MUKAANAAM 15

1Kúniine kuceen kápurumulo Yúdea bee Antiok di kulakomi kaliikiten kuriibaak man koone, “Jitamputijaat nan man sílingaas sati Muusa siregumi, leejipak.” 2Paul di Banaabas kuñoosoor yém di bukoo mati kaliikitenak uke. Di múlamukaam, Paul di Banaabas kamukenimi man kujaw bee Yerusalem, di poop kuriiba kuceen kati Antiok kujawoor síñakon di bukoo, man kúmik di kúriiŋenaak di kunifaanak mati kúceeŋak uke. 3Kati fujojaf kuboñiimi kulakomi ejaay, kújawumumi Fonekia di Samaria, di kuregumi man Kakaanutumi Kúyahuudak kútiiwumi man kúyinen di Atijamit. Kurimak uke kati wabajomiñaa woo búrom kuŋaruloŋar kásuum káamak bee di kuriibaak búrom. 4Nan kúriiŋulomi Yerusalem, kati fujojaf, kúriiŋenaak, kunifaanak, di kuwaleniimi jak. Di kuregiimi búrom wan Atijamit akammi kápurumul di bukoo. 5Bare kuriiba kuceen kati di fujuumaf fati Kufarisaak di kuyitomi man koone, “Cenceeŋ man Kakaanutumi Kúyahuudak kukila kutampi ban di kuregiil kusof sílingaas sati Muusa.” 6Ñaa kúriiŋenaak di kunifaanak di kujojumi tákon man kumaloorumi mati kúceeŋak uku. 7Nan kumaloorumi piyo di fujojaf kuban, Peter nayitomi ajuum man ammi, “Kutiom, jimammanj mati nan piyoe Atijamit amukenammi di muyuul man íriiŋen furimaf fajakaaf bee di Kakaanutumi Kúyahuudak man kuŋoolen kujamufo ban di kúyinen. 8Atijamit, amanjumi ésigirey yati anoosani, áyiisenumi mati Kakaanutumi Kúyahuudak poop pankuŋoolen kúyinen, ñátum di ekaaniiley man kuyab Búyegetab Bátienaab boola, nan man ákaanolimi eeno. 9Atijamit ápajuleriit an, natilutilul poop sísigiriil mati kufiunfium. 10Wau kaane iñeme muyuul joom di eyink Atijamit ñátum di egal yook di sikondooras sati kuriibaak? Bútebab booliyo búlebilebi bee di wulaal mba bee di kufannaaniŋolaal. 11Núyinenaayinen mati di majakam man Akiiyaau Yensa áyiisenolaami núpakumaale, koo poop moo.” 12Bukanak búrom kalakomi di fujojaf di kutunoorumi sii, nan kujammi wan Banaabas di Paul kuregumi mati wajamurerutimi di mukaanaam máriiŋumi síwoonoor uru búrom dan Atijamit ákaanumumi kápurumul di kukila titoorey di Kakaanutumi Kúyahuudak. 13Nan kubanumi kasankenak kooliil, Yankuba nalaañeniimi, “Kutiom, jíyentenom! 14Simon Peter naregolaareg man Atijamit atooŋumi amuken Kakaanutumi Kúyahuudak ban nakammi kuceen di bukoo koola. 15Mo’omu muriibooriiboor di wan kuboñaak kuciikumi, 16‘Purutojaat, pánilaañul, ban paniteepulanken eluupey yati Dauda yalomi. Paniteepulanken eluupey yakañomi ban panijuumenuyo, 17mambi bukanak karinomi kuñes Akiiyaau, Kakaanutumi Kúyahuudak búrom kan iwonkumi man kukaan kúmboom, 18moo Akiiyaau aregumi, akaaneenumi man bukanak kumanj no’ona.’ 19Moo kaane, kawoonoorak kúmboom koo eenomi takum ukaanaal táañi Kakaanutumi Kúyahuudak kajonlenumi di Atijamit. 20Bare nootaale eciikiil letara man uregiil takum kuri muria masenimi sínaati mati musikosiko, takum kufinto di aseek mba ániine ati an kuyaboorutumi, takum kutokoñ eluw yati énukuruŋ yáraamuluti mba fúsimaf fooliyo. 21Mati kápurumul bukan kawuujumi, di ésuk yanoosani bukan kulakoe káriiŋen sílingaas sati Muusa man kuliikenuso di kukobak di funak fanoosani fati kálebienak.” 22Kankaan wajake kúriiŋenaak di kunifaanak tákon di kati fujojaf búrom di kuwoonoorumi man kumuken kúniine kuceen di fujojaf man kuboñiil bee Antiok yati Siria, koo di Paul di Banaabas. Di kumukenumi Yúda Barusaba di Sila, kúniinaak karungenumi titoorey yati kuriibaak. 23Di kuciikumi letara yariiboore: “Kútioli, wúli kúriiŋenaak di kunifaanak kooku bo esaafuul búrom kuriibaak Kakaanutumi Kúyahuudak kacinumi di Antiok, di Siria, di Kilikia. 24Biñoo nan wúli ujammi mati kúniine kuceen di wúli kujawulojaw bee kálepenuul man úyegetuul újiisoor di kaliikitenak kooliil. Bare kukila kuyabut kájaatikenak kaanoeñaa mo’omu di wúli. 25Wúli nusosof wajake man ujoj tákon man uwoonoorumi búrom mati man umukenumi kúniine bukaaku man úboñuliil bee di muyuul. Pankuriiboor di kúpaalumoli káamak Banaabas di Paul. 26Kúniinaak buke kanenumi síñunduiil mati burokab bati Akiiyaau oololaal Yensa Apakenaau Áamakau. 27Wúli núboñuluul Yúda di Sila, kampi koo di kúkoiil kureguul waafaw wákonaw wan wúli uciikumi di kurim mati kúceeŋak kooluul. 28Wúli nusosof wajake di Búyegetab Bátienaab di wúli nubabaj kawoonoorak kákonak mati takum urembenuul bútebab bafaŋe man bútaañie wan ceeŋimi, 29mati takum jiri muria másimenimi di sínaati, takum jitokoñ eluw yati énukuruŋ yáraamuluti mba yabaje fúsim, takum kufinto di aseek mba ániine ati an kuyaboorutumi. Jisofujaat kájaatikenak uke, panjijaw fáculey. Jikatooraal kásuumaay.” 30Kúniinaak kubakiirak di kúpurumi Yerusalem man kujaw kúriiŋ Antiok. Kujojenjojen kati fujojaf fati bo di kuseniimi letaraay. 31Nan kujikeruyomi, kurimak kukaaniimi man kubaj kásuumaay. 32Yúda di Sila, koo di kúkoiil kukankaan kuboña kati fujojaf, di kusankenumi wajuupoe wajake bee di kupaaliil kuriiba, kabuntooriil ban di kúliŋen kafiumak kooliil. 33Nan kulakobomi kunak, kupaaliil kuriibaak di kukatiimi man kulaañ bee Yerusalem, di kásuumaay bee di káboñuliimi. 34Bare Sila nawoonoorumi arinoeen bo. 35Paul di Banaabas di kurinomi Antiok ban koo di bukaaku kajuupoe kuliikiteniimi ban di kúriiŋeniil furimaf fati Akiiyaau. 36Nan bajumi kunak kupinaay Paul nammi Banaabas, “Ulaañaal di ésuk yanoosani yan úriiŋenaami noo furimaf fati Akiiyaau, manti ujukaal man kuriibaak kunkulak koom bo ekaan.” 37Banaabas namaŋumi eŋar Yohan Maruk man kujaw tákon. 38Bare Paul asofut mati moo jajak, mati Yohan Maruk ápurumi di bukoo no’ona di ésukey yati Pampulia ban nakatumi burokab di kukila. 39Kañoosoorak kooliil mati mo’omu di kuyitomi máamak manteer kufasoor. Banaabas naŋarumi Yohan Maruk man kútipumi kujaw bee fúrinkaf fati Sipur, 40bare Paul naŋarumi Sila man kujaw, nan kuriibaak kubilenumi kuban di majakam mati Akiiyaau. 41Paul nájawumumi sísukas sati Siria di Kilikia, oo di Sila man kommi di káliŋen kuriibaak kati kujojak kambomi.

will be added

X\