MUKAANAAM 22

1Paul nammi, “Kumpaom di kutiom, jíyentenom man ireguul wabajomiñaa!” 2Nan kujamoomi nasankeniil di Kúhiburak, di kufaŋumi man katunten sii. Ban nammi, 3“Ínje Áyahuud, awolimi di ésukey yati Tarus yati Kilikia, bare Yerusalem nibaake ban niliikenliiken di kañenak kati Gamaliel. Naliikitenanliikiten man eete kariiben sílingaas sati kufannaaniŋolaal. Ban nirundum kab mukaanaam mati Atijamit nan man muyuul búromuul jirumeñaa jaat eeno. 4Ban ínje ísuutukenumi kalakomi eriibey Buruŋab ube manteer bukaaku kucet. Nikankaan man kusof kúniine di kuseek ban di kukuliil dán bukanak kukuleimi. 5Ásimenaau áamakau ati Atijamit di kugamenaak kati fugamenaf fáamakaf koo búrom kuŋooleŋŋoolen kureg mati malegenam nirege. Mati niyabuloyab siletara di bukoo man íjeetumi isen kurungaak Kúyahuudak kati Damasukos, ñaa nijawubomi man isof kuriibaak kati Yensa bee kálaañenuliil bee Yerusalem manteer mbi kuteki. 6“Nan ilakomi ejaay, Damasukos man ije’e manteer ilofoyo, di nanan nati kajuum balaraay yaŋ too galab mawuŋ di múyahulammi bukinab bajakaab fijijij. 7Ban nilomi tentaam ban nijammi furimaf faanammi, ‘Saul, Saul, wau kaane noom di kásuutukenom?’ 8Ban nilaañenoomi, ‘Akiiyaau, au aima?’ O’omu naanoomi, ‘Ínje Yensa ati Nasaret, an au ommi di kásuutukenakuñaa.’ 9Bukanak kalakotomiñaa kariiboorak kujukeenjuk mawuŋam, bare kujameenut alakomi kasankenomak. 10Ban nemmi, ‘Akiiyaau, waa neetumi ekaan?’ Akiiyaau naanammi, ‘Yito, ban nujaw bee di Damasukos, úriiŋubojaat pankuregi wan ootumi bee ekaaney.’ 11Nan iŋooleneenutumi ilaañ ijuk mati kánkumak kati mawuŋam mukila. Ñaa kalakotomi kariiboorak di kuruuammi bee Damasukos. 12“Di ésukey yáamakey ekila di bajumi ániine an koonemi Anania, akoba áamak asofumi jak wan sílingaas soololaal siceeŋumi eeno ban Kúyahuudak kacinubomi búrom di kusankenumi moola jak. 13Oo nabilumi atookom to ban naanammi, ‘Atiom Saul, jiker inki!’ Ban no’onu nilaañ ijukool! 14Ban naanammi, ‘Atijamit ati kufannaaniŋolaal amukeni man umanj kamaŋak koola, di poop man ujuk Ajoonaau Ákonau, nujam furimaf fúkoufo fápurumulomi di butumool. 15Mati panukaan áyiisenaool bee di bukanak búrom wan ujukumi di wan ujammi. 16Ñaa iñeme, wau kaane noom di ekob? Yito ban nukaan man kútiiguleni, ban nukaan man Atijamit atiluli majakuti, ñátum di ewonk kareesak kati Akiiyaau.’ 17“Nan ilaañumi bee Yerusalem, nijawumi bee di fukobaf fáamakaf bee elawey, nijukumi waaf nan sáaut 18ban nijukoomi an aanammi, ‘Waaken man núpur galab Yerusalem, mati bukanak kati baabe leekufium wan ootumi káyiiseniilak mati ínje.’ 19Bare nemmi, ‘Akiiyaau, bukoo di kúkoiil kumammanj tíen mati ínje ikammi man kunoken di fukob fanoosani man kuñesumi káyinenumi di au ban di kusofiimi man kukuliimi kunagiimi. 20Sitefan di kubujoomi mati man alakomi káyiiseniilak mati mooli. Ínje di fúko’om bajuume to súumansuum koo ebujooley. Hani ínje man ilako di kaakenumi uloaiil.’ 21Bare Akiiyaau naanammi, ‘Jaw, paniboñi ban lóie bati Kakaanutumi Kúyahuudak.’” 22Bukanak kulakolako di káyentenak Paul, bee nan Paul áriiŋulomi di furimaf ufe. Di kutooŋ kucibuloorumi síñakon, “Ániinaau umu ápur di mofam! Naate ecet.” 23Di kucibuloorumi, di kúloopulumi uloaiil, di kuliis fatiya, ban di kúrunten kaporak di móro. 24Arungaau áamakau ati kutiikaak Kúroomanak, nasen buruŋ man kújeetum Paul, dán kutiikaak kulakoemi ban di kutekool mambi kumanj wakilumi, man Kúyahuudak kurigoorool nan mo’omu mati oo. 25Nan kulakomi kakokenak kati Paul bee etekooley, nammi arungaau ati kutiikaak antomi man ajuume, “Mante jibabaj buruŋ bati etekey an abaje fujuum fati Kúroomanak bagamenutool?” 26Nan arungaau ati kutiikaak ajammomi, nalaañumi bee di arungaau áamakau ati kutiikaak Kúroomanak, man aceeŋoomi, “Waa numaŋe bee ekaan? Ániinaau ume abaje fujuum fati Kúroomanak.” 27Ñaa arungaau áamakau ati kutiikaak Kúroomanak najawulotomi, ban naceeŋumi, “Regom, mante au nubabaj fujuum fati Kúroomanak?” Paul nalaañenumi, “Éey.” 28Arungaau áamakau ati kutiikaak Kúroomanak nalaañenumi, “Ínje poop, nicancaam máamak bee ebajey fujuumaf ufe fati Kúroomanak.” Paul nammi, “Bare ínje niwoliwol di fo!” 29Kutiikaak bukaaku kamaŋeenumi etekool di kúceeŋ di móro mambi Paul, aregiil di kukatoomi galab. Arungaau áamakau ati kutiikaak Kúroomanak fúko’ool poop nabilumi ákoli mati namammanj oo an abaje fujuum fati Kúroomanak, ban akila akaane man kuŋooben Paul di ñiwuj. 30Fati kajomaf, arungaau ati kutiikaak di emaŋey bee emanj fiit wakilumi man Kúyahuudak kúsuutukenool. Furabooraf, nasen furim man kufeloomi bakokerab, ban naregumi kurungaak kati kúsimenaak kati Atijamit kugamenaak kati fugamenaf fáamakaf búrom man kujojumi tákon man kujamoor. Ban nakammi man kújeetumul Paul man kujuumenool di bújonleniil.

will be added

X\