MUKAANAAM 20

1Nan káguuloorak kubanumi, Paul nawonkumi kuriibaak man áliŋeniil. Nan mo’omu múpurutomi jayiinkun, di kukatoorumi man ajawumi bee Makedonia. 2Nan ájawumumi di sísukas sati upanaw ukila náliŋenumi kuriibaak máamak. Ban náriiŋumi mofam mati Gírik. 3Boo nalakomi wáriiŋe kuleeŋ kúfeegiir. Nan alakomi kajonjoorak bee eŋarey busaana báamak man átip alaañ bee Siria, najammi mati Kúyahuudak kuceenak kulakolako eñesey buruŋ bampi kubujool, ñaa nasofumi bee elaañ kálamum Makedonia. 4Sopatiro ati Beroa, añiilau ati Pirio, natooñool man kujaw, moo mákonam di Arisitariko di Sekindo kati Tesalonika. Gayos ati Derebe poop natooñool man kujawoor síñakon, moo mákonam di Timoti, di poop kati Asia, Tukiko di Tarofimo. 5Di kulo fáculoli tíkukobolimi di ésukey yati Turaad. 6Nan káaningak kati Mbúurey Yabajutumi Múliitenuma kubanumi, wúli nuŋarumi busaana báamak di ésukey yati Filipo yati Makedonia. Di kunak kooni futok fácul nutookiimi di ésukey yati Turaad, nulakobomi wáriiŋe kunak futok di kugaba. 7Di funakaf fútiyaaraf fati kálebienak, nujojumi tákon bee ekaan Káliimenak kati Akiiyaau Yensa. Paul nasofumi ejaay fati kajom, alakomi kasankeniilak piyo manteer bee mo titoorey yati fukaraay. 8Di bajumi síwuŋenuma sajuupoe di kalimbisak kufatiyena dán ulakoeenumi fujojaf. 9Nan Paul alakomi kasankenak piyo, ápura Yutuko man alakoe étoofeney, ban kámooraak di kufaŋ man kusofoomi máamak manteer ápakul áloul di fatiya di kalimbisak kúfeegintenak. Nan kuyitenoomi, di kujukumi mati nacecet. 10Paul náwaloul ároogo di oo ban nagaabool, man aaniimi, “Takum úyegetuul ugaal. Narondoŋ!” 11Koo poopiil kulaañumi bee di kalimbisak fatiyaay, Paul natingumi fúmbuur, di kurimi man kukammi Káliimenak kati Akiiyaau Yensa. Paul naroŋ di kasankenak bee mo di waradabaw abanumi najawumi. 12Kújeetummi ápuraau ániinaau bóot man aroŋe, di mo’omu úyegetiil ubebenibeben máamak. 13Paul ñátum di eŋarey buruŋ bee Aso, boo náregolimi man újupulool di busaanaab, baññaa wúli nútitip man ulo fácul ñátum di eŋarey busaana báamak bee Aso. 14Nan Paul átookolimi di Aso, nújupulool man útipumi bee Mitilen síñakon. 15Fati kajom nulaañumi útip man úriiŋumi fúrinkaf fati Kio. Furabooraf, núriiŋumi fúrinkaf fati Samo. Nan tilammi tirab núriiŋumi Mileto. 16Paul nasofeensof bee ewuuj Efes, mati amaŋut kapiyo di mofam mati Asia. Nalinliim ériiŋey Yerusalem, kaanjaat paŋŋoolen, bee emaat karuukenak kati káaningak kati Pentekosut. 17Nan úriiŋumi Mileto, Paul naboñ kúboñak bee di kunifaanak kati fujojaf fati Efes, man áwonkuliimi kubil bee ejukool. 18Nan kúriiŋulo’oomi, naaniimi, “Muyuul di kúkouul jimammanj man ilakomi eeno di muyuul nanan búrom kápurumul nanan nan ínje ijuumenumi kákamunom kútiyaarak di kapanak kati Asia. 19Nan ilakomi ekaaney burokom nan aroka bee mati Akiiyaau ñátum di kawalenooro di mukul. Kúyahuud kuceen di kútukenumi furim man kootumi esofomey man kugaalenom máamak. 20Jimammanj mati ikaturerut hani waaf bee karambenuul, nan ilakomi káriiŋen fácul bukanak búrom mba kaliikiten di sísindouul. 21Nirereg Kúyahuud di Kakaanutumi Kúyahuud koote kátiiwoor kukat majakutiil man kulaañ bee di Atijamit ban di kúyinen Akiiyaolaal Yensa Apakenaau Áamakau. 22Jijanten, iñeme ínje oomu ejaw bee Yerusalem, mati ínje eete ekaan wan Búyegetab Bátienaab buregammi, bamanjut waa woote ebajom bo fáculey. 23Di ésukey yanoosani nijawumi, Búyegetab Bátienaab di búregaaliom mati bukanak pankukulom dán bukanak kukuleimi ban di kúsuutukenom. 24Bare ínje di fúko’om, eroŋey yúmboom ebajut fúkaw ban yoo lee waaf, leejaat nikaanuyo mambi ifabel burokab ban Akiiyaau Yensa asenammi. Boo eenomi káriiŋen furimaf fajakaaf fáyiisenumi majakam moola. 25Jijanten, iñemeñaa nimammanj mati hani ákon di muyuul búrom kan íjawumumi titooruul, man íriiŋenuumi mati jáyiaj jati Atijamit, leejijukurerom inki. 26Ínje eem di ereguul tíen funakaf fati jaat, kaanjaat hani ákon di muyuul ájimmi, lee búrooko’om! 27Mati ínje ikatut káyiisenuul búrom wan Atijamit amaŋuumi man jimanj. 28Jíkaanumooro ban di jíkaanum anoosani an Búyegetab Bátienaab busenuumi man jicookoorool. Jikaan nan kumata jicookoor ban di jipooy kati fujojaf fati Atijamit mati kan akammi koola kápurumul di ecaamey yati fúsimaf fati Añoolool faŋ. 29Ínje nimammanj mati nampi ikatuumi bálamuk, símunduŋo sákoolenie pansibil titooruul, ban leesipaken kamatak. 30Hani kuceen di bukanak kooli pankubil kureg wakaanutumi malegen manteer mbi kúñakul kuriiba kuceen man kuriibooriil. 31Moo kaane jíkaanum! Jiwoolo mati ínje niliikitenuuliikiten fuk di balay wáriiŋe simit sífeegiir nilakolako di muyuul, mukulam di móro. 32Iñeme ínje oomu di kabilenuul di Atijamit di furimaf fati majakam moola. Furimaf ufe panfuŋoolen fúliŋen úyegetuul di poop fukaanuul man jibaj kawulak kan Atijamit abajumi bee mati bukanak koola búrom. 33Ínje imaŋurerut ebaj gódifori, mba sáni, mba wañ wati an aceen. 34Muyuul di kúkouul jimammanj mati uñenaw uwe nírokumemi bee ecaam wanoosani wan ínje di kupaalom uceeŋumi. 35Níyiisenuuyiisen di wanoosani ñátum di burok báamak anau aate karamben kabajutumi. Muyuul joote kawoolo furimaf fati Akiiyaau Yensa di fúko’ool aregumi, ‘Fanfaŋ man jake asenemi wuuj man ayabemi.’” 36Nan Paul abanumi kasankenak mo’omu, nákuntaajenumi oo di bukoo tentaam man kulawumi Atijamit. 37Bukanak búrom di kúruurenumi ban di kugaaboomi, man kucuufool nan kulakomi kakatoorak. 38Wafaŋumi man úboteni’iil máamak woo eenomi Paul naregiireg mati leekulaañ kujukool inki. Di kuyiirenoomi bee too di busaanaab báamakab.

will be added

X\