MUKAANAAM 23

1Paul najikerumi caw kati fugamenaf fáamakaf man aaniimi, “Kutiom, bee mo di funakaf fati jaat, di búyegetom ínje ibajut kamanteer wan ikammi di eroŋey yúmboom búrom di bújonlenab bati Atijamit.” 2Ananayas, ásimenaau áamakau ati Atijamit, nasenumi furim kalofutomi Paul man kutek butumool. 3Paul naanoomi, “Atijamit panateki! Au fukuk fafiite! Mante au man ulakoñaa bee kagamenom kápurumul di sílingaas, ban au di fúkoi nukammi wan sílingaas sífirenumi man ooniil kutekom!” 4Kajuumutomi kulof Paul, di koonoomi, “Jé! Ásimenaau áamakau ati Atijamit an au ujelumi!” 5Paul nalaañeniimi, “Há! Kutiom, ínje imanjut mati oo ásimenaau áamakau ati Atijamit, mati ciikiciik, ‘Takum usanken furim fati kajel bee di arunga ati bukani.’” 6Paul ajukumi mati kugamena bukaaku kati fugamenaf fáamakaf koo eenomi Kusadusi ban bukaaku Kufarisa, ñaa nasankenumi fatiyaay, “Kutiom, ínje Afarisa, kuwolaom Kufarisa. Ban ínje oomu taate man koom di kagamen mati kágolumak kan ibajumi mati Atijamit pánayitenul kacetumi bee di eroŋey.” 7Nan Paul aregumi mo’omu aban, Kufarisaak di Kusadusiak di kutaatumi kañoosoor, fujojaf di fucaaboorimi upan ugaba. 8Mati Kusadusiak kufiumut babaj káyitoulak di kacetumi, mba simaleeka, mba búyeget, bare Kufarisaak koo kufiunfium mati uru búrom ubajobajo. 9Kakaawak di kufaŋumi man kúkalaae. Kuliikitena bukaaku kati sílingaas kammi di fujuumaf fati Kufarisaak, di kuyitomi kujuum man kukammi kasanken mulobaam, “Wúli ujukut wan akammi wajakut di ániinaau ume! Timaa ŋooleŋŋoolen kaan mba maleeka malegen esankenool.” 10Kañoosoorak di kufaŋ man kubaje kánkum biyok arungaau áamakau ati kutiikaak Kúroomanak ákolimi, mati Paul pankucaarulool banoobani. Ñaa namandoorumi kutiikaool kujaw kúpurenul Paul ñátum di kamingenool di bukoo, ñaa man kújeetumool bee dán bukoo kulakoemi. 11Di fukaf fukila Akiiyaau narajulomi alofool ban nammi, “Beben búyegeti! Nan man ulakomi káyiisen mati ínje baabe Yerusalem, moo mákonam noote káyiisen poop Róoma.” 12Fati kajomaf Kúyahuud kuceen di kukokumi furim, ban di kubaatumi Atijamit mati leekuri, leekuraan bee nampi kubujumi Paul. 13Di bajumi kalakomi ebaatey kawuuje bukan kooni bukan kugaba. 14Di kujawumi kutookumi kúsimenaak kunifaanak kati Atijamit di kunifaan kuceen kati Kúyahuudak, man kommi, “Wúli nukokok lit furim ban nubaatumi di Atijamit mati leturider hani waaf bee nampi ubujumi Paul. 15Muyuul di kati fugamenaf fáamakaf joote ejaw bee di arungaau áamakau ati kutiikaak Kúroomanak man álaañenuluul Paul, ban di jikaanalenoor nan jimammaŋ bee emanj uceen di oo. Bare wúli súm panujonjoor man ootumi ebujooley bala’a áriiŋul taate.” 16Bare Paul ásampulool najammi wan kusofumi mati bee emepooley, najawumi bee dán kutiikaak kulakoemi, ban naregumi Paul mati mo’omu. 17Paul nawonkumi ákon di kurungaak kati kutiikaak man aanoomi, “Jéetum ápuraau ániinaau umu bee di arungaau áamakau ati kutiikaak Kúroomanak. Nababaj waaf wan aate eregool.” 18Ñaa arungaau ati kutiikaak nájeetumoomi bee di arungaau áamakau ati kutiikaak Kúroomanak man aanammi, “Paul, an ukulumi awonkaam man aanammi, íjeetumuli ápuraau ániinaau ume mati nababaj waaf wan aate eregi.” 19Arungaau áamakau ati kutiikaak Kúroomanak nasofoomi ñátum di kañenak, man aceromi, man aceeŋoomi, “Waa numaŋe bee eregom?” 20Ásampulau ati Paul naanoomi, “Kurungaak kati Kúyahuudak bukaaku kujamoojamoor bee elawi kajom man kújeetum Paul bee di kugamenaak kati fugamenaf fáamakaf, man kukaanalenoor bee emanj uceen di oo faŋ man tíene. 21Bare bonket takum úyenteniil! Mati babaj kúniine kawuuje kooni bukan kugaba kammi man kumepe mambi kúloumool. Di kukokumi furimaf lit ban di kubaatumi di Atijamit man kúligumi tákon bati leekuri leekuraan bee nampi kubujumi Paul kuban. Iñeme bukooku man kujonjoore bee ekammo, ekobiey wampi au uregumi.” 22Arungaau áamakau ati kutiikaak Kúroomanak nammi, “Takum ureg hani an ákon mati au nureganreg mati mo’ome.” Ban nakatenumi ápuraau man ajaw. 23Arungaau áamakau nawonkumi kugaba di kurungaak kutiikaak koola, man ájaatikenumi man aaniimi, “Nanan nati sirig futok di sibakiir fukaraay, jijonjoor kutiika kooni siceme sigaba di kutiika kátiikumemi ñátum sipilingas kooni bukan kúfeegiir di uñen, di poop kutiika kátiikumemi ñátum ubaayaw kooni siceme sigaba, man kujawoor manteer bee Sisaaria. 24Jijonjoor poop sipiling saasu san Paul aatumi bee éjawumey, man jíjeetumool jak bee bati anifaanau Felis.” 25Arungaau áamakau ati kutiikaak kati Kúroomanak naciikumi letara uye bee di anifaanau mo’omu: 26“Anifaanau áamakau Felis, ínje Kilaud Lusia nusaafisaaf. 27Ániinaau umu an íboñeuliñaa, Kúyahuud kuceen kusofoosof man kumaŋeenumi bee ebujool. Bare nan ijukumi oo nababaj fujuumaf fati Kúroomanak, nijawumi di kutiikaom man ipakenool. 28Ínje nimaŋeemmaŋ bee emanj wakammi Kúyahuud kuceen di kommi di kataakenoolak. Ñaa ínje níjeetumuloomi fáculey yati kugamenaak kooliil kati fugamenaf fáamakaf. 29Ínje nibilumi ijuk mati bajut waaf wan akajene wáriiŋe ekulool mba ebujool. 30Bare nan íijamumomi mati babaj furim fan kukoke bee ebujool, nikaaniimi man kújeetumulool galab bee di au. Nájaatikenjaatiken kutaakenaool poop man kújeetum kúyiiseni wan akajenumi fáculi.” 31Di fuk fukila, nan man kújaatikenimi eeno, kutiikaak di kújeetummi Paul bee di ésukey yati Antipatiri. 32Fati kajomaf, kutiikaak di kulaañumi bee dán kulakoemi, ban di kukatumi kutiika kátiikumemi ñátum sipilingas man kujawoor. 33Nan kúriiŋumi Kasaaria, di kusenumi letaraay anifaanau Felis ban di kujuumenumi Paul fáculool. 34Anifaanau naliikenumi letaraay aban, naceeŋumi Paul mofam mei nápurumulo. Nan ajammi mati Paul Kilikia nápurumulo, 35Anifaanau nammi, “Panijam di au nampi kutaakenai kúriiŋulomi.” Ban nájaatikenumi man kukul Paul ban di kupooyool di puretori, eluupey yáamakey yati anifaanau yan Herod Áamakau ateepumi noo.

will be added

X\