MUKAANAAM 17

1Paul di Sila kújawunjawum Anfipoli di Apolonia di kúriiŋumi Tesalonika, ban fukob fati Kúyahuudak fommi. 2Paul nan man apiimi nakaan, najawumi anoken di fukobaf. Di kunakak kati kálebienak kooni kúfeegiir nalakomi kajaloor di bukanak ñátum di káyiiseniil furimaf fati Atijamit, 3ban náyiiseniil tíen mati Apakenaau Áamakau aate egaal aban náyitoul di kacetumi, nammi, “Yensa o’omu, an íriiŋeneuumiñaa moola, oo eenomi Apakenaau Áamakau.” 4Kuceen di bukoo di kúyinenumi wan Paul aregiimi, ban di kuriiben Paul di Sila. Moo mákonam kaanumi Kúgirik kukoba káamak kajuupoe di kuseek kajuupoe kabajumi kujuum. 5Bare Kúyahuud kuceen di kubajumi búlat di bukoo, di kuŋarumi kuceen kajakut kayuunooreboñaa man kukaaniil kujoj tákon bee kayiten káguuloor. Di kúloummi síndeey yati Yason bee kápurenul Paul di Sila fácul jameeŋey. 6Bare nan kuŋoolenutumi kujukiil, di kuradagenumi Yason di kuriiba kuceen. Di kújeetumiil bee di kurungaak kati ésukey yáamakey di kucibulomi, “Kúniinaak buke kukammi mofam mújiisoor, kujawulojaw bee di ésukey yoololaal poop, 7ban Yason nawaleniimi síndo’ool. Koo búrom kútaasumi wan sílingaas sati Áyiau Áamakau sífirenumi, man koone babaj áyi aceen an koonemi Yensa.” 8Kurungaak di jameeŋey yati bukanak di kujammi kurimak uke di bóli’iimi. 9Nan kurungaak kukammi Yason di kuriibaak kuceenak man kucaam sígodi san kuceeŋiimi di kukateniil man kujaw. 10Fukaf fukila kuriibaak di kuboñumi Paul di Sila bee Beroa. Nan kúriiŋubomi, di kujonenumi taac bee di fukobaf fati Kúyahuudak. 11Kúyahuudak uke kati bo úyegetiil ufaŋe man úwambuloe kati Tesalonika. Di kulakomi kajanten furimaf fati Atijamit di emaŋ yáamak. Balayoobalay kúmeeloemeelo furimaf fati Atijamit bee ejukey manteer wan Paul aregumi ukankaan malegen. 12Kajuupoe di bukoo di kúyinenumi, naamoorumi kuseek Kúgirik kajuupoe kabaje kujuum di poop kúniine Kúgirik kajuupoe. 13Bare nan Kúyahuud bukaaku kammi Tesalonika kujammi mati Paul oomueen káriiŋen furimaf fati Atijamit di ésukey yati Beroa poop, di kujawumi bee bo man kusuulen jameeŋey man kulat Paul. 14Kuriiba kuceen yaŋ di kuboñumi kúniine kuceen man kutooñumi Paul ateyumi ñátum buruŋab bati falaf, bare Sila di Timoti di kurinobomi ésukey yati Beroa. 15Kúniinaak kuceenak kalakomi kayiiren Paul, di kujawumi manteer bee ésukey yati Atene, ban di kulaañumi di kúboñak bee Beroa man kureg Sila di Timoti mati Paul naane kuwaaken kutookool bo iñemeeñeme. 16Nan Paul alakomi ekobey Sila di Timoti di ésukey yáamakey yati Atene, súumutool máamak nan ajukumi man ésukey emeeŋuñaa sínaati. 17Paul najajaw bee fukobaf man kujaloor di Kúyahuudak di Kakaanutumi Kúyahuudak kakammi kukoba káamak, ban di ninsi najaloor funakoofunak di kubilumi bee di funoomenaf. 18Kumanja káamak kuceen kati di fujuumaf fati Kupikuriak poop di kati di fujuumaf fati Kusutoikak di kutookoobomi. Kuceen di bukoo di kommi, “Umu ayayapooreñaa waa namaŋe bee ereg?” Bukaaku di kommi, “Oo kankaan nan áriiŋena ati simit siceen síbuto” mati Paul nalakolako káriiŋen mati Yensa di mati káyitoulak di kacetumi. 19Di kújeetumoomi bee tan kuwonkemi Areopagit, too eenomi fujuumaf fati kumanjaak káamakak kujojemi, di aaney, “Mante panuŋoolen umanj kaliikitenak kunkulak kan uliikiteneñaa koo eenomi waa? 20Mati waaf uceen wan ujammi nureg an amanjut waaf úmanum, ñaa wúli numammaŋ bee emanj woo eenomi waa.” 21Mati kacinumi Atene búrom di kujaaburuŋak búrom kalakobomi bajut waaf uceen wan kooke leejaat kasankenak mba ejamey munkulam. 22Paul nayitomi ajuum di bújonlenab bati fujuumaf fukila tan koonemi Areopagit, nammi, “Bukanak kati Atene, ínje nijujuk mati muyuul manoosani jikankaan kukoba káamak. 23Mati nan ilakomi kajaatoorak di ésukey, nijujuk báciinab bati simitas sooluul san jimiiceelaetumi. Nijujuk poop fúsimenaf fati bo tan kuciike, ‘Bee di emit yamanjoutie.’ Yan jimiiceelaetemi bamanjutuyo, mo’omu moo níriiŋeneuumi. 24Atijamit atuukumi dúniyaay di wanoosani wándomi búrom. Oo eenomi Akiiyaau ati fatiya di tentaam, ban oo ácineriit di kukob kan anau ateepe. 25Aceeŋut karamben kati an. Oo di fúko’ool awulemi eroŋey, di fuyiifaf, di wanoowaniaw bee di bukanak búrom. 26Kápurumul di an ákon Atijamit atuukumi bukanak kati dúniyaay búrom ban nakaaniimi man kucin di dúniyaay búrom. Ban oo di fúko’ool najuumeneenumi káŋarum di fúcitumaf nanan nan koote ecin di poop sílingaas sati mofam san kootumi kacinoorak. 27Atijamit nakammomi búrom, man bukanak kuñesool, di fúgolumaf manteer kamamen mbi kúkambool. Bare Atijamit áloiut hani ákon di wulaal. 28Nan man kuceen di bukoo kuregumi, ‘Di oo nuroŋaale, nugorooraale ban nukaanaal bukan’, nan man hani kuceen di kusalenaak kooluul kuregumi eeno, ‘Wulaal poop úwoloorumaw woola.’ 29Mati kabiñoo nan ukaanaami úwoloorumaw wati Atijamit, ootutaal esofaal mati Atijamit naanosaano nan náati yan anau ajoonenumi di sáni, mba di gódifori, mba bakooba kápurumul di makooñam di kawoonoorak kati anau. 30Atijamit asofut bee elat bukanak, nanan nan kúmanjaatimi. Bare iñeme nájaatikenjaatiken bukanak búrom banoosani, koote kátiiwoor man kukat majakutiil. 31Mati najuumenjuumen funak fampi agamen bukanak kati dúniyaay búrom di majoonam kápurumul di ániine an amukenumi. Moo Atijamit náyiisenyiisen bukanak búrom ai eenomi ume ñátum di káyitenuloolak di kacetumi!” 32Nan kujammi Paul nasanken mati káyitoulak di kacetumi, bukaaku di kulakomi kánarulool. Bare bukaaku di kommi, “Wúli numammaŋ bee ejam inki wan usankeneñaa.” 33Nan Paul ápurumi ajaw di bukoo, 34bukaaku di kuriibenoomi ban di kúyinenumi wan Paul asankeneenumi. Ákon di bukoo an kuwonkemi Dinusi, oo ati di fujuumaf fati Areopagit, di aseek an koonemi Damaris, di poop bukaaku.

will be added

X\