1 Nan Apolo alakomi Korint, Paul nájawunjawum kapanak kati sísuk sati fatiya bee Efes. Boo natookumi kuriiba kupinaay. 2 Man aceeŋiimi, “Mante jiyayab Búyegetab Bátienaab nan jibilumi jikaan kúyinena di Yensa. Di koonoomi, “A’a, wúli ujamurerut waaf wambo wan koonemi Búyeget bati Atijamit!” 3 Naceeŋiimi, “Kama, muyuul kátiigulen kei kukaanuumi?” Di kulaañenoomi, man kommi, “Wúli kátiigulenak kati Yaaya.” 4 Paul nammi, “Yaaya nátiigulentiigulen bukanak mambi kútiiwoor kukat bálamuk majakutiil. Bare nalakomi karegen bukanak kati Isirael man kúyinen di aatumi bee ebiley bálamukool, oo eenomi Yensa.” 5 Nan kujammomi, di kútiiguleni di kánkumak kati kareesak kati Akiiyaau Yensa. 6 Paul narembenumi uñenool di bukoo, Búyegetab Bátienaab di buwaloulomi di bukoo. Di kusankenumi di usanken uceen wálauleriiti, ban di kúriiŋenumi kurim kápurumulomi di Atijamit. 7 Koo búromiil káriiŋe uñen di kugaba. 8 Wáriiŋe kuleeŋ kúfeegiir Paul najawumi dóo di fukobaf man asankenumi bukanak bákoliut. Ban nalakomi kámik di bukoo, naliikumi ekaaniil man kúyinen wan asankenumi mati jáyiaj jati Atijamit. 9 Bare bukaaku kájameriitumi kulatumi káyinenak man kulako kánarul jákaati mati Buruŋab bati Akiiyaau fácul bukanak kajojumi. Paul nakatiimi ban naŋarumi kuriibaak man kujaw di oo. Balayoobalay, nalako kajaloor di fuliikitenaf fati Turanno. 10 Narondoŋ di mo wáriiŋe simit sigaba, manteer bukanak búrom kacinumi di mofam mati Asia man kujam, di poop Kúyahuudak di Kakaanutumi Kúyahuudak. 11 Atijamit nalakomi ekaan wajamurerutimi kápurumul Paul. 12 Hani mubuur múyuuyooruma mba wañ úrokuma wagorumi eniilool woo kuŋaremi kugor kásumutumi di kúkoyummi, hani bágun bákon balakomi di bukoo búpupur. 13 Kúyahuud kuceen kayuunooremi banoosani bee kacesoor úgun di bukanak ban di kumaŋ eŋar kareesak kati Yensa man kukammo. Di kommi, “Ínje eem di kájaatikenuul di kareesak kati Yensa an Paul áriiŋenemi. Jípur di ániinaau umu.” 14 Kuñiilak futokey di kugabaak kati Sikewa, ásimenaau áamakau ati Atijamit, kulakoñaa ekaaney mo’omu. 15 Bare bágunab di booniimi, “Yensa oo nimanjoomanj, ban Paul poop nimanjoomanj, bare kama muyuul bukei?” 16 Ániinaau an bágunab booke, náloumiimi, nafaŋiifaŋ kánkum káamak ban naŋooleniil búrom. Di kuteyumi kúpur eluupey ekila siniil sítiikaar di poop bábukoerab di bóro. 17 Kúyahuud di Kakaanutumi Kúyahuudak búrom kacinumi Efes di kujammi mati mo’omu, di kúkolimi máamak. Ñaa kareesak kati Akiiyaau Yensa di kutebeni fatiya man kúlebieni máamak. 18 Kajuupoe di kubilumi kukaan iñeme kúyinenaak di kufelumi úyegetiil man kureg fácul bukanak majakutiil mansi kukaaneenumi noo. 19 Kuceen di bukoo kansi kukammi fáliimaetaf di kuŋarumi síbukaiil kujojen tákon man kureemenusomi fácul bukan. Nan kupinumi wan kunommi síbukaas di jawumi reoor síwili sooni bukan kugaba di uñen sati sígodifori. 20 Mati mo’omu furimaf fati Akiiyaau di fufetenimi bee di bukanak banoobani di fufaŋ man fubaje kánkum. 21 Nan mo’omu mubajomi muban, Búyegetab Bátienaab bukammi Paul man asofumi di búyegetool bee kájawum Makedonia di Akaia man alaañumi bee Yerusalem. Paul nammi, “Nampi íriiŋubomi iban, neete ejaw poop ijuk Róoma.” 22 Nabomboñ kurokoorool kurambenaak kugaba, Timoti di Erasutos bee Makedonia man kulo fáculool. Bare oo di fúko’ool nalakomi Asia tínok. 23 Di nanan nikila, di bajumi kájiisoor káamak di kuyitomi di ésukey yati Efes mati Buruŋab bati Akiiyaau. 24 Di bajumi afaaña aceen ati gódifori, an koonemi Demetirio, afaañemi sígodifori dán kumiiceelaetemi emitey eseekey yati Arutemi. Karokeoomi di kubajebaj sígodaas sajuupoe máamak. 25 Demetirio nawonkumi kupaalool kufaañaak tákon kan eenomi burokiil bákon, man aaniimi, “Kupaalom, jimammanj mati fubajaf foololaal di burokab ube fúpurumulomi. 26 Bare nan man jijukumiñaa ban di jijam, ániinaau ume Paul nabuntoorumi ban nátiiwumi bukanak kajuupoe, di aaney simit sajoonenimi di uñen wati anau, soo let simit jáng. Mo’omu mabajoeñaa lee ésukey yati Efes ceb bare jáwunjawum di mofam mati Asia búrom. 27 Ban bugaalab pambubajo di wulaal. Ínje lee kasanken mati di burokab boololaal kootut esof kúlebi, bare ínje poop kasanken mati di fukobaf fati emitey yáamakey eseekey yati Arutemi letebaj kálebienak, yan bukanak kati Asia di kati dúniyaay búrom kumiiceelaetemi. Ñaa kákalaak kooliyo pánkujim!” 28 Nan kujammomi di ri’iimi máamak, man kucibulomi, “Arutemi ati Efes nákalaakalaa!” 29 Ésukey búrom di éjiisoor. Kuceen di bukoo di kúpurulomi fús di kusofumi Gayos di Arisitariko, buke kati Makedonia katooñumi Paul kajaaburuŋak, di kuradageniimi bee tan kati ésukey kujojemi. 30 Paul oo di fúko’ool namaŋeemmaŋ bee kanoken titoorey yati jameeŋey man asankeniil, bare kuriibaak kumaŋut kusenool buruŋ. 31 Kuceen di kurungaak kati Asia, kakammi kupaalool, di kuboñumi furim man kulawoomi takum anoomen fúko’ool ñátum di emaŋey bee emaat fujojaf. 32 Di kati fujojaf fándomi di kújiisoor, bukanak di kulakomi kakaabuloor mooliil, bukaaku koone maa bukaaku koone maa. Kameeŋe kalakotomi kumanjut wau kaane di kujojutomi. 33 Kúyahuud bukaaku dóo di jameeŋey di kusofumi mati Alesandar, oo dóro di wabajomiñaa, di kukaanoomi man ajaw ajuum fáculiil. Ñaa Alesandar natonkiimi man kutunten ban nasankenumi bukanak man áyiiseniimi mati oo di bukanool kulout di waaf wabajomiñaa. 34 Bare nan jameeŋey emanjumi di kujukumi mati oo Áyahuud, di kulakomi elaañ kukaaw ban di erulenumomi manteer bee mo sirig sigaba, di aaney, “Arutemi ati Efes nákalaakalaa!” 35 Di múlamukaam, aciika anifaan ati ésukey natonkiil man akaaniil kutunten, man ammi, “Bukanom kati Efes, ai amanjutuñaa mati kati Efes eenomi kupooyaak kati fukobaf fati Arutemi yákalaami di poop kupooyaak kati élankiin yáliroore yawaloulomi fatiya? 36 Mati hani an aŋoolenut añoosuwo, muyuul joote katunten ban takum jikaan waaf wati buliim. 37 Muyuul jíjeetumulojeetum kúniinaak buke baabe, kákuututumi waaf wáliroore di kukoba mba kasankenumi ñíi mati emitey eseekey yoololaal. 38 Kaanjaat Demetirio di kupaalool kufaañaak kubabaj buruŋ bati kataakenoor kúniinaak buke, kugamenaak kúwambulowambulo mati babaj kugamena. Ban ñaa kob man kugamena kugamen! 39 Ban jibajujaat wan joote karegulanken, jikaanuwo di fujoj fati bukanak kacinumi di ésukey manteer pansiriiboor di sílingaas. 40 Mati wabajomi jaat, bugaalab boobu dó pankuŋoolen kútaakenoli mati wulaal kuyitenaak kati káguuloor. Bajut wan ootaale ereg uceen mati kájiisoorak uke!” 41 Nan asankenumomi aban, nayiisikenumi fujojaf.
