MUKAANAAM 2

1Nan funakaf fati káaningak kati Pentekosut fúriiŋumi kuriibaak di Yensa búrom di kujojumi tín tákon. 2Yaŋ too galab kasuuŋut di kúpurumulomi fatiya nan fárus fúfuutenulo di kánkum káamak, ban di kumeeŋumi kalimbisak dán kulakomi. 3Di púruliimi fús, waaf waanoe nan kúredimp fati bújeek, buyiisoore di buwalomi bugor ákon-akon aantomi. 4Búyegetab Bátienaab bookiibook ban kutaatumi usanken uceen wálauleriiti, nan man Búyegetab Bátienaab bukaaniimi buseniimi man kusanken mo. 5No’onu di ésukey yati Yerusalem Kúyahuud kuceen kukoba káamak kápurumulomi di mof manoosani búrom di dúniyaay kalakoeen dó. 6Nan kujammi kasuuŋutak uke, jameeŋey yati bukanak di ebilumi tákon. Bukoo búrom di sayiimi mati kulakolako ejamiil anoosani nasanken di kasankenak koola fúkouko. 7Di wáaloiimi ban di kaaniimi síwoonoor, man koone, “Jé! Bukoo búrom kasankenemiñaa lee kati Galili? 8Buu kaaññaa, búromolaal nujamaal anoosani nájamumiil di kasankenak koola fúkouko? 9Bukaaku di wulaal kápurumulomi di mofam mati Parut, Medoi di Elamite. Bukaaku poop kápurumulomi di mofam mati Mesopotamia, Yúdea, Kapadokia, Ponto di Asia, 10Furugia, Pampulia, Misira, di upan uceen wati Libiya kalofa ésukey yati Kurene. Bukaaku kápurumulo Róoma, bukaaku Kúyahuud di bukaaku kalaañumi kusof buruŋab bati Kúyahuud, 11Kukurete di Kuraab. Wulaal búrom nujamaalejam di kusanken ñátum di usankenaw woololaal mati wajamurerutimi man Atijamit akammi.” 12Di wáaloiimi ban di kaaniimi síwoonoor, man koonoorumi, “Mo’ome waa?” 13Bare bukaaku di jameeŋey di kúnaruliil man koone, “Buku kurandaan bunk kupooñ!” 14Bare Peter, najummi di kúriiŋenaak uñeney di ákonau, ban nasankenumi fatiya di jameeŋey bákoliut nammi, “Muyuul kati Yúdea di muyuul kacinumi di Yerusalem, mbi jimanj mo’omu tíen, jíyenten kurimom. 15Bukanak buku kúkaliut nan man jisofumi eeno, mati iñeme sirig futok di sibakiir di bújomaraay ceb. 16Bare jíyenten mo’omu moo aboñaau Yoel asankeneenumi, man ammi, 17‘Di kunakak kúlamukaak, Atijamit naane, Ínje pániwalenul Búyegetab búmboom bee di anoosani, ban kuñooluul kúniinaak di kunaaraak pánkuriiŋen furimaf fati Atijamit, ban kúpuraak kúniinaak kooluul pankujuk malegenam mápurumulomi di Atijamit nan sáaut, di poop kunifaanak kooluul pankumanj malegenam mápurumulomi di Atijamit di sáaut sooliil. 18Éey, di kunakak kukila, kumiiceelom kúniinaak di kunaaraak Pániwalenuliil Búyegetab búmboom, ban pánkuriiŋen furimaf fúmboom. 19Pániyiis mukaanaam máamakam máriiŋumi síwoonoor di fatiyaay, ban pambaj kúmanjum kúbuto tentaam, pambaj fúsim, sambun, di fakoor fárimene. 20Bala’ab pambulaañ érim túk, jileeŋaj pánjiyem nan fúsim, bala’a funakaf fati Akiiyaau fúriiŋ, funakaf fafaŋumi man fúkalaae di kunakak búrom. 21Ban ampi awonkumi kareesak kati Akiiyaau panapak.’ 22“Bukanak kati Isirael, jíyenten kurimak uke: Yensa ati Nasaret, ániine an Atijamit áyiisenuumi tíen mati Yensa di akila nápurumulo, ñátum di ekaanooley man akaan wajamurerutimi, di mukaanaam máamakam máriiŋumi síwoonoor, di kúmanjum. Muyuul búrom jimammanj. 23Yensa umu, oo Atijamit di fúko’ool asofeenumi biñoo no’ona ban námanjaalieemmanjaali mati pankusofool kusenool muyuul. Muyuul jíbujumoomi di uñenaw wati kamanjutumi sílingaas sati Atijamit man kufaaŋenool di ébaarey yati búpinab. 24Bare Atijamit náyitenuloomi di kacetumi, ban napakenoomi di jariey yati ecetey, mati ecetey eŋoolenut esofool di kánkumak kooliyo. 25Mati Dauda nasankensanken mati oo, ‘Nijukejuk Akiiyaau nanoosani fáculom, ínje búyegetom leebugaal mati oomu di kañenom kúrid. 26Moo kaane búyegetom bufintofinto, ban fúredimpom foofu di kamaayoor, ban eniilom panelako di fúgolum. 27Mati au Atijamit letukat yuutom di Esuney, letukat biiŋab bati arokai afiumaay man bukaño dóo di fuyaakaf. 28Au numanjenammanjen uruŋaw waje’emi bee di eroŋey elegeney, kalakaak kooli di ínje pankusenom kásuumaay mákas. 29“Kutiom, ínje eete ereguul tíen mati afannaaniŋolaal Dauda naceteenumi di kufokeenoomi ban fuyaakool foofe baabe di wulaal bee mo jaat. 30Bare nakaaneenkaan aboña, ban namanjeemmanj mati Atijamit wan abaateenoomi panakaan. Atijamit naregeenreg Dauda, ákon di úwoloorumaw woola panakaan áyi. 31Dauda nájukaalimi ban nasankenumi mati káyitoulak di kacetumi kati Apakenaau Áamakau. Ban nalakomi kasankenak mati Apakenaau Áamakau letakaten yuutool di Esuney, mba biiŋool man buput dóo di fuyaakaf. 32Yensa umu, Atijamit áyitenuloomi di kacetumi, ban wulaal búrom nujukaajuk malegenam mukila. 33Yensa nalakenimi di báridab bati Atijamit, Ampaool, ban nasenoomi Búyegetab Bátienaab, nan man Atijamit áligeenumi. Ban Yensa poop asenolaami Búyegetab Bátienaab woo eenomi wan jijukeñaa di wan jijameñaa. 34Mati Dauda atebenuti bee di bukinab bajakaab, bare oo di fúko’ool nammi, ‘Atijamit Akiiyaau narereg Akiiyaau úmboom, Lako di báridom, 35bee nampi ikammi kulatoori fútobojumaaf fati úkamuni.’ 36Bukanak kati Isirael búrom koote emanj tíen mati Atijamit nakankaan Yensa umu, an muyuul jifaaŋenumi di ébaarey yati búpinab, Akiiyaau di Apakenaau Áamakau.” 37Nan bukanak kujammi wan Peter asankenumi mo’omu, úyegetiil di ujisumi máamak, di kommi oo di kúriiŋenaak bukaaku, “Kútioli, wúli waa noote ekaan ñaake?” 38Peter nalaañenumi, “Jítiiwoor jikat bálamuk majakutuul, ban anoosani di muyuul átiiguleni di kareesak kati Yensa Apakenaau Áamakau, mambi majakutuul mubonketi, ban Atijamit panasenuul kawulak kati Búyegetab Bátienaab. 39Mati Atijamit nálilig bee di muyuul, di kuñooluul, di kacinumi ban lóie, di anoosani an Akiiyaau Atijamit awonkulomi bee di fúko’ool.” 40Ban Peter nalawiimi ñátum di kasankenak kajuupoe, di aaney, “Jipakenooro di kájoonaataak kati bukanak kati jaat.” 41Kajammi wan Peter asankenumi man kuŋar kukaan di úyegetiil, koo kútiigulenimi. Funak fukila di bajumi bukan káriiŋe síwili sífeegiir kabenenumi di bukoo. 42Kumammaŋ máamak bee kasofoor wan kúriiŋenaak kulakomi kaliikiteniilak, di ebaj bapaalaayab, di kutingoor usoor, di elawey. 43Atijamit náyiisenyiisen mukaanaam máamakam máriiŋumi síwoonoor di kúmanjum kápurumul di kúriiŋenaak ban ekolaay di elakomi di anoosani. 44Ban kúyinenaak búromiil kurulenumi ecin tákon ban wan kukilumi búromiil too kure’e. 45Di kunoomenumi wanoosani’iil, man kucaaboorumi sígodi’iil nan man ceeŋumi man anoosani abaj. 46Funakoofunak di kurulenumi kamaatoor di fukobaf fáamakaf tákon ban di kutingoor usoor di sísindoiil, di furi tákon di úyeget wajinlene di poop úyeget wáwambuloe, 47nan kulakomi esaley Atijamit. Bukanak búrom di kuwaleniil jak, ban funakoofunak Akiiyaau nájeetummi kapakumi nabeneniil too di bukoo.

will be added

X\