mati au nukankaan agamena ati mofam ume, biñoo no’onu simit sajuupoe. Ñaa súumansuum man isanken mati múmboom fáculi. 11Nan man au di fúkoi nuŋooleŋŋoolen numanj tíen, mati wawuujut kunak uñen di kugaba bálamuk nan ijawulomi bee Yerusalem bee kamiiceelaet Atijamit. 12Kúyahuudak kujukurerutom niñoosoor di an, mba níŋarul kasuulen jameeŋ yati bukan di fukobaf fáamakaf, mba di kukobak, mba di ésukey fúkouyo. 13Kúniinaak buke malegen leekuŋoolen kúyiisen wan kutaakenammi man koone nikankaan. 14Bare wákon ilatutuwo mati ínje oomu di kariiben Buruŋab, ban kommi kaanut buruŋ balegen. Ínje oomu di kamiiceelaet Atijamit ati kufannaaniŋolaal. Bare poop níyinenyinen máamak di wanoosani waciikimi búrom di sílingaas sati Muusa di síbukaas sati kuboñaak. 15Nibabaj kágolumak kákonak di Atijamit, nan bukoo kukaanemi, mati Atijamit pánayitenul kacetumi bee di eroŋey, bukanak búrom, kajoonumi di kajoonutumi. 16Moo kaane ínje neem di eliik ekaan búyegetom bútien di bújonlenab bati Atijamit di poop bukanak. 17Nan bajumi simit sipinaay sawuuje, nilaañumi bee Yerusalem sígodi sati kawulak di sóro bee karamben bukanom di poop bee ekaan búsimen bati Atijamit. 18Mo’omu moo nilakomi ekaaney di kutookammi di ekaaney yati katilulak di fukobaf fáamakaf fati Atijamit. Bajut jameeŋ di ínje mba káguuloor. 19Bare Kúyahuud kuceen kápurumulomi di kapanak kati Asia koo bo, ban kukila koote épurul fáculuul man kútaakenumom, kaanjaat kubabaj wampi kutaakenom. 20Mba kob man kúniinaak buke di kúkoiil kusanken, wan kujukumi man ikajenumi nan kujuumenammi fáculey yati kugamenaak kati fugamenaf fáamakaf. 21Rino waaf wákon wan icibulomi nan ilakomi titooriil, ‘Jaat ínje oome man jommi di kagamenom, mati níyinenyinen mati kacetumi pákuyitoul bee eroŋey.’” 22Felis, afaŋe man abaje fumanj fátiene mati Buruŋab, namaŋumi kapumen buliikoorab man ammi, “Nampi Lusia, arungaau áamakau ati kutiikaak Kúroomanak áriiŋulomi, paniwoonoor kasankenak kooli.” 23Nájaatikenumi arunga aceen ati kutiikaak man Paul aneni dán kukobemi bagamab, bare jisenool buruŋ bati ebaj fúko’ool jayiinkun, ban takum jífiren kupaalool bee kacookoor wan ceeŋoomi. 24Nan bajumi kunak kupinaay Felis di aseekool Durusila, akammi Áyahuud, di kubilumi. Naboñumi éwonkul Paul man ajantenool, waa eenomi kafiumak di Yensa Apakenaau Áamakau. 25Nan Paul arulenumi kajaloor waa eenomi majoonam, di kasofooroak, di poop bagamab bábileuumi bati Atijamit bee di bukanak búrom, Felis nawonlomi. Nalaañenumi, “Púr taate, yayaj bee mati jaat, ibajujaat nanan panilaañ iwonki.” 26Di nanan nikila Felis nabajeembaj fúgolum timaa Paul panasenool sígodi sati kabuntoor. Mati mo’omu, pansinawonkool man kúmik. 27Nan bajumi simit sigaba, Porikio Fesitos naŋarumi ejunkutey yati Felis nan anifaanau. Bare mati noo Felis namaŋeemmaŋ karamben Kúyahuudak, nakatumi Paul dán bukanak kukuleimi.

will be added

X\