MUKAANAAM 12

1Di kunak kukila noo áyiau Herod atooŋumi kásuutuken kuriiba kuceen kati di fujojaf. 2Akila akammi man Yankuba abuji an eenomi, Yohan atiool ñátum jiliba jabaake. 3Nan Herod ajukumi mati mo’omu mukammi man Kúyahuudak súumiil, nakammi man kusof Peter poop di titoorey yati kunakak kati káaningak kati Mbúurey Yabajutumi Múliitenuma. 4Nan Herod akammi man Peter asofi aban nakuli dán bukanak kukuleimi, ban naregumi man uyooŋ ubakiir wati kutiika kupooyool dó. Nasosof bee kagamenool di bújonlenab bati bukanak nampi káaningak kati Ewuujey yati Njalayiri kuwuujumi. 5Bare nan Peter akulimi dán bukanak kukuleimi, bukanak kati fujojaf kurulenumi kulaw máamak Atijamit bayoolout mati oo. 6Di fukaf fo’ofu bala’a Herod amaŋeenumi man kúpurenulool kagamen fáculey yati bukanak, Peter alakoeene kamoor di titoorey yati kutiika kupooya kugaba. Kukokenookoken ñátum ñiwuj ñigaba, ban kupooya kuceen kantomi fáculey yati butumab di kapooy dán bukanak kukuleimi. 7Maleeka yati Akiiyaau yaŋ di épurul to, kalimbisak di kuwuŋ fijijij. Maleekaay di etatacen Peter di kabandool man eyiloomi, man yoonoomi, “Yito galab!” Ñiwujañ ñifelomi di uñenool. 8Maleekaay di yoonool, “Piinoor ban nukaano usamatai.” Peter nakammomi. Ñaa maleekaay di yoonoomi, “Gaayoor kaloai káamakak man úriibenulom.” 9Ñaa Peter nápurutomi man ariibenuyo. Bare amanjut mati wan maleekaay yommi di ekaaney malegen, nasofumi waaf najuke nan sáaut. 10Di kuwuujumi to fulakaaf fútiyaaraf fati kutiikaak kupooyaak man kuwuuj fugabuntenaf, di kúriiŋumi fúlamutaf fati mulapam fúpurumaf bee di ésukey. Di fúwambulo’ooromi, ñaa di kúpurumi. Di kulakomi ejaay di buruŋ maleekaay di éjim nel. 11Peter di fúko’ool nabilumi álaul wabajo’oomi. Ban naanooromi, “Tíenantien mati malegen Akiiyaau aboñulomi maleekaool man epakenom di kañenak kati Herod di wan kurungaak kati Kúyahuudak kusofeenumi bee ekaanom.” 12Nan amanjumi wabajoeenumi, najawumi bee di síndeey yati Mariyaama, Yohan Maruk iñaayool, dóo kajuupoe kujojumi man kulako elawey. 13Peter akongenumi kábabumaak kati fúlamutaf, ban aroka ajaŋa an koonemi Roda nápurulomi bee eyiiŋool. 14Nan álaulumi furimaf fati Peter, di súumoomi máamak, moo báwambulut kábabumaak bare nateyumi álaañudo bee ereg anoosani mati Peter oomu bo di kábabumaak. 15Di koonoomi, “Au nugonogono.” Bare nan ajummi lit mati malegen moo, man koonoomi, “Nakankaan ápurapur!” 16No’onu Peter narulenumi di kakongenak. Nan kúwambuloomi, di kujukoomi, di sáloiimi máamak. 17Bare natonkiimi man kutunten, ban naregiimi man Akiiyaau ápurenuloomi téeŋey di dán bukanak kukuleimi. Ban nammi, “Jiregumo Yankuba di kutiolaal karinomi.” Ñaa ban nápurubomi ajaw bee buceen. 18Di waradabaw, di bajumi kálaulooraati káamak kalakoe dóo di titoorey yati kutiikaak kupooyaak mati wabajoeenumi bee di Peter. 19Herod nájaatikenumi man kúñesulool banoobani. Nan kuŋoolenutumi kujukool, Herod nakammi man kutiikaak kupooyaak kuceeŋi ban naregumi koote ebuji. Nan mo’omu múpurutomi, Herod nápurumi Yúdea man ajaw Kasaaria man alako bo tínok. 20Herod di bólioomi máamak mati bukanak kati Turo di Sidon. Mati muriaiil di mofam mati Herod múpureuumi, ñaa di kuboñ kuceen man kujaw kujamoor di oo. Mútiyaaram, di kujawumi kubuntoor Bulasutus, oo aroka acookooremi eluupey yati áyiau, man kulawoomi kálaañenul kásuumaay titoorey yati sísukas sooliil di Herod, 21ban funakaf fasofimi bee mati kukila man kubaj fujoj di akila. Herod nakaanomi kaloaool kati jáyiaj, man ajawumi alako di ejunkutey yoola yati jáyiaj man asankeniimi. 22Bukanak di kucibuloorumi, “Furimaf ufu fati emit, lee fati an!” 23Maleeka yati Akiiyaau yaŋ di erantenoomi, mati asenut kálebienak bee di Atijamit. Di múlamukaam, siñal di sirioomi manteer acet. 24Bareñaa furimaf fati Atijamit di fufaŋumi man fujamoe banoosani. 25Nan Banaabas di Saul kubanumi burokab booliil Yerusalem, di kuŋarumi Yohan Maruk ban kulaañumi di óoro bee Antiok.

will be added

X\