MUKAANAAM 21

1Nan ukatoorulomi di bukoo kunifaanak kati fujojaf fati Efes, nuŋarumi busaana báamak man ujonlen útip bee fúrinkaf fati Kos. Fati kajomaf núriiŋumi Rodo ban nujawumi bee Patara. 2Boo nujukumi busaana báamak balakoe ejaay Fonekia yati Siria, nuŋarubo man útip. 3Nan ulofenumi nuŋandenumi fúrinkaf fati Sipur, ban nukatufomi kañen kumay man uwuujumi úriiŋumi kásikak kati Turo yati Siria, ban busaanaab bootumi kawalenak búrookaab boolibo. 4Wúli nutookubomi kuriiba kuceen nulakomi di bukoo kunak kooni futok di kugaba. No’onu Búyegetab Bátienaab burungeniimi man kuregumi Paul takum ajaw bee Yerusalem. 5Nan wúli kunakak kóololibo kubanumi, nukatiimi man ulaañ urulen kajaaburuŋak kóololi di busaanaab. Kúniinaak búromiil, di kuseekiil di kuñooliil, di kúpur ésukey man kuyiireniil bee di kásikak, boo busaanaab bommi. Wulaal búrom núkuntaajenaami di kafintak kati falaf fáamakaf man ulawaami ban nukatooraabomi. 6Ñaa wúli nújupomi busaanaab báamakab, ban koo di kulaañumi bóot. 7Nan kajaaburuŋ kóololi di busaanaab kubanumi kápurumul Turo núriiŋumi Putoleme, ban nusaafumi kúpaaloli kuriibaak, nulakobomi funak fákon ceb. 8Fati kajomaf nujawumi bee Kasaaria ban nuwannoorumi síndeey yati Filip, áriiŋenaau ati furimaf fajakaaf, oo akammi ákon di kúniinaak futokey di kugabaak kamukenimi Yerusalem. 9Nababaj kuñiil kúmajiraak kooni kubakiir kayabo’oorutumi, koo kubabaj kawulak kati káriiŋenak furimaf fati Atijamit. 10Nan ulakomi di ésukey yati Kasaaria kunak kupinaay, aboña ati fujojaf an koonemi Agabo náriiŋuubomi kápurumul di mofam mati Yúdea. 11Nan abilumi bee éjukoli, naŋarumi kálilak kati Paul man agolenooro uñenool di úkamunool. Ban nammi, “Búyegetab Bátienaab buregumi Kúyahuudak kammi di Yerusalem koote kakoken akilumi kálilak uke nan mo’ome. Kukila poop pankusofool kusenool Kakaanutumi Kúyahuudak.’” 12Nan wúli kalakomi ujammi mati mo’omu, wúli di kalakobomi nulawumi Paul takum ajaw bee Yerusalem. 13Bare Paul nalaañenumi, “Wau kaane man jommi di búruuren? Jikajen búyegetom! Mati ijonjoorut mambi kukulom Yerusalem ceb, bare poop mambi icetumi di kareesak kati Akiiyaau Yensa.” 14Nan uŋoolenutumi úpurenool di wan asofumi di búyegetool, nukatoomi man ulawumi, “Súumujaat di Atijamit, mbi kamaŋak kati Akiiyaau kukaan.” 15Nan bajumi kunak nujojumi waafaw wóololi man ujawumi kajaaburuŋ bee Yerusalem. 16Kuriiba kuceen kápurumulomi Kasaaria poop kútooñolimi ban di kújeetumolimi bee di síndeey yati Manason ati fúrinkaf fati Sipur man uwannoor. Oo akammi ariiba apiyoe. 17Nan úriiŋumi Yerusalem, kúpaaloli kuriibaak di kúyaño’olimi di kamaayoorak di kóro. 18Fati kajomaf Paul nujawoorumi di wúli nujajaw bee di Yankuba, ban tikutookumi kunifaanak búrom kati fujojaf fati Yerusalem di kumaatumi. 19Nan kusaafoorumi kuban, Paul naregumi anoosani mati wanoosani wan Atijamit akaanoomi man aramben titoorey yati Kakaanutumi Kúyahuudak kápurumul di burokab boola. 20Nan kujammi mati mo’omu, di kusalumi Atijamit. Bare di kommi Paul, “Nujujuk átioli, Kúyahuud káriiŋe síwili sajuupoe kúyinenyinen. Koo búromiil kubabaj fuuñ fati emaŋ man kusof lit sílingaas sati Muusa. 21Kujanjam di kasankenemi mooli man koone wan uliikitenemi Kúyahuudak búrom kacinumi di mofam mati Kakaanutumi Kúyahuudak man kukat bálamuk wan sílingaas sati Muusa siceeŋumi. Koone mati au oomu bo kaliikiteniil takum kutamp kuñooliil mba kuriiben mukaanaam muceenam mati Kúyahuudak. 22Waa wúli oote ekaan iñeme? Mati pankujam tíen mati au nujawulojaw. 23Moo kaane bonket ukaan wan wúli ootumi eregiey. Wúli nubabaj kúniine kooni kubakiir kakammi kabaat di fácul Atijamit. 24Ŋar kúniinaak buke ban au di fúkoi jijawoor tákon man jikaan katilulak, jibanjaat nucaam man kúciikiil kunangund. Moo bukanak búrom pankujuk mati wan kujamuñaa mooli ubajout, bare au di fúkoi mbi uriiben man ukaan jak wan sílingaas sati Muusa siceeŋumi eeno. 25Bare man kúyinena Kakaanutumi Kúyahuudak, wúli nubomboñ letara wan uceeŋiimi, woo eenomi takum kuri muria másimenimi sínaati, takum kutokoñ eluw yati énukuruŋ yáraamuluti mba yabajumi fúsim, ban takum kufinto di aseek mba ániine ati an kuyaboorutumi.” 26Fati kajomaf Paul naŋarumi kúniinaak ban di nakammi man kutiluliil oo di dóoro ban najawumi bee di fukobaf fáamakaf. Ban naregumi fácul bukan nei kunakak kati katilulak kootumi eban di poop eseney búsimen bee mati anoosani di bukoo. 27Nan kunakak futokey di kugabaak kati katilulak kukaayenumi eban, Kúyahuudak kuceen kati mofam mati Asia di kujukumi Paul di fukobaf fáamakaf. Di kasuulenumi jameeŋey búrom ban di kúloumool. 28Di kucibulomi, “Bukanak kati Isirael, jirambenom! Ániinaau ume ajawumi kaliikiten bukanak banoobani man kutiiken bukanolaal, di sílingaas sati Muusa. Iñeme poop akila aliikiteniimi man kutiiken fukobaf fáamakaf foololaal, benento nájeetumulojeetum Kakaanutumi Kúyahuudak poop bee dóo di fukobaf fáamakaf, man asiken tanat ute tan líroore.” 29Mati no’ona bukaaku di kujukeenumi Paul di Torofimo ati Efes an kulakomi kariiboorak di ésukey yáamakey no’ona. Di kusofumi manteer Paul ájeetumool bee di fukobaf fáamakaf. 30Bukanak kati ésukey búrom di kuyiten káguuloor, di kuteyumi man kusofumi Paul ban di kuradagenoomi kúpuren bee téeŋey yati fukobaf. Yaŋ di kuwambenumi kúlamutak koolifo. 31Jameeŋey yati bukanak elakomi eñesey bee ebujooley, arungaau áamakau ati kutiikaak Kúroomanak najammi mati kati Yerusalem búrom bukooku di káguuloor. 32Naŋarumi kutiikaool kuceen di kutiikaak kurungaool galab, man kuteyumi bee di bukoo. Nan jameeŋey yati bukanak ejukulomi arungaau áamakau ati kutiikaak Kúroomanak di kutiikaool kooku bo ebiley, di kukatumi enagey Paul. 33Arungaau áamakau ati kutiikaak Kúroomanak áriiŋulomi nakaan man kusof Paul aban nammi kuŋoobenool ñátum di ñiwuj ñigaba. Ban naceeŋumi ai eenomi oo ban waa nakaane. 34Kuceen dóo di jameeŋey di kukaawumi, bukaaku koone maa bukaaku koone maa. Mati burigoorab arungaau aŋoolenut ajam waaf wafiite to. Ban nasenumi buruŋ man kutiikaool kújeetummi Paul bee dán kutiikaak kulakoemi. 35Nan kúriiŋulomi di fúremboorumaaf, kutiikaak di kuteboomi ubandiil man kupooyool mati féenaaf fati jameeŋey fúkalaakalaa. 36Jameeŋey yati bukanak búrom di elakomi káriibenul di kacibuloorumi, “Bujool!” 37Nan kutiikaak kulakomi kájeetumulak Paul bee dán kutiikaak kulakoemi, nammi arungaau áamakau ati kutiikaak Kúroomanak, “Mante paniŋoolen isanken furim?” Ban naanoomi, “Mante nujanjam Kúgirikak? 38Mante au lee ati Misira ayitenumi káguuloor di kunakak uku, arungenumi Kubuja Bukan káriiŋe síwili sabakiir ápurenuliimi di baŋaanab?” 39Paul nalaañenoomi, “A’a, ínje oo leti. Ínje Áyahuud ati Tarus yati Kilikia, ésuk yajamoe. Bonket ukatom man isanken di bukanak buku.” 40Arungaau áamakau nasenoomi buruŋ, ñaa Paul najummi tan pánloe di ejerereŋey ban natonkiimi man kutunten. Bukanak búrom di kutuntenumi sii, nasankeniimi di kasankenak kooliil, Kúhiburak.

will be added

X\