MUKAANAAM 18

1Paul nápurumi Atene man ajawumi bee Korint. 2Ban natookubomi ániine Áyahuud an koonemi Akula, an ati di mofam mati Ponto, abilumi bee Italia piyout oo di aseekool Pirisikila, mati Áyiau Áamakau Kilaud nasensen buruŋ man Kúyahuudak búrom kúpur Róoma. Paul najawumi bee ejukiil, 3ban nalako bo di bukoo di sísindoiil mati burokiil bákon, boo eenomi kajoonenak síguut. 4Funak fanoosani fati kálebienak, tooketook Paul man alakomi di kajaloor di fukobaf, man araagalumi akaan Kúyahuud di Kúgirik kuceen man kúyinen. 5Nan Sila di Timoti kúriiŋulomi di Makedonia, Paul abajut burok buceen leejaat káriiŋenak kurimak ceb di káyiisenak Kúyahuudak, man aregiimi mati, “Apakenaau Áamakau an jilakomi di eñes oo eenomi Yensa.” 6Nan kulakomi elatool ban di ejelool, nafank kaporak di uloaool aban naaniimi, “Búrookaab bati ecetey yoola mbi bulako di muyuul! Lee kaan di ínje. Káŋarum iñeme ínje neete ejaw bee di Kakaanutumi Kúyahuudak.” 7Nakatiibomi ban najawumi bee di eluupey yati ániine Akaanutumi Áyahuud an koonemi Tiito Yusuto, amiiceelaeta ati Atijamit. An eluupool sílingoorumi di fukobaf fati Kúyahuudak. 8Kirisipo, oo arungaau ati fukobaf, ban oo di kati bajamab boola búrom di kúyinenumi di Akiiyaau. Bukaaku kajuupoe kammi di Korint di kujammi kurimak, di kúyinenumi ban di kútiigulenimi. 9Fuk fákon, Akiiyaau nasankenumi Paul ñátum di waaf nan sáaut ban naanoomi, “Takum úkoli! Sanken! Takum utunten! 10Mati ínje oomu di au, an letaremben kañenool di au bee ekaani búlaput, mati bukan kajuupoe di ésukey uye kúmboom.” 11Paul nalakobomi wáriiŋe emit yákon di bútingum, kaliikitenak mati furimaf fati Atijamit titooriil. 12Nan Ganlio akammi anifaanau Ároomanau ati kapanak kati Akaia, Kúyahuudak búrom di kujamoorumi, man kúloummi kusof Paul, man kújeetumuloomi bee di fugamenaf, 13man kommi, “Ániinaau ume oomu kabuntoor bukanak bee kamiiceelaet Atijamit di buruŋ bariiboorut di sílingaas.” 14Bare bala’a Paul asanken, Ganlio nammi Kúyahuudak, “Kaanjaat wan jitaakeneñaa ániinaau umu mati waaf wajakut mba mati búlaput, moo panijanteneenuul. 15Bareñaa man kammi mati kúceeŋ mati kurim, di urees, di poop sílingaas sooluul, muyuul joote kacookooruso. Moo ínje ilatumi kagamen waaf waanoe mo’omu!” 16Ban nacesooriimi man kúpur di fugamenaf. 17Koo búrom di kúloummi kusof Sosuten, arungaau ati fukobaf, man kutekoomi too di fáculey yati fugamenaf. Bare Ganlio akaanut bo búyegetool. 18Nan púrutomi, Paul nalakobomi di kupaalool kuriiba kunak kajuupoe abenen boo di ésukey yati Korint. Ban nakatiibomi man aŋarumi busaana báamak oo di Pirisikila di Akula bee étip bee Siria. Bala’a ajawumi bee étipey di ésukey yati Kenkurea boo naciikumi funangund mati nababaat kabaat kákon di bújonlenab bati Atijamit. 19Di kúriiŋumi ésukey yati Efes, ban Paul kukatoorumi di bukoo. Bare oo di fúko’ool nanokenumi di fukobaf man abajumi kajaloor oo di Kúyahuudak. 20Nan kulawoomi man alako di bukoo piyo, naaniimi kubonketool lee maŋ. 21Bare, nan alakomi ejaay naaniil, “Súumujaat di Atijamit, pánilaañul bee di muyuul.” Nájupomi di busaana báamak man ápur di ésukey yati Efes. 22Nan áriiŋumi ésukey yati Kasaaria, najawumi asaaf kati fujojaf kammi Yerusalem, ban najawumi bee Antiok. 23Nan alakobomi jayiinkun, nápurubomi ajaw di kapanookapan kati Galatia di Furugia, man áliŋenumi kuriibaak kati Yensa búrom kambomi. 24No’ona, di bajumi Áyahuud an koonemi Apolo, oo ati Alesandaria, áriiŋumi Efes. Akila ániine aŋoolene kasanken tíen ban nabaj fumanj tíen mati furimaf fati Atijamit. 25Ban nájaatikenimi di buruŋab bati Akiiyaau, ban ñaa di kapeeto káamak naregenumi mati bo, ban naliikitenumi joon di malegenam fúkoumo mati Yensa. Manoosani, namanjumi kátiigulenak kati Yaaya ceb. 26Ban natooŋumi kasanken di mapeeto di fukobaf. Bare nan Pirisikila di Akula kujamoomi, di kubemoomi bee sísindoiil man kumanjenool faŋ man tíene mati buruŋab bati Atijamit. 27Apolo abajumi kawoonoor kati bee ejaw bee di kapanak kati Akaia. Ñaa kuriiba kuceen kammi Efes di kúliŋenoomi di mo’omu, ban di kuciikumi letara bee di kuriibaak kati Akaia, kúliŋeniimi man kuwalenool jak. Nan áriiŋubomi, nakankaan arambena áamak bee di káyinenumi di Akiiyaau Yensa mati majakam mati Atijamit. 28Mati nalakomi kañoosoor káamak di Kúyahuudak di bújonlenab bati bukanak. Ban náyiisenumi Kúyahuudak kápurumul di furimaf fati Atijamit mati, “Apakenaau Áamakau an jilakomi eñes oo eenomi Yensa.”

will be added

X\