MUKAANAAM 14

1Di ésukey yati Ikoni, Paul di Banaabas di kunokenumi síñakon bee di fukobaf, ban di kúriiŋenumi ñátum di kánkum káamak man jameeŋ éyinenumi, kan eenomi Kúyahuud di Kakaanutumi Kúyahuud. 2Bare Kúyahuudak kalatumi káyinenak di oo, di kususukenumi Kakaanutumi Kúyahuudak bukaaku ñátum di kasiken úyegetiil man kulat kúyinena. 3Paul di Banaabas di kulakobomi piyo, man kúriiŋenumi majakam mati Akiiyaau bákoliut. Akiiyaau náyiisenumi wan kúriiŋumi ukankaan malegen, man aseniimi kánkum man kukaan kúmanjum di mukaanaam máamakam máriiŋumi síwoonoor. 4Bare bukanak kati ésukey yáamakey di kúpajuloor, bukaaku di kulaañumi di Kúyahuudak, bukaaku di kúriiŋenaak. 5Bukaaku Kakaanutumi Kúyahuudak di bukaaku Kúyahuud koo di kurungaiil, di kuwoonoorumi bee élus Paul di Banaabas mambi kuleebiil sikooba kubujiil. 6Nan kúriiŋenaak kugabaak kúmanjumomi di kuteyumi kúpur bee di sísukas sáamakas sati Lusutura di Derebe sammi di mofam mati Lukaoni, di sísuk san kúlingoorumi. 7Boo kulakomi káriiŋen furimaf fajakaaf. 8Di Lusutura, bajeembaj ániine awolimi oo babakoe. Oo biñoo nan awolimi, atamburerut ayito ajuum man ajawooro. 9Nalakobomi káyenten wan Paul alakomi káriiŋenak. Paul najikeroomi caw ban najukumi mati ániinaau akila nababaj kafium káriiŋe man asonteni akoy. 10Ñaa Paul nasankenoomi fatiya, “Yito juum di úkamuni!” Ániinaau nabaalumi fatiya man aam di ejaay. 11Nan jameeŋey elakomi káyentenoolak di kujukumi wan Paul akammi, di kukaaw fatiya di kasankenak kooliil Kulukaoniak man kommi, “Simitas siwaloulowalo bee di wulaal man silaañoorumi nan bukan!” 12Di kuwonkumi Banaabas emitey yan koonemi Jeu, man Paul emitey yan koonemi Hereme, mati oo eenomi asankena anifaan. 13Ásimenaau ati emitey yan koonemi Jeu, fukobaf fooliyo fujuumenimi téeŋey yati ésukey ekila, naruu’ulomi kúmuuna ban di kújeetumi bukaroor bati úrumpen waloreni bee to di kúlamutak, mati oo di jameeŋey kumammaŋ bee esen búsimen bee di Paul di Banaabas. 14Bare nan Banaabas di Paul kujammi mati wan koote ekaan, di kutuutulumi uloaiil ban di kuteyumi kunokenumi di titoorey yati jameeŋey, man koom di ekaawey, 15“Kúpaaloli, wau kaane di joom di ekaan mo’omuñaa? Wúli di kúko’oli bukan ceb nan muyuul! Wúli nujawulojaw baabe bee káriiŋen furimaf fajakaaf, mambi jikat mukaanaam umu mabajutumi fúkaw man jílaañenul bee di Atijamit aroŋaau, atuukumi fatiya di tentaam, di falaf, di wanoosani wándomi. 16Úwoloorumaw wawuuje, Atijamit nakakat kati mofam mati dúniyaay búrom man kuriiben buruŋab booliil. 17Bare ayoolorerut káyiisenak kati fúko’ool di búkaanum bajake. Atijamit náboñuluumi kápurumul fatiya kujam kajake ban nasenuul wampi jiri jipooñ kéelookeel aban nakaan úyegetuul ufinto.” 18Bare hani man Paul di Banaabas kúriiŋenumiñaa kurimak kuban, kuŋoolenut kúfireniil takum bukanak kukaan búsimen bee di kukila. 19Kúyahuud bukaaku kápurumulomi Antiok di Ikoni di kususukenumi jameeŋey. Di kulakomi eleebey Paul sikooba kuban di kúfuulool bee kápuraak kati ésukey, mati kusofeensof nacecet. 20Bare nan kuriibaak kati Yensa kúliiboomi tákon, nayitomi man alaañumi bee di ésukey yáamakey. Fati kajomaf oo di Banaabas di kujawumi bee Derebe. 21Paul di Banaabas kúriiŋenumi furimaf fajakaaf di ésukey yáamakey ekila yati Derebe man kubajubomi kuriiba kajuupoe. Di kulaañumi bee di Lusutura, di Ikoni, di Antiok yati Pisidia. 22Di kulakobomi káliŋen úyegetaw wati kuriibaak ban di kulawiimi man kujuum lit di kafiumak, di aaney, “Wulaal ootaale kanoken di jáyiaj jati Atijamit kápurumul di bugaal banoosani.” 23Paul di Banaabas kumukenumi poop kurunga kuceen di fujoj fanoosani fati kuriibaak. Ñaa di kukammi balatab man kulaw kuban, di kukatiimi di Akiiyaau man acookooriil, di an kúyinenumi. 24Di kúlamumumi Pisidia, man kulaañ bee Pampulia. 25Boo kúriiŋenumi inki furimaf fajakaaf di Peruge ban di kujawumi bee di ésukey yati Atalia, 26ban di kúpurubomi kútip kulaañ bee Antiok yati Siria, boo kubileneenimi di majakam di Atijamit man kuŋoolen kukaan burokab ban kúlirenumi iñeme. 27Nan kúriiŋumi Antiok, di kujojenumi kati fujojaf tákon, man kuregiimi búrom wan Atijamit akammi di kukila di poop man áwambulumi buruŋab bati kafiumak bee di Kakaanutumi Kúyahuudak poop. 28Di kulakobomi piyo di kuriibaak.

will be added

X\